Read Konyak Naga ISAIA 59 Bible Online

ISAIA 59 - Konyak Naga bible

ISAIA 59

¹Leihuyah, yinlak jingne Youngwanpa yak jamloi shohpu yeje, yejema-a yejai oklak ne I napan pu-o yeje.

²Hüpoi numan ünu ümenge, numan hüyange numan Kahwang nipa me yanne tam, hüyange numan ünuwe Iye numan yengelak ne I sheta numan mepu lowe mah.

³Hangjingne numan yak iy phei hüyange numan yaklan ünu-ümenge nuwe ngohnang; numan jupen-e ngaoleih ngao, numan yee-e ünu ngu-nga.

⁴Numan ghonyoite tainang; hüpoi numan yekao me numan-e okpu ye-nge. Numan-e numan ngaowa tahleih iye okpu ngelak she monghüm. Numan-e eiha mayah tamlak jingne numan-e tümpu jon.

⁵Iman-e pujam ükek keknang hüyange matvee kangnang; aoyinne tüolan ükek hah, linang, hüyange paitampu ükek-e pujam muh ngaitamnang.

⁶Tüolan-a matvee (matnok) phei takpu inkhek hangshin yemei teshinne mengnang. Hanghe iman-e ling, kahta-a tüopawe küppe büangne ye-ok. Iman toishaowa ümengpa lingpu toishao, hüyange yakphei lükke ümeng lingpuwa iman yak me.

⁷Iman ya ümengpa yekaote phetnang, ümeng yenangpu iy shailak iman heh-nang; iman-e teihpu ümengpa kon ngohnang; wüngmakke tüohlak hüyange mengtampupa-a iman lamnyu me ngohnang.

⁸Chingmei lamnyu iman-e yeshing, hüyange iman kempu lamme ngaoting yenang. Tüolan-a iman-e lamkon lampak lingtam yangki, tüopa me aoyin ongyapeih, toloimei yeshing ok.

⁹Tüokhei ngaotingpa-a teman mepu üjai me ngohnang, hüyange khakshupupawe teman üyüo; teman-e wangngai yam, hüpoi wangnyak tüo; müktishiwa yam, hüpoi teman wangmang me kemnang.

¹⁰Hüyange mükmüopalan kih-e teman pomme kem. Wangnyak ja leye, teman-a lipu wangnyak yimching me ngohpu ja leye, teman nyihning me yashah hüo.

¹¹Teman khongküm shapnyu kih-e wao; hüyange aoshu kih-e teman yoongeshon. Teman-e ngaotingpa jingne tan, hüpoi ao-o yenang. Yintamlak jingne yam, hüpoi teman mepu hatüo yeonge jaiye ngohnang.

¹²“Hangjingne toman-e nang phei tüi-e omyangpu ümenglan-a loishe ngohnang. Toman ünulan-e tomante ümeng phanang. Tüolan khongkümpu jingne toman meimeiye kentingne tamnang.

¹³Toman-e Youngwanpa phei tüi-e teelaa yangki, nang yeyah, hüyange nang pheite woilak mepu yemong. Toman-e ülaolante shaoshiyateng ne tam hüyange nang mepu lüppe tai. Toman-e teihpulan-a yeshu; toman ngaolan-a tahleih shaha.

¹⁴Ngaotingpa-a jange tei, hüyange ütingpa-a ü-o-te yepei. Ükhong sheshao me ngaotingpa-a yashah hüowe ngohnang, hüyange innenyaipupawe tüoken me nyoijing yetüo ok.

¹⁵Ngaotingpa phei innenyaipupa-a jamloi shoi tüokaiye ümeng lingpu mepu ao lakyapeih yoi nying nyingke ümeng lingpane tüohnang.” Youngwanpawe tüopa ngeyangki, hüyange ngaotingpa yenang she I mongmenge teih.

¹⁶Shangpongpalante jamlak ao-o yenang she ngeye I yashanne teih. Tüokhei Iye iman yintamlak jingne ünganwong Iye jonlak hüyange okpu ngelak.

¹⁷Iye ngaotingpa-a wehok-o phakshaoh kih-e hüyange okpupa-a yan shaoshaoh kih-e olak. Iye yoi nying nyingke lampheli khakshuwe anglakte lahnyikpuwe o-yange hüyange kahtalan shaoshipu yeshupute shangne tamlak tümyange ngohlak.

¹⁸Iman-e hangheyin lingyangki tüophei shuwe Iye yoi wepalante, kahmük üjai me nyoipalan nehoi omme Iye shanghahshaoshipu phalak.

¹⁹Heong mepu henyip ye ngoiye, moilan-e Ite hüyange I yoi ünganwong üyongte nyamlak. Wongnange yünpu yengyin kih-e, hüyange wongnangpu wangyang kih-e I peikülak.

²⁰Youngwanpawe yoi kahtalante inang, “Numan tükke anglak jingne hüyange numan aoyin ünu mepu lüppe ye khongkümpu yintamlak jingne Tao Zionte peikülak.

²¹Hüyange Taowe numan phei jiengjeppu ja lingnang: Taowe ü-ünganwong numante phayangki hüyange Taowe nyüopulan-a numante jin jintepu jingne, hüyange sha-a me peiye numan-e ü-ngao jailak hüyange numan hayimlante hüyange numan huhayimlante ngoikülak hipak khongkümpu me ü-ngao jailak jingne nyüotüoh.”