Read Konyak Naga ISAIA 6 Bible Online

ISAIA 6 - Konyak Naga bible

ISAIA 6

¹Ahngpa Uzziah lipu wangpeng me, taowe Youngwanpa nge, I yoi ahngpa shotjing daowe hüyange no-inyange shotyange, hüyange I jing phakshaoh ülaowe khümjing khongkümpute maayange nge.

²I neikonne seraphim, moilan me üyang wokpong nyimyange yongyange ngoh. Seraphim moilanne üyang ni phei shetate büang, hüyange üyang niye pümte büang, hüyange ülao üyang nipong phei pu.

³Iman-e shejawe shejate hüke teinyik hüyange i: “Üjaopa, üjaopa, üjaopa! Ütahpa Youngwanpa üjaopa! I müktishiwapuwe kahtoknyu maanang.”

⁴Iman ngaowünge khümjing nokjing mokh, hüyange khümjinga lanshe vünkhuh-e maa.

⁵Taowe i, “Üjingne monghümlak yenang! Taowa mahnang hangjingne ü-jupen kaiye ngaipu ngaolili ünu, hüyange taowa ngaokek lili me ünu ompu kahtalan yo me ngoh nang. Hüke ngohpu yangpoi, ü-mük-e, taowe Ahngpa, Ütahpa Youngwanpa ngeyangki!”

⁶Tüophei me Seraphim yomepu ja, Iye jeplak me wümjong mepu yah ngaipu vün pheipu vünhan jepyange ü-tangte puwe ta.

⁷Iye vünpheipu vünhan ü-jupente let hüyange i, “Hatüowe nang jupente letyangki, hüyange sha-a nange püohpuwa yahteiteki, hüyange nang ünulan winyangki.”

⁸Tüophei me Youngwanpawe ipu taowe jai, “Taowe ao shonlak? Hüyange toman jingne ao tailak?” Hüwante taowe janne i, “Tao tailak! Tao shonpha!”

⁹Tüokhei Iye üte i, taitüoh hüyange kahtalante tüopa ngaolan phatüoh: “Numan-e jaja shinne jaiyapoi, numan-e shinge ye-oklak. Numan-e jaja shinne leiyapoi, hanghe ngaiyapeih numan-e yeshing oklak.”

¹⁰Tüophei me Iye üte ngaowe i, “Tüolan kahta kenmong ükeng ne menge, iman na panne, hüyange iman mük müowe tamtüoh, tüokaiye iman-e ye-nge oklak yejema-a yejai oklak yejema-a shinge ye-oklak. Hüke yelingma-a, iman ü-tangte leih yene ok hüyange meiye tamne ngaikülak.”

¹¹Taowe tong, “Youngwanpa, hükih-e hipak hangshin laowe ngohlak?” Iye jan: “Chingnyulan heamme hüyange ükengne manmeng manmeng, noksalan me kahtalan yenangpe manlak manlak, kahmük wüngmakke yoi nying nyingke manwin manwin she:

¹²Youngwanpawe kahtalan üjaite shonne mantei mantei kahmük-a lanshe wüngmakke linge tamlak.

¹³Kahmük me kahta pen yo me sheja towe ngohyapoi, I-o menge winlak; I-a akke winyang phei longkhampee pejüng kih-e ngohlak.” (Pejüngte leppu-a Kahwang kahtalan jingne üla ükong wangpu.)