Read Konyak Naga ISAIA 66 Bible Online

ISAIA 66 - Konyak Naga bible

ISAIA 66

¹Youngwanpawe inang, “Wangdanga ü-ahngpa shotjing, hüyange kahtoknyuwa ü-yashopjing. Hüma-a hangkihpu nok nange ü-jingne welak, hangkihpu nyoi me Tao ngohlak jingne linglak?

²Kah-hei wang nopu Taowe ü-nying nyingke linge ngai! Aoyin innenyai hüyange monglüp, aoyinne üte nyam hüyange ü-ngao jai, iman jingne Taowa moiman.

³“Kahtalan-e imante meipupa kih-e ling. Iman-e dolak jingne mahu üpong toipu hei yejema-a kahta toidopu ni-a iman jingne-a ja ne hei meng; iman-e nyee üha toidopu hei kuilapa üngte wetpu; iman-e tahlick phayahpu heiya yejema-a ak iy phayapeih; iman-e sünyet jakke doyapu heiya yejema-a peshaote yopyapeih tüolan khongkümpu iman jingne ja ja nehei meng. Iman-e lingengaipu yoppe khümpute monghah yangki.

⁴Tüokhei Taowe iman tangme mahtampupa yahpeilak, hanghe jingne iman yeonge nyamnang, hangjingne ima-a aope Taowe nyikyapeih, aowe-o yejan yejema-a aope Taowe ngaoyapeih yejai. Iman-e üte ngao yejailak jingne hüyange ümengpa linglak jingne leyah.”

⁵Youngwanpawe hanghe iyapeih jaiyah, numan Ite nyampalan hüyange Ite ngaojaipalan: “Numan-e üte ütinglakpu jingne, numan kahtalan ütamme muh numante nunang hüyange numan phei hango linglak ne yenang. Iman-e numante phoiwümnang hüyange inang, ‘Youngwanpawe I kheyongpu hüone tamtüoh hüyange numan yinne tamtüoh, hümme nakshih numan hoonglimong ongpu toman-e ngene ok.’ Hüpoi iman yoi nying nyingke mongmengpu ngohlak!

⁶“Jaihuyah! Chingnyu me üngwünpu üyong, hatüowa khümjing me ngaipu wüng, hatüowa I wepalante Youngwanpawe shaoshiyateng ne tampu wüng!”

⁷“Yhawe wangngai ngene shaoshi shao me, yhawe moipaiteki. Yhate dak-e peishao me, yhawe naoshe ja puhtamteki.

⁸Aoheye hükihpu jaitepu shi? Aoheye hükihpu ngetepu shi? Nyih ja me kahmük ja puhpu oklak a? Yejema-a lanshe jat ja ütenja mongme ngaitampu oklak a? Tüoyangpoi Zion nao wangngai nge ne dakpu phei jam she yhawe yoi hayimlan puhtam.

⁹Taowe ü-kahtalan puhtamlak nyoi ngoiye yah peiyang phei me iman puh-e yetamkülak she tah teih,” Youngwanpawe ngaoyangki.

¹⁰Jerusalem phei mongong tüoh; yha jingne mongmei tüoh, yhate kenpu numan üshei! Yha phei sha-a mongong tüoh, yha jingne shappe yoong yangpu numan üshei!

¹¹Hüke yha toloimeitampu düam mepu numan-e maawe hüplak; hüyange numan-e düam mongme huwe hüppe, yha müktishiwa jakuh mepuwe mongme hulak.

¹²Youngwanpawe inang, “Taowe nangte üküm yenangpu jalunpu yah peilak; jatlan mepu toinyu nanha aope-o yejüp ye-eapu yengyin kih-e nang tangte yünne peilak. Nanga naha ja yoi nyu yak me paiyange namnowe jonnepaipu kih-e hüyange kenpu phei uhyingpu kih-e ngohlak.

¹³Inyuwe yoiha toloimeine tampu kih-e, Taowe Jerusalem me nang toloimei tamlak.

¹⁴Aope nange tüolan ngaipu ngelakei, nang mongmeilak; tüopawe nanga wongnangne hüyange pümheita wangne tamlak. Hüwante Tao, Youngwanpawe aoyinne ü-ngao jai, tüolante jamnang she, hüyange Taowe ü-wepalan phei tüi-e mongshih ngaipu hüowetam nang she numan-e shinglak.”

¹⁵Youngwanpa vün phei peikülak; hüyange I pongtongtoi me waishih wangkhah kih-e, aoyinte Iye mongshih ngai tüolante shaoshi phalak jingne vünloong phei peilak.

¹⁶Vün hüyange yanglow kaiye kahtoknyu kahtalan khongküm aoyin Iye yeshupe nge tüolante Iye shaoshi phalak, hüyange üngang li ne tamlak.

¹⁷Youngwanpawe inang, “Ülao jatlan kahwangte yoppe khümlak jingne aoyin yoi nying nyingke jaowe sha, khümme wümpu peshalante aoyin khüng lenge tai, hüyange aoyinne akmei hüyange yuh hah hüyange ülao nuweshakpu hahying hah, tüolan jingne üküm owe peinang.

¹⁸“Iman juteih hüyange iman toishaolan Taowe shingnang. Jatlan üshei mepu kahtalan khongküm shaijemlak jingne Tao peinang. Aope iman jamme jemlakei, ü-üngan wonge hanghe lingpu ok iman-e ngelak;

¹⁹hüyange aowe imante shaoshiyateng phanang tüopa-a Tao she shinglak. “Hüpoi Taowe iman ütam yinne anglak hüyange kahmük üjailan ümeken me ü-jeng manjai yejema-a Tao kheyongpu hüyange ü-ünganwong mannge tüolan jat tangte iman shonlak. Spainte, Libyate hüyange Lidiate, wongnangpu wenglah pheipu kahtalan phei, hüyange Tubal hüyange Greecete shonlak. Tüolan jat yo me iman-e Tao kheyongpu ponge tamlak.

²⁰Iman-e jatlan mepu numan pheipu jat hei lilan üshei üte hünghao ja ne teih yah yelak. Iman-e iman-a ü-üjao kahtang Jerusalem te koiponglan me, lwngkoi lan me, hüyange udh hei pongtongtoilan hüyange tongtoilan me, Israellan-e dolak pelick weanglick, tümme tawe jaowe shayange khümjing te yah peipu kih-e iman-e yah peilak.

²¹Hüwante Taowe iman yo me ütam-a ngengpalan-ne hüyange Levilan-ne linge tamlak.”

²²“Kahtoknyu üla hüyange wangdanglan üla ü-ünganwong kaiye hangke linge ang, tüo meimei kih-e, numan huhayimlan hüyange numan min linge anglak.

²³Lela mopu lep iye hüyange Sabbath phe me, jat lili mepu kahtalan üte yoppe khümne Jerusalem hatüo me peilak,” she Youngwanpawe inang.

²⁴“Iman yayonge taiwante, aoyinne ü-phei tüi-e hokke weyangki tüolan lipu mang ngelak. Iman hahpu yong aope-o yelilak, hüyange iman sheakpu vün aope-o yemeilak. Kahtanyuha üsheite iman ngepuwa dak ne menglak.”