Read Konyak Naga LEVITOISHAO 13 Bible Online

LEVITOISHAO 13 - Konyak Naga bible

LEVITOISHAO 13

¹Youngwanpawe Mosa hei Aaron nite ngaowe i:

²“Aope kahta ja püm üsho me peak-e yejema-a ma ngai-e, yejema-a hatüo-a I püm üsho me ngonma ne menge ngelakei, hüwante I Aaron yejema-a Iha ngengpalan yo me ja tangte woiye peilak yang.

³Hüyange ngengpawe I püm üsho me ngai-e, ngohpu mate leilak yang; hüyange üsho ma mepu ümin he-enge ngohma-a, hüyange I püm üsho phei leilak müklei me kook-e tateiye ngohma-a, hatüowa ngonma ngohnang, tüokhei ngengpawe Ite leiye shoyange, I-a yejao she lye shingne tamlak yang.

⁴Hüpoi I püm üsho me ngai-e ngohpu ma he-enge ngohma-a, hüyange tüopa leilak üsho mepu kook-e tateiye ye-nge ma-a, hüyange tüomepu ümin ühengne yemengma-a, hüwante ngengpawe tüopa ma ngaipu dakpa-a nyih nyit jingne küp-e anglak;

⁵Hüyange nyih nyit shepupa me ngengpawe Ite nishe leilak, hüyange tüopa-a I mükte jakih muh ngeye hüyange ma üsho me jalun-e yetaipu ne mengma-a, hüwante ngengpawe üne-o nyih nyit pu jingne küp-e anglak.

⁶Ngengpawe üne-o nyit shepupa nyih me Ite tok-e leilak yang; hüyange leihu, ma hümme yeteiye hüyange üsho khongkümpute pah-e yetaipe ngohma-a, hüwante ngengpawe I-a jaoteki she shingne tamlak; hatüowa maaja ngaipu ne hei ngoh nang; hüyange lye yoi nyemo shaolak, hüyange ütingpa me jaowe ngohlak.

⁷Hüpoi ngengpawe jaoteki she shingne tamyang pheime tüophei me üne-o jalun-e ngaipu ne mengma-a, ngengpa shongte nishe peiye hüolak yang.

⁸Hüyange ngengpawe lye nishe leilak, hüyange ma üsho me yanteiye ngohma-a, ngengpawe I-a yejao she shingne tamlak; hatüowa ngonma ne ilak ngohnang.

⁹“Aope kahta ütamte ngonma ngai-e ngohlakei, hüwante I ngengpa tangte woipeilak yang;

¹⁰ngengpawe Ite tok-e leilak; hüyange üsho me üheng ngai-e, tüokaiye ümin üheng ne menge peak-e ngaipu me mei üla ngaiye ngohma-a,

¹¹hatüo mei me ngonma yephünpe ngaipu ne mengma-a, hüma-a ngengpawe I yejao she shingne tamlak; hüyange shaaji I küp-e anglak wongpong ne yeje, hangjingne I-a yejao she shing.

¹²Ngonma üsho khongkümpu me ngaima-a, hüyange ngonma ngaipu shang mepu ya ngoiye, hüke ngengpawe ngepu khongkümpu me ngaiye ngohma-a,

¹³hüwante ngengpawe Ite üne-o tok-e leilak yang. Hüyange ngonma-e I püm khongküm pah teiye ngohma-a, tüopa ngaipu kahta-a jaoteki she lye shingne tamlak yang. I jing tangta sho khongkümpu ühengne menge mahma-a, I-a wanglam me jaowe ngaiteki.

¹⁴Hüpoi aope I me mei üla ma ngailakei, I yejaope ngohkülak.

¹⁵Ngengpawe mei üla ngaipu-a nishe tok-e leiyange, I yejao she shingne tamlak yang, mei üla ngaipu-a manjao ngoh nang; hatüowa ngondak.

¹⁶Hüpoi mei üla-a nishe henge ye-e jeilei-e ngaima-a, hüwante I ngengpa tangte peilak,

¹⁷hüyange ngengpawe Ite nishe tok-e leilak, hüyange ma ühengne mengteiye ngohma-a, hüwante ma ngohpu kahta-a jaowe ngoh nang she ngengpawe shingne tamlak yang; I jaowe ngohnang.

¹⁸“Hüyange aope tangta me tanti ngaiyange meiye mahpu ngohlakei,

¹⁹hüyange tanti ngaipu mee me he-enge peak-e ngaipu yejema-a taktakloke peak-e ngohlakei, hüma-a I-a ngengpa tangte peiye hüolak yang.

²⁰Hüyange ngengpawe tok-e leilak, hüyange tüopa leilak müklei me üsho mepu luwe yuteiye ngohpu ne mengma-a, hüyange tüopa mepu ümin he-enge ngohma-a, hüwante ngengpawe I yejao she shingne tamlak yang; hatüowa ngonma, tanti me ngaiwangpu ne ngoh nang.

