Read Konyak Naga LEVITOISHAO 16 Bible Online

LEVITOISHAO 16 - Konyak Naga bible

LEVITOISHAO 16

¹Aaron hayim ni, aope imni Youngwanpa shongte owe pei hüyange li; Youngwanpawe Mosate ngao.

²Youngwanpawe Mosate i; “Shüpshe shotjing hanghe jiengjeppu ghonu tangme ngoh, shongpu jhotnye ümong yeme Üjao tokte Üjao Nyoite hangke tingme-o tah ong she nangjei Aaron te itüoh; hüke ngao yejai yahma-a I lilak; hangjingne Tao shüpshe shotjing me wangphom me ngailak.

³“Hüpoi ünu dolak jingne mahu üpongha ja, hüyange jakke dolak jingne nyeepong üha ja, tüolan yahyange hei Aaron Üjao tokte Üjao Nyoite ongpu oklak.

⁴“Youngwanpawe tüolan nyüoweleipu pha. Üjao tokte Üjao Nyoite Aaron ongshao me, lye yeng yüolak yang hüyange ngengpa oleng yahlak yang; pengkhai ngeng-ahng phakshaoh hüyange phakshaoh, shienghit, hüyange shangnyeih khek.

⁵“Hüyange Israel ükhong mepu Iye ünu dopu jingne younpong ni hüyange jakke dopu jingne nyeepong ja yahlak yang.

⁶“Aaron-e I yoi ünu hüyange inok noksalan mepu ünu tantamlak jingne mahu üpong ja toidolak yang.

⁷Tüophei me Iye Youngwanpa khümjing nyenok tafün shongme younpong ni yahpei lak yang.

⁸Hüyange Aaron-e younpong ni tangme phongyeng lakyang; phongyengpu japa ‘Youngwanpa jingne,’ hüyange phongyengpu ja-a ‘Azazel jingne.’

⁹Younpong hanghe pate phongyengpu hütlakeih, hatüowa Youngwanpa jingne, hüyange ünu dopu jingne Aaron-e toidolak.

¹⁰Hüpoi younpong hanghe pate phongyengpu Azazel jingne hütyangki tüopa-a üyin me Youngwanpate phalak, hüyange kahtalan jingne ünu tantamlak jingne Azazel tangte wanwüng jengte shonne teilak.

¹¹“Aaron-e I jingne hüyange Inok noksalan jingne ünu dopu ja ne mahu üpong yahpeilak, hüyange I hei Inok noksa jingne tantampu linglak; hüyange I yoi ünu jingne mahu üponga toilak.

¹²Iye vün oun maawe shokyang phei muktük ja wümjong mepu yahlak hüyange shemeipupa sünyet yakpoih ni yahlak hüyange tüolan-a Üjao tokte Üjao Nyoite yah peilak.

¹³Tüoken Youngwanpa ngohjing me lye sünyet-a vün me jakke tamlak hüwante sünyet mepu vünkhuh-e jiengjeppu ghonu tangme ngohpu shüpshe shotjing büange mahlak tüo kaiye lye tüopa yengelak tüome nakshih I yelilak.

¹⁴Hüyange lye mahu üpong iy ütam yahlak, hüyange hatüo yoi yaklan-e yahyange shüpshe shotjing sheshao yete shaitamlak, hüyange tüophei me tüopa mepu ütam yahpuwe jiengjeppu ghonu sheshaoyete nyit me shaitamlak yang.

¹⁵“Tüophei me lye kahtalan jingne angpu ünu dopu younpong toilak, hüyange iy-a Üjao tokte Üjao Nyoite yah-e inlak, hüyange tüopa iy-a lye mahu üpong iy shaipu kih-e muh linglak, hüyange hatüo shüpshe shotjingte hüyange jiengjeppu ghonu sheshao yete shaitam lak.

¹⁶Hükih-e linge Iye Israellan-e nuweshakpu mepu hüyange iman jing ünu üshei mepu jaolak jingne Üjao tokte Üjao Nyoi me Iye tantampu linglak yang. lye hatüowa khümjing nyenok me linglak yang hangjingne hatüowa lakjing hotan yejaopu yo me ngohnang.

¹⁷Hüyange Üjao tokte Üjao Nyoite tantampu toishao linglak jingne Aaron ongpu mepu I manyu manyu, khümjing nyenok me ao-o yengohlak. lye yoi jingne hüyange Inok noksa jingne hüyange ükhong moilan jingne tantampu linglak.

