Read Konyak Naga LEVITOISHAO 15 Bible Online

LEVITOISHAO 15 - Konyak Naga bible

LEVITOISHAO 15

¹Youngwanpawe Mosa hei Aaron ni phei ngaowe i,

²Israel kahtalan phei ngaotüoh hüyange imante hüke itüoh: Aope netan ütam ja te yoi jupeng mepu ülamja yünne ngaima-a, tüopa yünne ngaipuwa yejaopu ngohnang.

³Hüyange hatüowa I mepu yünne taipu yejaopu ngaokhüm ngohnang: I jupeng mepu yün yapoi, yejema-a yünne ngohpu mepu lakyapoi, hatüowa I me yejaopu ngohnang.

⁴Shinleng hanghepa me I lamlakei, yejaope ngohlak; hüyange hangheyin me I shotlakei hatüo yejaope ngailak.

⁵Hüyange aowe I shinleng te letlakei, lye yoi nyemo shaolak yang hüyange I nying nyingke yeng yüolak yang, hüyange yaningte ngoiye yejaope ngohlak.

⁶Hüyange yünne ngohpu kahta shotpu khongkümpu me aowe tüopa tangme shotlakei, I nyemo shaolak yang, hüyange I nying nyingke yeng yüolak yang, hüyange yaningte ngoiye yejaope ngohlak yang.

⁷Hüyange yünne ngohpu pümte aowe let, I nyemo shaolak yang, hüyange I nying nyingke yeng yüolak yang, hüyange yaningte ngoiye yejaope ngohlak yang.

⁸Hüyange yünne ngohpu jawe jaowe ngohpu she ja te iyphao phao küma-a, hüwante lye I nyemo shaolak, hüyange I nying nyingke yeng yüolak, hüyange yaningte ngoiye yejaope ngohlak.

⁹Hüyange I me yünne ngohpu kahta I meisho shotjing yejema-a hangheyin me shotlakei, yejaope ngailak.

¹⁰Hüyange aowe I phang me ngohpu ülam ja te nehoi letlakei, yaning te ngoiye yejaope ngohlak; hüyange tüolan toinan aowe jon pailakei, I nyemo shaolak yang, hüyange I nying nyingke yeng yüolak yang; hüyange yaningte ngoiye yejaope ngohlak.

¹¹Hüyange aohipate yünne ngohpu kahtawe I yak yeng me meimei-e yetuhpe letlakei, I nyemo shaolak yang, hüyange I nying nyingke yeng yüolak yang, hüyange yaningte ngoiye yejaope ngohlak.

¹²Hüyange kümptük hanghepate yünne ngohpu kahtawe letlakei, paiwinlak yang; hüyange pee lingpu tük hei sheng lili yengme poiye jaolak yang.

¹³“Aope kahta-a yünne ngohpu mepu jaowe tamlakei, lye I jaowe oklak nanjingne nyih nyit itlak yang, hüyange I nyemo shaolak yang; hüyange lye I püm yeng jao me yüolak yang, hüyange hüke jaowe tamlak.

¹⁴Hüyange tet shepupa nyih me lye awyei ni yejema-a awshu üha ni yahpeilak, hüyange khümjing nyenok tafün shongte Youngwanpa tangte peiye, tüolan-a ngengpate phalak.

¹⁵Hüyange ngengpawe hatüo ja-a ünu dopu jingne, hüyange ja-a jakke dopu jingne phalak; hüyange ngengpawe I yinne ngohpu jingne Youngwanpa sheshao me I jingne tantampu linglak.

¹⁶“Hüyangpoi aope netan ja mepu pongyeng keppe ngailakei, hüwante lye I püm khongkümpu yeng yüowe poilak yang, hüyange yaningte ngoiye yejaope ngohlak.

¹⁷Hüyange nyemo lili, hüyange meisho lili, hanghepa me pongyenge shah-e ngoh, yenge poilak yang, hüyange yaningte ngoiye yejaope ngohlak.