²¹Hüpoi ngengpawe leiyange, tüopa me ümin üheng yenang, hüyange üsho mepu luwe yetapu ne mengma-a, hüwante ngengpawe I nyih nyit pu jingne küp-e anglak.

²²Hüyangpoi hatüo üsho me kenphe me ngohma-a, ngengpawe I yejao she shingne tamlak, hatüowa ngonma.

²³Hüpoi peak-e ngohpu-a tüome muh ngohma-a, hatüowa tanti ümee ngohnang; hüyange ngengpawe I jaowe ngohnang she shingne tamlak.

²⁴“Yejema-a tanti me vünne shahpu ma ngohma-a, hüyange vün ma meeme tushange taktakloke he-enge yejema-a he-enge ngohma-a,

²⁵hüma-a ngengpawe Ite tok-e leilak; hüyange tushange ngohpu nyoi me ümin-a he-enge ngohma-a, hüyange müklei me üsho mepu shelu she ngohma-a, hatüowa ngonma; vün ma mepu hatüowa ngaipu ngohnang; hüyange ngengpawe I yejao she shinge tamlak yang; hatüowa ngonma.

²⁶Hüpoi ngengpawe tok-e lei yange, hüyange tushangpu me ümin üheng ne yemeng, hüyange üsho mepu hatüo shelupu ne yejema-a, hüyange hümme yepu ne mengma-a, hüwante ngengpawe I nyih nyit mongme küp-e anglak yang.

²⁷Hüyange nyit shepu nyih me ngengpawe I tok-e leilak, hatüo üsho me ngaiye wange ngohma-a, hüwante ngengpawe I yejao she shingne tamlak; hatüowa ngonma.

²⁸Hüpoi tushangpu-a tüome muh ngohma-a, hüyange üsho me ngaiye wange yenang, hüyange hümme yepu ne mengma-a; hatüowa vün ne shah tampu me peak-e ngaipu hei ngohnang; hüyange ngengpawe I jaowe ngohnang she shingne tamlak; hangjingne hatüowa vünne matampu kaiye ngaipu üko.

²⁹“Aope netan jeyah yejema-a sheko jeyah shangme yejema-a jumin me ma ngohlakei,

³⁰hüwante ngengpawe tüopa ma te tok-e leilak yang. Hüyange müklei me üsho mepu shelu she ngohma-a, hüyange tüopa me ümin nyiansheye, hüyange pahei she ngohma-a, hüwante ngengpawe I yejao she shingne tamlak; tüopa-a mutük, hatüo shangme yejema-a jumin me ngaipu ngonma ngohnang.

³¹Hüyange ngengpawe mutük te tok-e leima-a, hüyange müklei me üsho mepu shelupu ne yejema-a, hüyange tüopa me shangmin ünyak yenangma-a; hüma-a ma pheipupa-a ngengpawe nyih nyit ngoiye küp-e anglak yang.

³²Hüyange nyih nyit shepupa me ngengpawe mate tok-e leilak yang; hüyange mutük-a jalun-e yetaipe ngohma-a, hüyange tüopa me shangmin ünyan ne yemengma-a, hüyange mutük-a müklei me üsho mepu shelu she yenangma-a,

³³hüwante mako neikonpu shangmin linlakyang, hüpoi mako nyoipa-a lye yelinlak; hüyange ngengpawe mutük pheipu pa-a nyih nyit jingne küp-e anglak.

³⁴Hüyange nyit shepupa nyih me ngengpawe Ite tok-e leilak yang; hüyange mutük tangta me yanne yengohma-a hüyange tüopa leilak üsho mepu yelupe ngema-a, hüwante ngengpawe I jaowe ngohnang she shingne tamlak yang. Hüyange lye yoi nyemo shaolak yang hüyange jaowe ngohlak.

³⁵Hüpoi I jaowe tamteki she shingne tamyang phei me ma jalunne ngaima-a,

³⁶hüwante ngengpawe Ite üne-o tok-e leilak yang; hüyange mutük-a wangman-e pahtaiye ngohma-a, ngengpawe shangmin ünyan yeyampoi meilak; I-a hüke yejaope ngohnang.

³⁷Hüpoi ngengpa mükte mutük-a jakih muh ngohpu ne mengma-a, hüyange tüopa me shangmin ünyak nyimme ngohma-a, mutük-a meiteki, I jaowe ngohnang; hüyange ngengpawe I jaowe ngohnang she shingne tamlak.

³⁸“Aope netan ja jeyah sheko ja jeyah tangta me he-enge tushangpu ngohlakeih,

³⁹ngengpawe tüopa kahtate tok-e leilak yang; hüyange I tangta sho me peak-e ngaiye ngohpuwa montottote ngema-a, mako ülang me tuwe ngaipu hei ngohnang, tüokhei I-a jaowe ngohnang.

