Read Konyak Naga LEVITOISHAO 11 Bible Online

LEVITOISHAO 11 - Konyak Naga bible

LEVITOISHAO 11

¹Youngwanpawe Mosa hei Aaron nite tüolan ngao phawe i,

²Israel kahtalan te itüoh, numan-e kahtok mepu yinmok khongkümpu yo me tüolan hahne ok;

³yinmok lili shokphat yange heeishaipu hükihpu numan-e hahne oklak.

⁴Tüoyangpoi heeishaipu hüyange phatpu yo me tüolan-a numan-e yehahlak yang: udh, hangjingne lye heeishai nang, hüpoi shok yephat, tüowa numan jingne yejao.

⁵Hüyange yuhle, hangjingne lye heei shainang hüpoi shok yephat, tüowa numan jingne yejao.

⁶Hüyange yengkongyuh, hangjingne lye heeishai nang hüpoi shok yephat, tüowa numan jingne yejao.

⁷Hüyange ak tah hah, hangjingne I shok phatnang hüpoi heei yeshai; tüowa numan jingne yejao.

⁸Tüolan jing mei numan-e yehahlak yang, hüyange tüolan yinmok mangte nehoi numan-e tahjon; tüolan-a numan jingne yejao.

⁹Yengme ngohpu üshei yo me tüolan-a numan-e hahpu oklak: yengching me jeyah yengyin me jeyah hangheyin nyah me yangteng hüyange nyahla ngoh numan-e hahne ok.

¹⁰Hüpoi yengching yejema-a yengyin me ngohpu hanghe yinmok ne menglakeih mengyapoi, hüyange nyahla yenangma-a, yeng me younkempu yinmok yejema-a yengme ngohpu ülao yinmok lili - tüolan-a numan jingne nulakpa.

¹¹Hükihpu yinmoklan-a nulakpa yinmok ne ilak; Numan-e tüolan-a yehahlak yang yejema-a tüolan ümangte nehoi nulakyang.

¹²Yeng mongme ngohyange hanghe yin yinmok me yangteng yejema-a nyahla yenangpe ngoh tüolan kihpu te numan-e nulak yang.

¹³“Hüyange awhalan yo me tüolante numan-e nuwe teihlak yang; tüolan-a yehahlak, iman nulakpa ne ngohnang: Yingphang awlan, bongkon, hüyange yengching awlan;

¹⁴lanha hüyange lannyubongkon, yoi yoi ülam maapu,

¹⁵khawang lam-e lam-e ngohpu,

¹⁶yengmom awnyu; nyak aw, hankhak awnyu, lanshao hüyange yoi yoi ülam maapu,

¹⁷awkhuh, yengching awnyu, awtungaote,

¹⁸yeng-aw, yengnah awphoi, meiyok bongkon,

¹⁹lümlei aw, jeam aw hüyange yoi yoi ülam maapu, meipu, hüyange awpak.”

²⁰“Üyang nyimyange üya peli phei kempu khongküm numan jingne nulakpa.

²¹Tüoyangpoi, üyang nyimyange üya peli phei kempu, hanghe kahtok me phaowe tailak jingne üya tokme üne-o tanshok nyimyange ngoh, numan-e hahne ok;

²²Tüolan yo mepu numan-e tüolan-a hahne ok: nyaodukh hüyange tüolan kihpu, hewüodukh hüyange tüolan kihpu, yanjik hüyange tüolan kihpu, hüyange dukh yoi yoi meitam.

²³Hüpoi üyang nyimpu mokh-ha üshei hanghe yin me üya peli ngoh, tüolan-a numan jingne nulakpa ngohnang.

²⁴“Hüyange tüolan-e numan yejaope ngaikülak: aowe tüolan yinmok mangte letlakei, yaning te ngoi she yejaope ngohlak,

²⁵hüyange aowe tüolan yinmok mang painang, yoi nyemo shaolak yang, hüyange yaningte ngoi she yejaope ngohlak.

²⁶Yinmok lili hanghe me yashok nyim hüpoi shok yephatpe ngohnang, yejema-a heei yeshai tüolan-a numan jingne yejao, kahta lili aoyinne tüolante letlakei yejaope ngohlak.

²⁷Hüyange ya peli phei kempu yinmok yo me hanghepawe pala kemnang, numan jingne tüolan-a yejao; aowe tüolan yinmok mangte let lakei, yaningte ngoiye yejaope ngohlak.