¹⁸Hüyange kahta ja sheko phei shiyange pongyeng kepma-a imni moiniye yeng yüolak yang, hüyange yaningte ngoiye iman yejaope ngohlak.

¹⁹“Aope sheko ja mepu iy taipu ngohlakei, hüyange hatüo wanglam kih-e püm mepu taipu ne mengma-a, yha nyih nyit yejaope ngohlak; hüyange; aowe yha te letlakei, yaningte ngoiye yejaope ngohlak.

²⁰Hüyange yha yejao yeshapu hipak me shotte lamyangpu khongkümpu yejaope ngohlak; hüyange hangheyin me yha shotlakei yejaope ngohlak.

²¹Hüyange aowe yha shinleng te letlakei, lye yoi nyemo shaolak yang, hüyange I nying nyingke yeng yüolak yang, hüyange yaningte ngoiye, yejaope ngohlak.

²²Hüyange yha shotpu me aowe letlakei, yoi nyemo shaolak yang, hüyange I nying nyingke yeng yüolak yang, hüyange yaningte ngoiye yejaope ngohlak.

²³Hüyange hatüo shinleng me yejema-a yhawe hangheyin me shotlakei, aope lye tüote letlakei, I yaningte ngoiye yejaope ngohlak;

²⁴Hüyange kahta ütamme yha yejao yeshapu hipak me yha phei phwngngam ma-a, yha yejao yeshapuwe I nuwe tamnang. I nyih nyit yejaope ngohlak; hüyange shinleng lili I ümeken me lam, yejaope ngohlak.

²⁵“Hüyange sheko ja yoi iy taipu hipak yeje pute hipak laowe iy taima-a, yejema-a yha yejaopu hipak tokte kaiye iy yünpu ne mengma-a, yha yejaope ngohlak; yünpu hipak khongkümpu me yha yejaope ngohlak.

²⁶Yha iy taipu hipak khongkümpu me shinleng hanghe pa me yha shilakei, yha yejaope ngohpu shinleng kih-e yha jingne ngoh külak; hüyange yhawe hanghe yinme shotlakei, yha yejaope hüyange nuweshakke ngohpu kih-e nuweshakke ngohlak.

²⁷Hüyange aowe tüolan toinante letlakei yejaope ngohlak, hüyange yoi nyemo shaolak yang, hüyange I nying nyingke yeng yüolak yang, hüyange yaningte ngoiye yejaope ngohlak yang.

²⁸Hüpoi yha iy taipu jaoteiye ngohma-a, hüwante yhawe yha nying nyingke nyih nyit itlakyang, hüyange tüophei me yha jaowe ngailak.

²⁹Hüyange tet shepupa nyih me yhawe yoi jingne awyei ni, yejema-a awshu üha ni yahlak, hüyange tüolan-a khümjing nyenok taten shong yamme ngengpa tangte yah peilak.

³⁰Hüyange ngengpawe ja-a ünu dopu jingne hüyange ja-a jakke dopu jingne phalak yang; hüyange ngengpawe Youngwanpa sheshao me tüokih linge yha yejaopu yünpu jingne tantampu linglak.

³¹“Hüke iman yo me ngohpu Ü-khümjing iman-e iman yejaopu kaiye nune tam-e iman yelilak jingne, hüke nange Israel kahtalan te iman yejaopu mepu yanne ngohne tamtüoh.”

³²Tüopa ngaokhüm-a ao me yünnang, hüyange ao mepu pongyeng keppe tainang, hüyange tüopa kaiye I yejaope ngaitam nang, I jingne ngohnang;

³³hüyange sheko aohinyu püm yejaope ngohnang; hüyange netan jeyah sheko jeyah yünne ngohpu hüyange ao netan yejaopu sheko phei shilakei, iman jingne ngaokhüm hatüolan ngohnang.