Read Konyak Naga LEVITOISHAO 10 Bible Online

LEVITOISHAO 10 - Konyak Naga bible

LEVITOISHAO 10

¹Sha-a Aaron hayim Nadab hei Abihu niye, yoi yoi jing muktik yah, hüyange tüopa me vünoun angyange tüopa me sünyet jakyange, tüopa-a Youngwanpa tangte yahpei. Hüpoi tüopa vün-a yejaopu ne ngoh yangki. Hangjingne ima-a Youngwanpawe imante tüopa yahpeilak ngaokeng yepha.

²Mokhshe Youngwanpawe vün shon, hüyange tüopawe Youngwanpa sheshao me iman li ne tamme hah.

³Hüwante Mosawe Aaronte i, “Youngwanpawe ngaopuwa hatüo ngoh yangki, ‘Aoyinne ü-shaoshan nang iman khongkümpuwe Ü-üjaopate yihnoonlak wongpong. Taowe ü-müktishiwa ü-kahtalan sheshao me ütahte ngaitam lak.’” Hüyangpoi Aaron ngao yengaipe ngoh yangki.

⁴Hüyange Mosawe Aaron Ipajoi Uzziel hayimlan Mishael hei Elzaphan nyik, hüyange imante i, “Tüome wenyah hüyange üjao nyoi mepu numan jeihei naolan yahtei tüoh, hüyange lakjing ü-at ye me iman angtamtüoh.”

⁵Tüokhei iman owe wen, hüyange imanjing inkhek me manga yout yange Mosawe ngaokeng phapu kih-e, iman-a lakjing ü-at ye me paiye yüoyangki.

⁶Tüophei me Mosawe Aaronte hüyange I hayim Eleazar hei Ithamar te i, “Numan shappe yoong nangki she hüo ne numan jing shang yeshaipe tah ang yejema-a numanjing inkheklan tah hittam. Numan-e hüke lingma-a numan lilak, hüyange ükhong nopute Youngwanpa mongshih ngailak. Hüpoi numan pheipu ülao Israel lanpa-a hanghepa vün Youngwanpawe shonpu kaiye lipu peine tam tüopa jingne khongkümpuwe shappe yoonglak jingne tümtüoh.

⁷Khümjing nyenok tafün shong mepu tahyantai, taiyah küma-a numan lilak, hangjingne numan-a Youngwanpa jing pholak minngawe jaowe tamme lingyangpu lan ngoh nang.” Tüokhei Mosawe hangke i hüke iman-e ling yangki.

⁸Hüyange Youngwanpawe Aaronte ngaowe i,

⁹“Nang hüyange nang hayimlan-e wuwüngti yejema-a do fuyang phei yingyange ü-khümjing nyenokte ye-onglak; numan-e yingyange ongma-a numan lilak. Tüopa-a nanghu nanghalan khongkümpuwe yelakpe jonlak ngaokhüm ngohnang.

¹⁰Nange üjaopa hei bangnyuha nipa, hüyange yoi yoi ne shinge anglakyang.

¹¹Hüyange Mosa kaiye Youngwanpawe numante phapu ngaokhümlan khongkümpu nange Israel kahtalante nyüowe tamlak yang.”

¹²Hüyange Mosawe Aaronte hüyange towe angpu Iha Eleazar hei Ithamar nite i, “Youngwanpate hahying dopu mepu ülick dopu tepu towe tüohpu mepu yahtüoh, tüopawe do yenyütpu an lingtüoh, hüyange wümjong phin me tüopa-a hahtüoh, hangjingne hatüo towe tampuwa yeongpu üjaopa ngohnang.

¹³Üjao nyoi me tüopa-a hahtüoh; hatüowa Youngwanpate dopu hahying mepu nang hüyange nanghalan jing meitam ngohnang. Hatüowa Youngwanpawe üte hanghepa ngaokeng pha tüopa ngohnang.

¹⁴Hüpoi nang hüyange nenok noksawe düam hüyange yajahye üyung, ngengpalan jingne menglak jingne Youngwanpate hünghao ünyei meipu ja ne ünyeine mongloong phapuwa hahne ok. Numan-e tüolan-a khüm-e wümpu nyoijing üjaolan jaja he me hahne ok. Tüopa dopulan-a nang hüyange nanghalante Israel kahtalan-e shüppe jempu dopu mepu numan jing meitam ne mengpu mepu phanang.

¹⁵Iman-e mei üyung hüyange düam-a Youngwanpate hahying dopu hipak me üyao dowante yah peilak. Tüopa meitam-a Youngwanpawe ngaokeng phapu kih-e jintepu jingne nang hüyange nanghalan jingne menglak.”

¹⁶Sha-a Mosawe ünu dopu younpong; jeng kentinge yam, hüyange leihuyah, hatüowa jakke tamyangpu ne ngoh; hüyange towe ngohpu Aaron üha Eleazar hei Ithamar nite I mongshih ngai hüyange i,

¹⁷“Hatüowa shejaopupa she shinge, hüyange ükhonge ompu ünu kilak, hüyange Youngwanpa sheshao me iman jingne ünu tantamlak jingne hangne numan-e ünu dopu üjao nyoi me yehahpu?

¹⁸Leihuyah, tüopa iy üjao nyoi ümongpa te yah-e ye in; taowe ngaowe tampu kih-e, numan-e, hatüo üjao nyoi me hahlak shuwe ngoh yangki.”

¹⁹Hüyange Aaron-e Mosate janne i, “Hüma-a ünu dopu tenyih taowe hahküma-a hangke nanglak? Tüopawe nehoi Youngwanpa mongmei lakne ngailak jeya? Kahtalan-e iman jing ünu dopu Youngwanpate tenyih hei yah peinang, hüyange iman-e imanjing jakke dopu yah peinang; hüpoi hükihpu nyam nyam shepu toishao üte üne-o ngai ngohnang.”

²⁰Aope Mosawe tüopa jaiyapeih, I monghah yangki.