Read Konyak Naga ISAIA 63 Bible Online

ISAIA 63 - Konyak Naga bible

ISAIA 63

¹“Edom mepu Bozrah chingnyu mepu peiküpu hatüo ao shi? Jamloi she phihlange ütak o-yange, ünganwong hei wong üyong phei kemme peiküpu hatüo ao shi?” “Hatüowa Tao, yinlak jingne wongnang puphei Iye okpu ngepu shingne tamlak jingne peinang.”

²“Hangne nangjing inkhek-a wuwünglick wuwüngti ne phütte lingpa kahta ja kih-e taakke nangpu?”

³“Jatlan-a Taowe wuwünglick kih-e ngütte tamnang, hüyange üte jamlak jingne ao-o yepei. Ümong shihpu phei Taowe iman ngütte tam, hüyange iman iy ü-inkheklan khongkümpute phowe tam.

⁴Ü-kahtalan yintamlak hipak peiteki she Taowe tüm; hatüowa iman wepalante phuh-hahlak hipak.

⁵Taowe leiye pong hüyange üte jamlak ao-o yenang she Taowe nge, Tao yashan. Hüpoi ümong shihpuwe üte wongnangne tam, hüyange ü-nying nyingke okpuwa ngeyangki.

⁶Ümong shihpuwe jatlan khongkümpu ngütte tam hüyange iman küppe ang. Iman jing üyin iy kahtokte Taowe shokke tam.”

⁷Youngwanpawe yelakpe kenpu jeng taowe ngaolak; Youngwanpawe teman jingne lingyangpu khongkümpu jingne taowe Ite yihlupu pha nang. I shüpshe hüyange yelakpe kenpu jingne Iye Israel kahtalante wangmanne moiman yangki.

⁸Youngwanpawe iyangki, Iman-a ü-kahtalan; iman-e üte lowelamme yetamlak. Tüokhei Iye iman

⁹shangpongpu üshei mepu iman yinne tam. Hatüowa wangdang shongmokpa ne yeje, hüpoi Youngwanpa Iye iman yinne tam. Lintepu hipak üshei me Iye imante paowetük;

¹⁰hüpoi iman-e I phei tüi-e hokkewe hüyange Ijing Yaha Üjao mongmengpuwe maawe tam. Tüokhei Youngwanpa-a iman wepa ne meng hüyange iman phei tüi-e hokke pei.

¹¹Tüoyangpoi iman-e lintepu hipak teihtüoh, Youngwanpa shaoshanpa, Mosa nyih hipak, hüyange iman-e tong- “Sha-a Youngwanpa ümeken me ngoh nangki? Aowe yoi kahtalantepu üjupalan yengching mepu yinne tam? Youngwanpa ümeken me ngohnangki, aowe yoi Yaha Üjao Mosate pha?

¹²Aowe yoi ünganwonge Mosa kaiye toinyu ling, yengching yeng ni ne tange, hüyange yeng ülu kaiye yoi kahtalan woiye tei, yoi jingne jinte üküm yenangpu minyong ngampai anglak jingne!”

¹³Aowe iman shelupupa kaiye woi, iman-a phao koiponglan kih-e ütingpa ya ükeng phei, hüyange iman aope-o yashah yehüo.

¹⁴Ühak pheipu kahjeete mahulan woipu kih-e, tüokih-e Youngwanpa yahawe yoi kahtalante toloimei pha. Iye yoi kahtalan woi hüyange yoi min yihnoonpu yahpei.

¹⁵Youngwanpa, wangdang mepu tomante leiye taipha, ümeken me nang üjaopa me hüyange müktishiwapu phei nang ngohnang. Toman jingne nange yeonge mongshange teihpuwa ümeken me ngohnangki? Nang ünganwong ümeken me ngohnangki? Nange kenpu hüyange yayeng shüpsheye teihpu ümeken me ngohnangki? Tomante ye-i-yeshepe tahling.

¹⁶Nanga toman üpa. Tomanjing pajeiyonglan Abraham hüyange Jacob-e toman yeteih tüoyapoi, hüpoi nang, Youngwanpa-a toman üpa, aowe hipak phe me toman yinne tam.

¹⁷Hangne nange toman-a nang lamnyu mepu yanne taine tamnangki? Nang mepu toman lüppe yelak ne hangne nange toman üngei ne menge tampu? Aoyinne nang shaoshan tüolan jingne, aoyin hipak phe me nangjing ne ngoh, tüolan kahta jing ne, leih yekei.

¹⁸Toman, nangjing üjao kahtalan-a hipak ütenjapu jingne toman wepalan-e jangetei; iman-e nang üjao nyoi-a yalokke tam.

¹⁹Nang toman wanglam lampa ne aope-o yejepu kih-e, toman-a nang kahtalan ne aope-o yejeyangpu kih-e nange tomante jon.