Read Konyak Naga LEVITOISHAO 17 Bible Online

LEVITOISHAO 17 - Konyak Naga bible

LEVITOISHAO 17

¹Youngwanpawe Mosate ngaowe i:

²“Aaron hüyange I halan, hüyange Israel kahtalan üsheite ngaowe hüke itüoh; Youngwanpawe ngaokeng phapuwa hatüo.

³Israel nokphong mepu kahta ütam-e mahu üpong jeyah, yejema-a nyee jeyah yejema-a youn jeyah lakjing ümong me jeyah ü-at me jeyah toiyange,

⁴hüyange tüopa-a khümjing nyenok tafün shongme Youngwanpa te hünghao ümei ja ne dolak ne yepeima-a, iy shaiye püohpu tüopa kahta tangme ngohlak, hangjingne Iye iy shaiyangki; shaaji tüopa kahta-a yoi kahtalan yo me ye omlak.

⁵Tüopa linglak ngaokeng te leppuwa Israel kahtalan-e yinmok-a üko nyoi me toiye ngohyang puwa shaapa-a iman-e Youngwanpa tangte yahpeilak. Shaapa-a iman-e tüolan-a ngengpa tangte khümjing nyenok tafün shongme peilak hüyange tüolan-a shüpshe jempu dopu ja ne toilak.

⁶Hüyange ngengpawe iy-a Youngwanpa wümjong hüyange khümjing nyenok tafün shongme shailak yang, hüyange üyaowa Youngwanpate üpe ümei ngaitamlak jingne jaklak.

⁷Israel kahtalan-e shaaji iman yinmoklan ünu yahalante üko me toidopu phapu kaiye Youngwanpate üting yelakpu yehüolak yang. Israel kahtalan-e tüopa ngaokeng lan-a ngoikülak hipak khongkümpu jingne anglak yang.

⁸“Imante itüoh, Israel nokphong me aohipawe, yejema-a, iman phei ngohpu yinpalan yo me aowe jakke dopu, yejema-a ülao toidopulan phalakei,

⁹hüyange tüopa Youngwanpa te dopu ja ne khümjing nyenok tafün shongte yeyah peipe ülao nyoilan me phalakei, tüopa kahta-o yoi kahta mepu winlak.

¹⁰“Israel nokphong me yejema-a iman yo me ngohpu yinpalan aowe iy hahlakei, iy hahpu kahta phei tüi-e Tao yonglak, hüyange I yoi kahtalan mepu winlak.

¹¹Hangjingne üyin ngohpu yinmok lili me üyin-a iy me ngohnang: hüyange tüojingne Youngwanpawe numante hüke iy khongkümpuwa kahtalan jing ünu yahteilak jingne wümjong me shokke tamtüoh she ngaokeng pha. Iy, hanghepa üyin ngohnang, tüowe ünu tantampu lingnang.

¹²Tüokhei Israel kahtalante Taowe iyangki: Numan yo me aowe-o iy yehahlak, yejema-a numan phei jam nyoipu yinpalane-o iy yehahlak.

¹³“Hüyange aope Israel hayimlan yo me aowe yejema-a iman yo me ngohpu yinpa aowe meite taiye hahlak yinmok yejema-a awha toiyalakei, hüma-a lye iy-a kahtokte winlak yang hüyange tüopate kahmak-e küppe tüohlak yang.

¹⁴Üyin ngohpu yinmok üshei üyin-a iy me ngohnang, tüojingne Youngwanpawe Israel kahtalante i, hüke iman-e iy yehahlak yang, aowe hüke hahlakei, I-a shaaji iman kahtalan yo mepu winlak.

¹⁵“Kahta aowe, Israel ne jeyah yejema-a yinpa kahta ne jeyah, aohiye iman nying nyingke lipu yinmok yejema-a phao yinmok-e toipu mei hahlakei, lye yoi nyemo shaolak, yeng yüolak, hüyange I wanglam me manjao manjao ün ngoiye tanlak.

¹⁶Hüpoi hüke yelingma-a, tüopa kaiye ngaipu ümeng Iye kilak.”