⁴⁰“Kahta ja I shang mepu shangmin yeipu ne mengma-a, I shangko ne jeyahpoi jaowe ngohnang.

⁴¹Hüyange kahta ja I shekeng yeme shangmin yenangpe ngaima-a; I shangko teiye ngohnang, hüpoi I jaowe ngohnang,

⁴²Hüpoi shangko yejema-a shekeng me shangmin yenangpu me taktak loklokke shangmin shaone wangpu ne mengma-a, tüopa-a shaaji I shangko yejema-a shekeng me shangmin yenangpu me ngonma pah wangnang.

⁴³Tüophei me ngengpawe tüopate tok-e leilak, hüyange lye hatüo I shangko yejema-a shekeng me shangmin yenangpe ngohpu me peak-e ngohpuwa taktaklokke he-eng, püm tangta me ngonma ngaipu kih-e ngema-a,

⁴⁴I-a ngonma pheipu kahta, I yejao Itepu ma shangme ngaitepuwe, ngengpawe I yejao she shingne tamlak yang.

⁴⁵“Ngondak pahpu kahta aome ma ngaiye ngohnang, lye hittephei inkhek yahyange, hüyange I shang yeshaipe, hüyange lye yoi ju om-e büangyange, ‘Yejao, yejao’ she üngwünlak yang!

⁴⁶I me ma ngohpute ngoiye I yejaope ngohlak; yejaopu khei, I shaha angtamlak yang. I ngohlak nyoi-o lakjing mepu yanne taiye anglak yang.”

⁴⁷“Aope nyemote oong pahyange ngohlakeih, matnye jeyah, pengkhai nye ne jeyah,

⁴⁸hatüo matnye yejema-a pengkhai phei takpune jeyah hüopu nyemo ne jeyah, meisho jeyah, yejema-a meishowe ülam ja lingpu ne jeyah,

⁴⁹nyemote yejema-a meisho me, yejema-a takpu yejema-a hüopu toinan ne yejema-a meishowe lingpu hanghe toinan menglakeih mengyapoi, nyak nyak mon mon yejema-a taktak loklokke ümee ütam ngohma-a, hatüowa oong ngohnang, hüyange ngengpa te hüolak yang.

⁵⁰Ngengpawe tüopate tok-e leilak, hüyange tüopa toinan-a nyih nyit jingne ülao ken me yanne anglak yang.

⁵¹Tüophei me nyit shepupa nyih me üne-o tok-e leilak. Oong nyemo takpu me jeyah hüopu toinan me jeyah yejema-a meisho, hüke hanghe yin meisho phei ling, tüome neakke ngohma-a hüyange oong-a maapah teiye ngohma-a, hatüowa yejao.

⁵²Ngengpawe tüopa-a jaklak yang, hangjingne hatüowa vünne hei mahtamlak jalunne pahnangpu oong ngoh nang.

⁵³“Hüpoi ngengpawe tüopa-a tok-e leiyange oong-a nyemo, yejema-a takpu, yejema-a hüopu, yejema-a meishowe lingpu hanghe toi ne menglakei mengyapoi; pah omme yetaipe ngohma-a,

⁵⁴ngengpawe oong ngohpuwa shaolak ngaokeng phalak yang, tüophei me üne-o nyih nyit ngoiye tüopa-a küp-e anglak yang.

⁵⁵Tüophei me lye tüopate tok-e leilak yang, hüyange tüopa jalunne pah yetai poi tüopa oong müklei yejeileima-a, tüopa-a yelakpe yejaope muh ngohnang. Numan-e tüopa-a sheshao yeme ngohyah tokphei ye me ngohyah numan-e toinan-a jaklak yang.

⁵⁶“Hüpoi aope ngengpawe nishe tüopate tok-e leiwante oong-a weangteiye ngohma-a, lye tüopa-a nyemo mepu jeyah meisho mepu jeyah hitte winlak yang.

⁵⁷Tüophei me oong-a nishe pah yema-a hüyange nyemo me yejema-a takpu nye, yejema-a hüopu, yejema-a hanghe yin meishowe ling, hatüolan me jalunne pah taima-a, nokpupawe tüopa-a vün me jakke tamlak yang.

⁵⁸Hüpoi nyemo, takpune jeyah, hüopu ne jeyah, yejema-a, hangheyin meishowe lingpu hanghe ne menglakei mengyapoi, lye shaopute oong-a yenangpe jaowe ngaima-a, lye üne-o tüopa-a shaolak yang, hüyange tüopa-a shaaji jaowe shopune menglak.”

⁵⁹Tüolan hüke nyemo me oong pahpu jingne linglak ngaokenglan, tüolan mat yejema-a pengkhai yejema-a matnye ne jeyah pengkhai khek ne jeyah, yejema-a meisho phei lingpu hanghe ne menglakei mengyapoi oong pah ma-a wanglam hüke jonlak yang.