Read Konyak Naga ISAIA 8 Bible Online

ISAIA 8 - Konyak Naga bible

ISAIA 8

¹Youngwanpawe üte i, “Longsheng ükhao ja yayah hüyange tüopa tangme aikek üyong phei hüke nyantüoh: ‘Mamshe-Lükkeyah, Nyieyahpupa-Shephet’ .

²Ütinglakke oklak kahta ni Uriah ngengpa hüyange Jeberechiah üha Zekharia saki phalak jingne yahtüoh.”

³Hüyange tao hinyu tangte ong, hüyange yha püm yekengpe ngai. Aope toman üha puh, Youngwanpawe üte i, “Ite Mamshe Lükkeyah, Nyieyahpupa Shephet, she mintüoh;

⁴hangjingne naha jonge ‘Onyu’ hüyange ‘Opa’ she mannyik okpe, Damascus moth khongküm hüyange Samaria mepu nyieyahpu lili Assyria ahngpawe yah tailak.”

⁵Youngwanpawe üne-o ü-phei ngao.

⁶Iye i, “Hangjingne tüolan kahtalan-e Shiloah shaoyin mepu jünge yünne tapu yeng yeyahtepuwe, hüyange ahngpa Rezin hei Ahngpa Pekah shaome nintepuwe,

⁷Tao, Youngwanpawe Judah chinghahlak jingne Assyria ahngpa hüyange I kahtalan khongküm yahpeilak. Iman Euphrates yengyin tüopa yengnah khongkümpute faiye yünne muleampu shinne peilak.

⁸Iman-e muleampu kih-e Judah tangme, phaktang ngoiye daowe heyange sheminlamphe te yüowe ongpu kih-e moiteilak.” Kahwang teman phei ngohnang! (O Immanuel) I yangteng saapuwe kahmük-a jongwannang.

⁹Numan jatlan, nyampu phei jamme jemtüoh! Jaiyah, numan kahtoknyu üjai me ngohpalan. Ponglak jingne tümyah, hüpoi nyamyah! Üting, tümyah, hüpoi nyamyah!

¹⁰Numan-e teihpu tümtüoh! Hüpoi tüolan-a aope-o okpu ye-ngelak. Numan-e lengpu shinne ngaotüoh, hüpoi tüolan khongkümpu jajang japu, hangjingne Kahwang toman phei ngohnang.

¹¹I wong üyong puphei Youngwanpawe hanghepa lam me kahtalan kemnang tüopa me yewoilak jingne üte deingao pha, Iye i.

¹²“Kahtalan-e tümtapu me tah om hüyange iman nyampu toilamte tahnyam.

¹³Hatüo teihtüoyah, Tao, Ütahpa Youngwanpa, Taowa üjao, nang nyamlakpa-a Tao.

¹⁴Tao nyamlakpa ne üjaopa ne, mengpu jingne Taowa kahtalan yashah hüopu long ja leye ngohnang; Taowa Judah hüyange Israel ahngchinglan kahta hüyange Jerusalem kahtalan pholak tün ja leye ngohnang.

¹⁵Üngang yashah hüolak; iman yeilak hüyange yemeipe mahlak. Iman tün me pholak.”

¹⁶Numan, ü-pinlan-e Kahwange üte phapu ngaolan tükke anglak hüyange yomlak ngohnang.

¹⁷Youngwanpawe I nying nyingke yoi kahtalan mepu lonang, hüpoi taowe Ite üting laknang hüyange, ümonghümpu I me angnang.

¹⁸Hatüome Youngwanpawe üte phapu nahalan phei tao ngohnang. Ütahpa Youngwanpa, ao ahngpa shotjing Zion kahtang me ngohnang, tüopawe Israel kahtalan tangte üyin ngaolan ne toman shon.

¹⁹Hüpoi kahtalan-e nangte yaknyanleipalan hüyange phonglai hipalan aoyinne okkeshange ngaolak ngohnang tüolante tonglak jingne iphalak. Iman-e ilak, “Tüophei ma-a, ngaolan jingne kahtalan-e yahalante tonglak yang hüyange üyin me ngohpalan phei tonge leilakyang.”

²⁰Nange imante hüke janlak yang, “Youngwanpawe numante hanghe nyüonang jaiyah! Phonglai hipalan ngao tahjai, iman-e numante hanghe iyapeih tüowe numante hang ümei-o yelinglak.”

²¹Kahtalan kahmük neikonne mongshang mongmenge hüyange seanyaowe kemlak. Iman seanyaopuwe hüyange iman mongshihpuwe iman-e iman ahngpa hüyange iman Kahwangte phoilak. Iman-e wang yekaote nganne leine ok,

²²yejema-a kahtok yekaote tinge leilak, hüpoi iman-e hango ye-ngelak hüpoi shangshih hei wangnyak hanghe te iman jange teitamnang tüo hei ngelak.