²⁸Hüyange aowe tüolan yinmok mang painang, yoi nyemo shaolak yang, hüyange yaningte ngoiye yejaope ngohlak; numan jingne tüolan-a yejaopulan ngohnang.”

²⁹“Hüyange kahtok me leh-e kempu yo me numan jingne yejaopuwa tüolan ngohnang: phikhok, miphai, hüyange phoi yoi yoi ülam,

³⁰hüyange zanyu, phoi ahng, hüyange za, pheih phoi hüyange hümpoleak.

³¹Lehkempu yo me tüolan-a numan shaome yejaopu lanne ngoh nang: aowe iman liye ngohwante letlakei, yaning ngoiye yejaope ngohlak.

³²Hüyange hanghe yin me tüolan, mang angnang, tüoyin-a yejaope ngohlak; pee phei lingpu me jepoi; yejema-a nyemo me jepoi, meisho yejema-a monnye jepoi, hanghe-e ülam ja, jingne jon, tüoyin-a yengme hünglak yang, hüyange yaning manngoi manngoi hatüo yejaope ngohlak; tüophei me nakshih jaowe ngailak.

³³Hüyange kümptük ütam me tüolan yeiküma-a, hangyin tüome ngohlakei, yejaope ngailak, tüokhei numan-e tüolan-a pai winlak yang.

³⁴Tüopa me hahlak hahying khongküm, hanghepa me yeng peinang, yejaope ngailak; hüyange yinglak khongkümpu hanghepa tüopa kihpu tük me yingnang tüowa yejaope ngohlak.

³⁵Hüyange hanghe yin me yinmok ümang yeitawe shahlakei tüolan-a yejaope ngainang; phongjong jeyah yejema-a tüopa nanleiye lingpu ja ne jeyah hatüowa khoihnyai-e meng winlak yang: tüolan-a numan jingne yejaope ngaiyangki.

³⁶Tüoyangpoi yengpeiwo yejema-a yenglei hatüowa jaowe ngohlak; hüpoi aowe iman yinmok mangte letlakei, yejaope hei ngailak.

³⁷Hüyange tüolan yinmok mang deine angpu üli ütam tangme yeiye ngohma-a hatüowa jaowe ngohnang.

³⁸Hüpoi üli tangme yeng yeiye ngohma-a, hüyange tüolan yinmok mang ütam tüopa tangme yeiye shuma-a, hatüo üli-a numan jingne yejaope ngohlak.

³⁹“Hüyange numan-e hahpu yinmok ütam lima-a, aowe yinmok mangte letlakei, yaningte ngoiye yejaope ngohlak.

⁴⁰Aowe tüopa yinmok mang hahlakei, lye yoi nyemo shaolak yang, hüyangpoi yaningte ngoiye yejaope ngohlak; üne-o aowe tüopa yinmok mang paiyapeih lye yoi nyemo shaolak yang, hüyangpoi yaningte ngoiye I yejaope ngohlak.

⁴¹“Hüyange kahtok me lehkempu yinmok üjoilan khongkümpu nulakpane ngohnang; hatüo yehahlak yang.

⁴²Hanghe yin seanyu phei shitte lehkem nang, hüyange hangheyin üya peli phei kem, yejema-a hangheyin üya maawe nyim, hüke kahtok me lehkempu khongkümpu, tüolan-a numan-e yehahlak yang; hangjingne tüolan-a nulakpane ngoh nang.

⁴³Numan-e yoi nying nyingke lehkempu yinmok hahyange nulakpane tahmeng tam, yejema-a; tüolan-e numan nuwe tahtam, kenyeting yahma-a numan yejaope ngailak.

⁴⁴Hangjingne Tao Youngwanpa numan Kahwang; numan nying nyingke jaoweshawe ngohyah, hüyange numan üjao me ngohyah, hangjingne Tao üjao ngohnang. Kahwan tangme lehkempu hanghe yinmoke-o numan nune tahtam.

⁴⁵Hangjingne numan Kahwangne menglak jingne Egypt kahtok mepu woipeipupa Tao Youngwanpa, tüokhei numan jaowe ngohyah, hangjingne Tao üjao ngohnang.”

⁴⁶Hatüowa nyeinyim yangleng hei yinmok yinha, hüyange yengme moktak-e popu yinmok hüyange kahwan tangme lehkempu yinmok khongkümpu jingne ngaokhüm ngohnang.

⁴⁷Numan-e khümme wümpu toishao me hangheyin yinmoklan jaopu ne inang, hüyange hangheyin yejaopu ne inang tüo nipa meimei-e tam-e shinglak yang.