Read Konyak Naga ISAIA 60 Bible Online

ISAIA 60 - Konyak Naga bible

ISAIA 60

¹Lüotüoh, wangngai teetüoh, hangjingne nang wangngai phei ngohnang; hüyange Youngwanpa müktishiwa nang tangme ongteki.

²Hangjingne wangnyakke kahtoknyu-a küpyange ngohlak, hüyange wangnyak üjei-e kahtalante yüohlak. Hüpoi nang tangme-a Youngwanpa wangngai teeyange ngohlak; hüyange I ompu phihlangpu nang phei ngohlak.

³Jatlan-a nang wangngai tangte peilak; hüyange ahngpalan-a nangjingne ngaipu nyih ülate jemlak.

⁴Nang neikonne leihuyah hüyange hanghe ngainangki leitüoh! Nang kahtalan-a nokte yelak jingne jemnang! Nangjing shelalan-a üjai mepu peikülak; hüyange nangjing yhalalan-a nahalan kih-e yakme pailak.

⁵Hüwante nange tüolan-a ngelak hüyange mongmeipuwe maalak; Jamloi mongmeipuwe nanga ninlak. Jatlan jing moth nang tangte yah peilak; Yengching kaiye taiye ngohpu iman toinyu nanha peikülak.

⁶Udh ükhong üngange nang kahmük maalak, Midian hei Ephah udh ühalan-e; tüolan khongküm Sheba mepu peilak. Iman-e hon hei sü yahpeilak, hüyange Youngwanpa minyongpu jai ne tamlak.

⁷Kedar mepu nyeekhong khongküm nang shongte jemlak, hüyange Nebaioth nyeeponglan-e nang wongpongte phalak; tüolan-a ü-wümjong me yahpu oklak, hüyange Taowe ü-müktishiwa nok me müktishiwa tamlak.

⁸Tüolan yenglin wangphom kih-e popu, nokte leih yepu awshulan kih-e hanghe shi?

⁹Iman-a kahmük üjai mepu peipu yenglinlan, Kahwang kahtalan nokte yah yepulan. Iman-e hon hei khüm phei yah peinang; Youngwanpa min yihnoon tamlak jingne, Israel Üjao Kahwang, aowe jatlan khongkümpuwe yoi kahtalante yihnoon ne linge tam.

¹⁰“Eiha jatlan-e nangjing jantpenyulan linge yelak; hüyange iman ahngpalan-e nang shaoshanlak. Ü-mong shihpuwe Taowe nangte shaoshine tam, hüpoi sha-a Taowe nangte ümong hahpu hüyange shüpshe hüolak.

¹¹Nangjing petenlan-a hipak phe me epyange ngohlak; wangnyak wangngai tüolan-a yeküplak, tüokaiye jatlan ahngpalan-e imanjing moth nang tangte yah peilak.

¹²Hangjingne nang shao yeshanpu jat hei ahngchinglan mahlak; hatüowa jaosheye mah tamlak.”

¹³Lebanon müktishiwa, fir hei cypress hüyange yankhekpee nang tangte peilak, Ü-khümjing shemeiyaomawe linglak jingne, hüyange ü-yalokjing nyoi taowe müktishiwa tamlak.

¹⁴Aoyinne nangte shaoshi yatengne tamyangki tüolan hayimlan peikülak; Hüyange iman-e yihnoonpu hüowe khuhtawe khümlak. Hipak ja me aoyinne nangte nuwe teihyangki iman khongkümpuwe nang yashong me yoppe khümlak. Iman-e nangte “Youngwanpa Chingnyu” she, “Zion, Israel jing Üjao Kahwang Chingnyu,” she nyiklak.

¹⁵Nang shaaji winne hüyange nuwe, wüngwükke hüyange wüngmakke tüohpu chingnyu nanlei, Taowe nanga kheyonge hüyange shemeiyaomawe linge tamlak, jintokte jin hoongli mongongpu nyoi jing ja ne lingtamlak.

¹⁶Nange jatlan jing düamyeng yinglak, hüyange ahnghalan düam-e uhying phalak. Hüwante Tao Youngwanpawe nang yinne tamyangki she, nange shinge peilak. Hüke wongnangpu Jacob Kahwange nang lanne tam she shinglak.

¹⁷“Taowe nangte shakphan yan nanleiye hon yah peilak, Pee hüyange yan nanleiye khüm hei shakphan yan, hüyange long nanleiye yan yah peilak. Numante wanglam lampalan-e shaaji numante shaoshi yatengne yetamlak; Taowe iman khakshupupa hüyange chingmei phei wanglam lam ne tamlak.

¹⁸Yakphei lükpu wüng shaaji yejailak; mahtampuwe shaaji nang kahmük nishe wüngmakke linge tampu ye-oklak. Hüpoi nange nangjing jantpenyute Yinyetampa hüyange nangjing pejongte Minyongpu she nyiklak.”

¹⁹“Shaaji nyihning me wanghe-a nang wangngai ne yemenglak yejema-a wangnyak me nang wangngai ne linnyu wongpongne yejelak. Hüpoi, Tao Youngwanpa, jintepu nang wangngai ne menglak; Ü-müktishiwa wangngaiye nang tangme teelak.

²⁰Nang wanghe shaaji yenyüplak, yejema-a nang linnyu yoi nying nyingte yemahlak, hangjingne Youngwanpa-a nangjingne üküm yenangpu wangngai ne menglak.

²¹Nang kahtalan khongkümpuwe khakshupupa linglak, Hüyange jin jintepu jingne kahmük-a tünlak. Taowe iman deiye tam, Taowe iman linge ngaiyangki. Khongkümpute Tao kheyongpu ütahte ngailak jingne.

²²Numan sheshoipupa hüyange nyim shemeipupa noksa nehoi wong shenangpupa jatnyu ne menglak. Aope khakshupu hipak ngoilakei, Taowe tüopa mamshe ngaine tamlak; Taowa Youngwanpa!”