Read Konyak Naga ISAIA 56 Bible Online

ISAIA 56 - Konyak Naga bible

ISAIA 56

¹Youngwanpawe yoi kahtalante inang: “Hanghe ngaoting hüyange ütingpa ngohnang lingtüoh; hangjingne mamshe Taowe numan yinyene tamlak:

²Aoyinne hipak phe me Sabbath jaowe angnang hüyange tüopa yeshupe yejon Taowe moiman tamlak. Aoyinne ümengpa yeling Taowe iman moimanlak.”

³Kahhengpa ja aowe Youngwanpa kahtalan phei omyangki Iye, “Youngwanpawe yoi kahtalan phei jam-e yoppe khüm ne üte yetamkülak”, she tah i tam; Kahta ja ao moiko ne ngohnangki Iye, “Taowa pee ükeng” she aope-o tahteihtam.

⁴Hükihpu moiko Youngwanpawe inang: “Nange Sabbath jaowe shawe angpu kaiye üte yihnoonma-a hüyange üte hangheye monghah tamnang tüopa nange lingma-a, hüyange ütinglakpu phei ü-jiengjeppu angma-a,

⁵hüma-a ü-khümjing me hüyange ü-kahtalan yo me nange hala yhala ngohyangpu phei; shelao she Taowe teihtüolak nanga aope-o peye yetüohlak.”

⁶Hüyange kahhenglan aoyin yoi-a Youngwanpa kahtalan ükhong ja ne meng, aoyinne Ite ken hüyange I shaoshan, aoyinne Sabbath jaowe ang hüyange Iye jiengjeppu mongjüonge tükke ang, imante inang:

⁷“Taowe nang Ü-üjao kahtangte yahpeilak. Ü-yoppu nokme nangte mongmei phalak, hüyange Ü-wümjong me nange phapu toidopu yahlak. Ü-khümjinga jatlan kahta khongkümpu jingne yoppu nok she nyiklak.”

⁸Okkeshangpu Youngwanpa, aowe yoi kahta Israellan phowe teiye ngohpu mepu nokte yahye, Iye yelakpe janne inang, Iye ülao kahtalan üne-o iman phei omlak jingne yah peilak.

⁹Kahko mepu numan phao yinmok khongküm, phao me yinmok khongküm, hah-lünge tai ne peikei.

¹⁰Ü-weyompu kahtalan, mük müo, iman khongkümpu juteih yenang; iman khongküm yehaupu kuiha ükhulan; iman lam shaha lamyange mang mange shi ngohlakte lengnang.

¹¹Iman-a hahnyakpu kuihalan kih-e aope-o wangmanne yetüo. Tüolan üjupalan me shinge yah okpu hango yenang. Moilan-e yoite meipu hei lingnang hüyange yoite meilak shaha yam.

¹²“Kei wuwüngti jüpüo yahhah,” “hüyange teman-e okpu shinne yinghah! Ngainyihpa tenyih puphei nehoi shemei she meikülak!” she tüolan jokpalan-e ngaonang.