Read Konyak Naga ISAIA 9 Bible Online

ISAIA 9 - Konyak Naga bible

ISAIA 9

¹Hüpoi aoyin mongshangpu phei ngoh tüolan jingne shaaji mongshangpu yengohlak. Kahmük mepu Zebulun hüyange Naphtali jatlan hipak ja me mongmenge tam, hüpoi ngoikülak-e tüopa nyoilante, Mediterranean heongye mepu Jordan jayekao kahmük ngoiye, hüyange Galilee nehoi ngoiye, ümeken me kahhenglan nyoi tüopa kahmükte yihnoonpu yahpeilak.

²Kahtalan aoyin wangnyak me kemyapeih wangngai üyong ngeteki. Iman wangnyak yashüm kahmük me nyoi, hüpoi sha-a imante wangngai tee-nang.

³Nange imante mongmei üyong phateki, Youngwanpa; nange iman mongmei, linge tam. Nange hanghepa lingetam tüopa me iman mongmei, aope kahtalan-e iman tah yahyalakei yejema-a ompu moth tamyalakei hüwante mongmeipu kih-e mongmei.

⁴Hangjingne iman hangkiyih ne mengpu sheam, hüyange iman phaktang me ngohpu peshüm nange menge win. Üshongwante nange Midian nyahponglan naowe tampu kih-e, nang kahtalante shaoshi tampu hüyange leihkheih tampu jatlan nange naowe tamteki.

⁵Hangjingne shapju me yalokyangpu naomeilan jing yashom lili, hüyange iy me lüpyangpu nyemo lili vün me hanne menge jaklak.

⁶Hangjingne temante naha ja puh ngoh nang! Temante netan naha ja phawe ngohnang! Hüyange wanglam lampuwa I phaktang me ngohlak, hüyange I min-a hüke nyiklak. “Yashanyali Nyüoweleipa,” “Ütahpa Kahwang,” “Üküm yenangpu Üpa,” “Chingmei Ahngha,” she nyiklak.

⁷I ahngching wong yelakpe jonglak; I ahngching jinte chingmei me ngohlak. Sha-a me wange üküm hipak ngoiye ütingpa hüyange khakshupu me I wong angyange, David Ahngpa nanleipa ja ne Iye wanglam lamlak. Ütahpa Youngwanpawe tüolan khongküm linglak jingne mongteki.

⁸Youngwanpawe Israel ahngching Jacob huhayimlante ngaophünpu phalak ngao phateki.

⁹Israel kahtalan khongküm, Samaria chingnyu me aoyin ngoh moilan-e hatüowa Iye lingyangki she shinglak. Sha-a iman ota-nang hüyange jamloi nang. Iman-e inang.

¹⁰“Jaklonge wepu longnok-a toitakei, hüpoi toman-e tüolan-a long ümei phei welak. Yengphuk pee püangpeam phakke yeiteki, hüpoi toman-e tüolan-a shemeipupa cedar phei leih linglak.”

¹¹Tüokhei iman chinghah tamlak jingne Youngwanpawe imanjing wepalante hengetam teki.

¹²Heong ye me Aramlan hüyange henyip yeme Philistia she Israel lünge tailak jingne iman ju kateki. Tüoyangpoi Youngwanpa mongshih ngaipuwa ükümne yeje; shaoshi phatamlak jingne I yak yelakpe noyange ngohnang.

¹³Israel kahtalan mong yelüp; Ütahpa Youngwanpawe imante shaoshi phaya peyoi, I tangte iman lüppe üye.

¹⁴Nyih ja mongme Youngwanpawe Israel woipalan hüyange iman kahtalante shaoshi phalak; Iye iman ünyei hüyange üshang lange wintamlak.

¹⁵Wupa hüyange üyih-üyong kahtalan-a üshang, hüyange hipalan aoyinne tahleih konnyüo nang tüolan-a ünyei!

¹⁶Aoyinne tüolan kahta woiyapeih iman ünyong yete woine tam hüyange lanshe iman nüngneine tam.

¹⁷Tüokhei Youngwanpawe naoshelan sheja nehoi yinne yetamlak, hüyange Iye wamnyulan hüyange khahhalan sheja te nehoi shüpshe yehüolak, hangjingne kahta liliye Kahwang yeshing hüyange ümeng ling hüyange iman-e nyüopu lili-a ünu. Hüke lingyapoi Youngwanpa mongshih ngaipuwa ükümpa ne yemenglak, hüpoi shaoshi phalak jingne I yak yelakpe nolak.

¹⁸Hangjingne jupeng hüng hei huh phümtüm vünne hah shupu kih-e, kahtalan ünuwe hah-shunang. Hatüowe vünkhuh nyeih-e ngaiye phao hahpu kih-e hahnang.

¹⁹Hangjingne Ütahpa Youngwanpa mongshih ngai, Iye shaoshi phapuwe kahmük nopute vün kih-e pahtam hüyange kahtalan mahtam, hüyange hatüowa kahta lili yoi yoi jingne.

²⁰Kahmük kenphe me kahtalan-e yaknya yakjah yeme lükke nyielak hüyange iman-e tüopu tüopu hahying hahlak; hüpoi iman seanyaopu aope-o yelaklak. Iman-e yoi hayimlan mei nehoi hahlak!

²¹Manasseh hei Ephraim kahtalan-e ching teihahlak, hüyange iman-e jamshe Judah hahlak. Tüoyangpoi Youngwanpa mongshih ngaipuwa ükümne yeje; shaoshi tamlak jingne I yak yelakpe no yange ngohnang.