Read Konyak Naga ISAIA 64 Bible Online

ISAIA 64 - Konyak Naga bible

ISAIA 64

¹Hangne nange wangdang tamme shonge hitte yetampu hüyange hangne yeyupu? Kahtanglan-e nang ngelak hüyange nyampu phei polak.

²Vün üsheamme yeng hokpu kih-e iman ninlak. Yukei hüyange nang wepalante nang ünganwong ütahte ngaitüoh, hüyange nang peipuwe jatlan ninne tamtüoh!

³Hipak ja ngohyangki aope nang pei hüyange toman-e yeteihtüope ngohwante nange nyamnyam shepu toi ling: kahtanglan-e nang nge hüyange nyampuwe poyangki.

⁴Nang kihpu Kahwang ao-o aope-o jeje mannge yejema-a yejai, aowe aoyinne iman ütinglakpu nang me ang hükihpu toi ling.

⁵Aowe hanghe ütingpa tüopa linge mongmei tüo tüolante nange nyik, aoyinne nange hangke iman ngohne tamhu teihtüopu lante! Nange tomante mongmeng, hüpoi toman-e yelakpe ünu ling, üshong wante muh nange yeonge yonge mongmengpu ngohjang ngoh-e toman-e yelakpe yeshupu lingpu ngoh yangki;

⁶Toman khongkümpu ünu ne ngoh; shemeipupa ne lingpu toman toishaowa yeshupu shaha me ngohyangki. Toman ünulan kaiye toman-a kuiye mahtepu peyaklan kih-e hüyange wangyange puwe teiyangpu kih-e ngohyangki.

⁷Nangte yoppe towe ao-o yepei; jampu yamme ao-o nang tangte yetai. Toman mepu nang nying nyingke nang lowe ngoh hüyange toman ünu jingne toman winne tüoh yangki.

⁸Hüpoi Youngwanpa, nanga toman üpa. Toman-a kümp kahtok kih-e, hüyange nanga tük yaopa. Nang yakke toman linge ngai;

⁹Tüokhei tomante jamloi mongshih tahngaikei yejema-a jin jintepu jingne toman ünulan tükyange tahngoh kei. Toman-a nang kahtalan, tomante shüpshe pha.

¹⁰Nangjing üjao chingnyulan-a wanwüng jeng kih-e; Jerusalem-a wanwüngjengne heamteki.

¹¹Toman khümjing, üjao nyoi hüyange shemeiyaomapu nyoi, ümeken me toman pajeiyonglan-e nangte yihlupu pha, vün kaiye menge winyangki, toman-e kenne teihpu nyoijinglan lili heamteki.

¹²Youngwanpa, tüolan khongkümpuwe nanga pone yetam pu a? Nange hango yelingtamlak, hüyange toman-e nün oklak phei nyeiye toman shangne yetamlak a?