Read Konyak Naga ISAIA 65 Bible Online

ISAIA 65 - Konyak Naga bible

ISAIA 65

¹“Ü-kahtalan-e yoppute janlak jingne Tao tümyange ngoh, hüpoi iman-e yeyop. Imante Tao tüowe tamlak jingne Tao tümyange ngoh, hüpoi iman-e ngange nehoi yenyüo. Hipak phe me Taowe janlak jingne tümyange. ‘Tao tüome ngohnang; Taowe nangte janpha ning’ she ngohyapoi, jat nopuwe üte yeyop.

²Aoyinne üngei ne menge hanghe yeshupu ngoh tüopa ling hüyange iman-e mongpu shaha me kemme tai, ü-kahtalan yahlak jingne Tao hipak phe me tümyange ngoh yangki.

³Wüolakpa ne iman-e yelakpe üte mongshih ngaine tamme ngohnang. Iman-e ülao kahwanglante toidopu pha nang hüyange ülao kahwanglan wümjonglan me sünyet jak nang;

⁴wangnyak me iman litepu yahalan phei teingaolak jingne kahsa hüyange mangkoksalante tainang. Iman-e akmei hahnang hüyange, ülao kahwanglante toidopu meimepu hoiyeng yingnang.

⁵Hüyange iman-e ülaolante inang, ‘Toman mepu yanne ngohtepha; numan-e letlak jingne toman-a jamloi üjaolan ngohnang!’ Hükihpu kahtalan shaome Tao yongne ye-ok, iman phei tüi-e ümong shihpuwa aope-o yemei okpu vün kih-e ngohlak.

⁶Imante shaoshi yateng phalak Taowe shaaji tümme shoteki, hüyange imante ümeng phalakpa nyanteki. Iman-e hanghe lingyangki Taowe linne yetüohlak, hüpoi imanjing ünulan jingne,

⁷hüyange iman pajeiyonglan ünu jingne imante leih phalak. Iman-e ülao jat kahwanglan kahtang yinme sünyet jakyangki hüyange üte yemeipe ngaoyangki. Tüokhei iman-e lingyangpu lintepu toishao phei shuwe Taowe imante shaoshi yateng ne tamlak.”

⁸Youngwanpawe inang, “Aowe-o wuwünglick ümei menge yewin; hüleima tüolan phei iman-e wuwüngti ling ngainang. Taowe-o ü-kahtalan mahne yetamlak, aoyinne ü-shaoshan Taowe yinlak.

⁹Jacob hayimlan aoyin Judah jat mepu ne meng Taowe moimanlak, hüyange iman huhayimlan-e üjing phaotang kahmüklan moth leilak. Leyangpu ü-kahtalan, aoyinne ü-shaoshan, tüoken me ngohlak.

¹⁰Iman-e üte yoppekhümlak hüyange henyip yekao me Sharon kahjee hüyange heongye me Shangpu kahjee heeijong lan me iman jing nyee hüyange mahulan woilak.

¹¹Hüpoi numan-e Tao winne tüohyange, Ü-üjao kahtang Zionte ye-i-yeshepe ling, hüyange ngoikülak yatuhshao leipu kahwanglante yoppe khümma-a tüopa yoi yoi ne ngohkülak.

¹²Yakphei teilükke lipu me lilaka numan jing ngoikülak yatuhshao ne menglak; hangjingne ima-a aope Taowe numante nyikyapeih numan-e yejan yejema-a aope Taowe ngaoyapeih yejai. Numan-e ü-ngao yejaine hüyange ümengpa linglak jingne leyah.”

¹³Tüojingne wongnangpu Youngwanpawe tüo inang, “Aoyinne üte yoppekhüm hüyange ü-ngao jai iman-e hahlak jingne hüyange yinglak jingne wangmanne tüolak; hüpoi numan-a seanyaolak, hüyange yenglelak. Iman-a mongmeilak, hüpoi numan-a mongmenglak.

¹⁴Ü-shaoshanpalan mongmeipuwe hem loklak, hüpoi numan-a mongjang paipu phei shaplak.

¹⁵Leyangpu kahtalan-e numan min-a phoiwümpu ja ne jonlak. Tao, Okkeshangpu Youngwanpawe numan li ne tamlak. Hüpoi aoyinne ü-ngao jai imante Taowe ülao min ja phalak.

¹⁶Kahmük mepu aoyinne moiman jingne tonglakei ütingpa Kahwange moimanlak jingne tonglak. Aoyinne jiengjeppu yahlakei Ütingpa Kahwang min me janpu yahlak. Lintepu hipak shaoshipulan-a linne tailak hüyange pemahlak.”

¹⁷Youngwanpawe inang, “Taowe kahtok üla ja hüyange wangdanglan üla lingnang. Lintepu hipak me ngaiyangpulan Taowe lanshe pemeilak.

¹⁸Hüpoi Taowe hanghe lingengai nang tüopa me jinte mongong tüoh hüyange mongmei tüoh. Taowe linglak üla Jerusalem-a mongmeipuwe maawe ngohlak, hüyange tüopa mepu kahtalan mongmeilak.

¹⁹Jerusalem hüyange yha me ngohpu kahtalan jingne Tao ü-nying nyingke mongong monglepuwe maawe ngohlak. Tüoken me mangshappu yengohlak, jamlak jingne nyikpu yenanglak.

²⁰Nahalan naotakha me shaaji yelilak, hüyange kahtalan khongkümpu iman üyin jin laowe ngohlak. Aoyin wangpeng gho ja ngohlakei naha kih-e teihlak. Wang gho ja manngoipe lipune mengma, hatüowa imante Taowe shangne tampu füo ja ne ngohlak.

²¹Kahtalan-e nok welak hüyange tüolan me iman nying nyingke ngohlak, iman-e wuwüngkah deilak hüyange tüolan ülick hahlak.

²²Shaaji ülaolan ngohlak ne iman-e yewelak; ülaolan-e hahlakne iman-e yedeilak; hangjingne pee jin nyih kih-e ü-kahtalan jin ngohlak, hüyange iman yakke lingngaipu toishao taowe le-ngaipalan-e üküm ngoi-e yahlak.

²³Iman-e lingpu toishao-a okpu ngelak, hüyange iman hayimlan-e limahpu yehüolak. Ngoikülak hipak khongkümpu jingne Youngwanpawe iman huhayimlante moimanlak.

²⁴Iman-e mannyikwante taowe janlak, iman-e ngaowe ngohwante taowe jailak.

²⁵Sholan hei nyeehalan jamme hahyinglak; mahuwe hahpu kih-e mailange tahjan hahlak, hüyange puwa shaaji ütuh ne yemenglak. Zion, Ü-üjaopa kahtang me, yemeilakpa yejema-a ümengpa shaaji yengohlak,” she Youngwanpawe inang.