¹⁸Tüophei me wümjong shongte jakke doyange hüyange tüopa jao phei me I ngailak yang. lye mahu üpong iy ütam hüyange younpong jing iy ütam yahlak yang, hüyange tüolan-a wümjong ünuk neikonne ngohpu ümük peli khongkümpu te phowe tamlak yang.

¹⁹I yaklan me yahyange iy ütam-a lye wümjong te nyit me shaitamlak yang. Hükih-e linge Israel kahtalan ünu mepu lye tüopa-a jaowe linglak yang, hüyange tüopa-a Üjao ne menglak.

²⁰“Aope Aaron-e Üjao tokte Üjao Nyoi hüyange khümjing nyenok hüyange wümjong jingne tantampu toitüm-e sholakei, lye youn üyin me yah peilak yang.

²¹Hüyange Aaron-e I yak moiniye üyin me ngohpu younpong shangme shüngyange, Israel kahtalan-e ompu ünu khongküm, hüyange iman-e ngaokhüm mengpu khongküm, hüke iman-e hok-e weyangpu khongkümpu, tüopa tangme ünu janlak yang, hüyange hüke Iye younpong shangme ünuwa tüohlak. Tüophei me tüopa toishao linglak jingne leye angpu kahtawe tüopa youn-a wanwüng jengte jange teilak.

²²Younponge iman-e ompu ünu khongkümpu Ime kiyange phaonyu wanwüng jengte tai mahlak.

²³“Tüophei me Aaron khümjing nyenokte onglak, hüyange Üjao tokte Üjao Nyoite ongshao me lye yahpu ngengpa nyemo khokke yahlak, hüyange tüolan-a tüoken me tüoh lak.

²⁴Hüyange lye üjao nyoi ja me yeng yüolak, hüyange yoijing nyemo olak. Tüophei me I nokshaote ngailak, hüyange tüophei me I yoijing ünulan hüyange kahtalan jing ünulan yahteilak jingne jakke dopu phalak.

²⁵Ünu dopu jing yinmok üyaowa lye wümjong tangme jaklakyang.

²⁶Hüyange kahta aowe Azazel jingne wanwüng jengte younpong jange teine tam lye yoi nyemo shaolak yang, hüyange lakjingte leih yeshao me yeng yüolak yang.

²⁷Hüyange ünu dopu jingne yahpu mahu üpong hüyange younponga hanghepa jing iy ünu yahteilak jingne Üjao tokte Üjao Nyoite yah inyange, püm tüohpuwa lakjing ü-at yete paiye teilak yang hüyange jaklak. Üsho, mei ühak, hüyange üyeilan khongkümpu jaklak.

²⁸Kahta aowe tüolan jaklakei lye yoijing nyemo shaolak hüyange lakjingte leih yeshao me yeng yüolak yang.

²⁹“Hatüo lan-a numan jingne jinte wanglam ja ne ngohlak yang: Lekeng nyit shepupa nyih pen shepupa me, numan-e numan nying nyingke nyaole lakyang, puhu jeyah hüyange numan phei ngohpu yinpa ne jeyah, toishao hango yelinglak yang.

³⁰Hangjingne numan jaowetamlak jingne tüopa nyih me numan tantampu linglak; tüo kaiye numan ünu khongkümpu mepu numan Youngwanpa sheshao me jaowe ngohlak.

³¹Hatüowa numan jingne Sabbath nyih, hüyange numan-e numan nying nyingke nyaolelak, hüyange hang toi-o yelinglak. Tüolan linglak ngaokeng ngoikülak hipak üshei me numan-e jonlak.

³²Hüyange ngengpa ao Ipa nanleiye phünne phawe ngengpa ne mengne minnga phowe lelakei, lye ünu tantamlak toishao linglak; hüyange lye ngengpa nyemo yahlak.

³³Hüyange Iye Üjao tokte Üjao Nyoi jingne tantampu linglak, hüyange khümjing nyenoklan hüyange wümjong, hüyange lye ngengpalan hüyange kahtalan khongkümpu jingne tantampu linglak.

³⁴Tüolan linglak toishaowa ngoikülak hipak khongkümpu me numan-e jonlak. Tüopa tantampu toishaowa Israel kahtalan imanjing ünu ümeng khongkümpu mepu jaolak jingne wangpeng te ja me jaowe shapu ngohlak yang.” Tüokhei Youngwanpawe ngaokeng phapu kih-e Mosawe lingyangki.