Read Konyak Naga ISAIA 58 Bible Online

ISAIA 58 - Konyak Naga bible

ISAIA 58

¹“Üngwüntüoh, yenüngneipe wüntüoh, nyawong wüng kih-e nang ngaowüng ngaitüoh; hüyange ü-kahtalante iman-e ngaokeng mengpu jeng hüyange Jacob nokphong te iman ünu jeng shingne tamtüoh!

²Tüoyangpoi nyih ja phei me nyih ja she iman-e tao yamnang hüyange ü-lamnyulan shinghu nang, hüke iman-a khakshupupa lingpu jat ja ne mengshih phang she hüyange iman-e Kahwang jing linglak ngaokhüm win-e yetüoh; iman-e üte khakshupu ngaokhüm jingne tongnang, iman Kahwang shongte owe peihunang.

³‘Hangne toman nyaole hüpoi nange-a ü-nge? Hangne toman nying nyingke innyai, hüpoi nange yeshingpu?’ Leihuyah, numan-e numan nyaolepu nyih, numan jingne shaha ngaonang, hüyange numan-e toilingpalan khongkümpute shangne tamnang.

⁴Leihuyah, numan nyaowelepuwe numan yakphei teilük ne tamnang, hüyange numan tee-nang hüyange hoknang. Hükih-e nyaoweleye numan-e yoppute Taowe jaiphalak she numan-e teih nangkü a?

⁵Aope numan-e nyaowelelakei, numan-e numan nying nyingke shangne tamtüoh; numan-e numan shanga hüngneak shinne khuh-e taitüoh, hüyange tüopa tangme lamlak jingne monnye hei tüpla nyam tüoh. Hatüote nyaowelepu she numan-e nyikpu a? Tüopawe Tao monghah-e tamlak she numan-e teihnangkü a?”

⁶“Taowe yah-hupu nyaowelepuwa hatüo ngohnang: Shaoshine tamme angpalan mepu yankeilei, hüyange ngaoting ye-ipu sheam lantüoh, hüyange shaoshiye angpalan hüke taine tamtüoh.

⁷Seanyaopalante nangjing hahying tamtüoh hüyange nok yenangpe toinanpalante nenok eppe tamtüoh. Aoyinne inlak jingne hango yenang imante nyemo phatüoh, hüyange nang pheipulante jammepongpu min pha she tah i.”

⁸Hüwanta nang tangme taowe monghahpu shom wanghe kih-e teelak, hüyange nang mako-a meitamlak. Nang yintamlak jingne Tao nyihjeih she nang phei ngohlak; Tao ompuwe nang neikonpu me jongwanne anglak.

⁹Aope nange yoplakei, Taowe nangte janlak. Aope nange üte nyiklakei, Taowe janlak. “Nange shaoshi phapu lakne tamma-a, yemeipe ngaoweshapu lili, hüyange ngaomeng ngaopu lili;

¹⁰seanyao yengle palante nange hahying phama-a, hüyange aoyin toinan nang tüolante moh ne tamma-a, hüwante nang neikonne ngohpu wangnyak-a nyihning wangngai ne menglak.

¹¹Hüwante Youngwanpawe hipak phe me woilak hüyange shemeipupa toilam phei nang moh-e tamlak. Taowe nanga wongnange hüyange meiye anglak. Nanga yenge wangmanne ngohpu pesha kih-e, aope-o yejüppu yengpeiwo kih-e ngohlak.

¹²Nang kahtalan-e nokjing ülang me nokwelak, hanghepa hipak laolünge heamme tüoh, linge yelak. Numan-a jantpenyu linge yepu, aoyinne heamte phei noklan lingeye tüolan kahta ne menglak.”

¹³Youngwanpawe inang, “Nange Sabbath-a üjao nyih ne jonpaima-a, hüyange nang yoi küw tüolak me tüopa nyih yejonma-a; nange Ü-üjao nyih-a ühakne mengtamma-a, hüyange yin yekempe, toi yelingpe, yejema-a tüonyih ühak yekohpu ngao yengaope yihnoonma-a,

¹⁴hüma-a ü-shaoshanpu me peipu mongmei nange tüolak. Kahtoknyu nopu me nangte yihnoonlak jingne Taowe lingtamlak, hüyange Taowe numan pajeiyong Jacobte phapu kahmük me hoongli mongonglak, Tao, Youngwanpawe ngaoyangki.”