Read Konyak Naga ISAIA 7 Bible Online

ISAIA 7 - Konyak Naga bible

ISAIA 7

¹Aope Jotham üha hüyange Uzziah ühu Ahngpa Ahazwe Judah me wanglam lamyapeih, wehok ngai. Aram ahngpa Rezin, hüyange Israel ahngpa Remaliah üha Pekah-e Jerusalem phei tüi-e yong; hüpoi tüopa lanshe yahpu ye-ok.

²Aope David nokphonge Aramlan Ephraim phei ja ne teishinteki she jai, Ahaz mongjang hüyange I jing kahtalan mongjang, wangyange shungwante popu phao pee kih-e nin.

³Hüwante Youngwanpawe Isaiate ngaowe i, “Nangha Shear Jashub woiyah, hüyange Ahngpa Ahaz phei hüone taitüoh; Nange I-a ütangpa yengnung lam taipu ükümpong, ümeken lamnyu me inkhek takpalan-e toi lingnang tüoken me hüolak.

⁴Ite, ‘Kentinge, jünge ngohyah, hüyange ye-nyamlak yejema-a mong yeshanglak jingne itüoh. Ahngpa Rezin hei Ijing Aramlan hüyange ahngpa Pekah iman-a vün pheipu vüntong kihpu hei, imante nyamlak hango yenang.’

⁵Hangjingne Aram Ephraim phei hüyange Remaliah üha omyange nang phei tüi-e ümeng tümyange inang,

⁶‘Judah phei tüi-e teman onghah, hüyange Jerusalem phüntamyange teman-e teman jingne chinghah hah, tüophei me Tabul üha ahngne mengtam hah.’

⁷Tüokhei Youngwanpa Kahwange hüke inang: “Hatüowa okpu ye-ngelak, hüyange hüke yengailak.

⁸Hangjingne Aram üshanga Damascus, hüyange Damascus üshanga Rezin ngohnang. Wangpeng dewok me nga mongme Ephraim jat ja she yemenglak ne khoihnyai-e mengtamlak.

⁹Ephraim üshanga Samaria, hüyange Samaria üshanga Remaliah üha hei ngohnang. Numan ütinglakpu me mongju-onge yeyongma-a, üting me hatüowa numan lomohlak.”

¹⁰Üne-o Youngwanpawe Ahazte hüke ngao:

¹¹“Nang Kahwang Youngwanpate nangte füo ja yahkei she tongtüoh. Hatüowa yimching shelupupa mepu ne mengne ok yejema-a wangdang ütangpa mepu jene ok.”

¹²Hüpoi Ahazwe janne i, “Füo jingne taowe yetonglak. Youngwanpate taowe tokpu minpha.”

¹³Tüopa ngaote Isaiawe jan, “Ahngpa David huhayim, sha-a jaiyah. Kahta mepu nün-okpu kilak-a nang jingne khakwange yemeipu, Kahwangpawe nün okpu-o nange yahlak yeje a?

¹⁴Tüokhei Youngwanpa Iye numante füo ja yaphalak: Sheko yha ja aowe püm yekengpe ngohyapeih netan moi ja pailak hüyange Ite ‘Immanuel’ she minlak.

¹⁵Iye yoi nying nyingke ümeng ümei shinge lwngmei ne menge peiwante, kahtalan-e düamyeng yinglak hüyange zahtai hahlak.

¹⁶Tüopa nyih hipak peishao memuh, tüolan ahngpa ni aoyinne numante nyamshao iman kahmük-a ükengne menge tamlak.

¹⁷Youngwanpa numan tangme, numan kahtalan tangme, hüyange ahngnok phong khongkümpu tangme Judah mepu Israel ahngching yanphei me peipu shaoshi üshei yo me shemengpu yah peilak, Iye Assyria ahngpa yah peikülak.”

¹⁸Tüopa nyih me, Youngwanpawe heongye Nile yengtuh yekao mepu Egyptlan hoi kih-e üngang peilak jingne, hüyange iman kahmük mepu shangtak nyahnyu shinne Assyrialan peilak jingne füojai ngaolak.

¹⁹Iman shemengpu kahjeelan me pahlak, hüyange iman-e ühuh pheipu phümtüm lili hüyange heeijong lili me maalak.

²⁰Tüopa nyih me, Youngwanpawe Euphrates kaiye ngohpu mepu shanglinpalan nanpheng lak, Assyria ahngpa! Hüyange Iye numan jumin, hüyange numan shangmepu shangmin hüyange numan püm mepu üminlan linne winlak.

²¹Tüopa nyih me, kah hampa jawe nehoi mahu üha ja hüyange youn ni she yinpu oklak,

²²tüolan-e düamyeng üngang phalak tüokaiye I wongpong üshei lanlak. Üting, kahmük me üjingha towe yinpulan-e hahlak jingne düamyeng zahtai tüolak.

²³Tüopa nyih me, shemeipupa wuwüngkah jaja me wuwüngwu haja pong hüyange jaja te khüm ngin haja shangpuwa, huhwu hüyange phao jupenge shümme mahlak.

²⁴Tüokente kahtalan wenglah hüyange lahhan phei meikep ne peilak. Üting, kahmük nopume phao jupeng hüyange huh wuwe maalak.

²⁵Kahtanglan khongkümpu ümeken nyoi me ülick lickke ngoh, huhwuwe maalak tüokaiye aohi-o tüolan nyoite peipu ye-oklak; Tüopa-a mahulan hei nyee ükhonge heeihahpu nyoijing ja ne menglak.