Read Konyak Naga LEVITOISHAO 18 Bible Online

LEVITOISHAO 18 - Konyak Naga bible

LEVITOISHAO 18

¹Youngwanpawe Mosate ngaowe i:

²Israel kahtalan te hüke itüoh, “Taowa numan Kahwang Youngwanpa.

³Numan hipak ja me ngohyangpu Egypt kahtalan-e lingpu kih-e numan-e tahling, yejema-a Taowe numan woipeilak ne ngohpu Kanan kahtok me ngohpu kahtalan-e lingpu kih-e numan-e tahling. Iman nyoingoh wanglam kih-e numan yekemlak yang.

⁴Ü-ngaokhümlan jaitüoh hüyange Taowe hanghe ngaokeng pha tüolan lingtüoh. Taowa numan Kahwang Youngwanpa ngohnang.

⁵Tüokhei taowe numante phapu linge jonlak lili hüyange ngaokhümlan jontüoh; hükih-e linge jonpu kaiye numan üyin yinpu oklak. Taowa Youngwanpa ngohnang.”

⁶Numan pheipu ao phei-o phwngngampu tahjon. Taowa Youngwanpa.

⁷Nangnyu phei phwngngampu linge, nangpate ye-i-yeshepe tahling. Yha-a nangnyu; yha phei tahpang.

⁸I jing ülao shekonyulan phei phwngngampu jingne nange nangpa mongmeng ne tahtam.

⁹Nang nyaheinao, nangpa üha jeyah, nangnyu üha jeyah, yejema-a nokme puhpu jeyah, yin ching me puhpu phei jeyah, tahphwng tahngam.

¹⁰Nange nanghulan phei tahphwng. Iman-a nangmepu yoi iy mei, hatüowe nang mongmeng ne ngaikülak.

¹¹Nange nangpa mepu nyuma ha phei tahphwng; yha-o nang nyanao muh ngohnang.

¹²Nange nang nyeilan phei tahphwng, hangjingne iman-o nangpa pheipu.

¹³Nange nangnyu Inya inaolan phei tahphwng, hangjingne iman-o nangnyu noksalan ngohnang.

¹⁴Nange nangpa jeiheinaolan jing shekonyu phei tahphwng; yha-o nangnyulan muh ngohnang.

¹⁵Nange nangha jing shekonyute wüolak tahjon; yha-a nenok nyemnyanyu ngohnang. Nange wüo tahpha;

¹⁶yejema-a nange nang jeiheinao sheko phei tahphwng.

¹⁷Nange phwng ngamyangpu sheko ütam ühalan phei yejema-a Ihulan phei nange phwngpu tahling; iman-a nang pheipu nyahmei ne mengne ok; hüyange tüowe mongmeng peine ok.

¹⁸Nang shekonyu üyin me ngohjang ngoh-e, nenok sheko ne Inya Inao paowe tahyah.

¹⁹“Nange yha lekeng lep iye iy taipu hipak me sheko phei tahpaa, hangjingne yha-a yejaope ngohnang.

²⁰Üjao kahta jing sheko phei nange tahpaa; hatüo kaiye nang nuweshakke tam phalak.

²¹Molech kahwangte yoppe khümwante jonlak jingne numan jing hayimlan aope-o tahpha; hangjingne tüopawe Youngwanpa Kahwang min mengne yah peilak.

²²Nange sheko phei jonpu kih-e netan phei aowe-o tah jon; Kahwange tüopate nunang.

²³Hüyange yinmok hanghe phei-o nange nang nying nyingke tüopa kaiye nuwetamlak üne tahpaa; yejema-a sheko aowe-o yinmokte phwngngamne tahtam. Tüokih-e teih-e lingpu kaiye nang nying nyingke nüweshakne tamnang.

²⁴“Nang nying nyingke hanghe-o tüokihpu me tah nu tahshak; hangjingne Taowe numan sheshao me jange teiye ngohpu jatlan iman nying nyingke tüokihpu nuweshak-e ngoh nang;

²⁵tüokaiye kahtok nuwe ngohnang; tüokih-e nushakpu jingne Taowe shaoshine tam, hüyange kahtok-e I kahta phaiye winnang.

²⁶Hüpoi numan sheshao me ngohpu jatlan kahmükke faiye winpu kih-e, numan-e hatüowe nuwe tamwante kahmükke yefai winlak jingne;

²⁷puhu jeyah numan phei ngohpu yinpalanne jeyah, ü-ngaokhüm hüyange taowe phapu jonlak yang, hüyange tüolan nulakpa hango tahling.

²⁸Hangjingne tüolan nulakpa khongkümpu numan shaome üwangne ngohpu kahtalan-e ling, hüyange kahmük nune tam-e ngohnang.

²⁹Hang- jingne aohipawe tüokihpu nunushepu toi ütamja nehoi linglakei, tüolan lingpu kahtalan iman kahta mepu wintamlak.

³⁰“Tüokhei Taowe lingne tampu ngaokenglan numan-e jonlak yang; hüke numan sheshao me ngohpulan nunushepu wanglam hango tahling, hüyange numan nying nyingke tüopa me nuwe tah tam; Tao Youngwanpa numan Kahwang ngohnang.”