Read Konyak Naga ISAIA 61 Bible Online

ISAIA 61 - Konyak Naga bible

ISAIA 61

¹Youngwanpa Kahwang Yahawe üte maawe tamnang. Hangjingne toihalante ngaolan ümei nyüotamlak jingne, Youngwanpawe tao minnga phowe letam. Mongjang paiye ngohpalan meitamlak jingne, Phowe angpalan lantampu pongtamlak jingne, Hüyange aoyin küpnok me ngoh tüolan lantamlak jingne tao shon.

²Youngwanpa mongmeipu wangpeng pongtamlak, hüyange teman Kahwang phuh-hahpu nyih pongtamlak jingne, mangshappalan khongküm toloimeitamlak jingne;

³Zion me aoyin mangshap paotüklak jingne, imante vünla nanlei-e jupengyük phalak jingne, mangshappu nanlei mongmei minnga, towenyai-e ngohpu yaha nanlei minyongpu oleng phalak. Imante khakshupupa longkhampee she, I müktishiwa hüolak jingne Youngwanpawe dei she nyiklak.

⁴Iman-e üshongwante heamteiye angpu linge yelak; üshongwante wüngmakke tüoyangpu-a iman-e linge yelak. Jin nangjange winne tüohpu, hüyange winne angpu chingnyulan iman-e linge yelak.

⁵Heangchinglan yonglak hüyange nangjing nyeelan uhyinglak; yinpalan-e numan kah hamlak hüyange numan jing wuwünglick ngütlak.

⁶Hüpoi numan-a Youngwanpa jing ngengpalan she, numan-a teman Kahwang shaoshanpalan she shinglak. Numan-e jatlan jing moth tangme mongmeilak, hüyange iman hak-hepu-a numan jing she otalak.

⁷Iman wüotüopu nanlei, ü-kahtalan-e üphong ni meitam tüolak; hüyange teelayangpu nanlei iman mothlei me iman mongmeilak; tüokhei iman kahmük me iman-e üphong ni nyei-e mothleilak, hüyange iman me jin jinte mongmeipu ngohlak.

⁸Youngwanpawe inang, “Taowe ngaotingpate kennang hüyange shaoshi yatengne tampu hüyange toilangpute nu nang.” Taowe ü-kahtalante ngaoting iye khintak phalak Hüyange iman phei jinte üküm yenangpu jiengjeppu linglak.

⁹Iman jing huhayim jatlan yo me, hüyange imanjing üli-üla kahtalan yo me shing peilak. Iman ngepu khongkümpuwe hüke iman Youngwanpawe moimanpu üli she iman shinglak.

¹⁰Tao Youngwanpa me yeonge mongmeilak, ü-yahawe ü-Kahwang te mongmei shei-e ngohlak; hangjingne Iye tao yinyepu nyemo phei innetam; Nyemthepawe yoi nying nyingke nyemowe wangshüm phei o-pu kih-e, hüyange nyemnyanyuwe yoi nying nyingke juyük ümei yahpu kih-e, Iye tao Üjaopa olenge yüohyange ngohnang.

¹¹Hangjingne kahtok-e yoi me nyin-ngai ne tam nang, hüyange pesha me deipulan phao nyim-ngaipu kih-e, tüokih-e Youngwanpa Kahwange jat khongkümpu tangme khakshupu hüyange minyongpu ngaine tamlak.