Read Konyak Naga LEVITOISHAO 19 Bible Online

LEVITOISHAO 19 - Konyak Naga bible

LEVITOISHAO 19

¹Youngwanpawe Mosate ngaowe i,

²Israel khongkümpute itüoh, “Numan jaowe ngohyah; hangjingne Tao Youngwanpa numan Kahwang Üjao me ngohnang.

³Numan kahta liliye yoi nyu hei yoipate yihnoonlak yang, hüyange Taowe ngaokeng phapu kih-e numan-e Sabbath nyoilak yang. Taowa Youngwanpa numan Kahwang ngohnang.”

⁴“Mieng yekaote tahlüp yejema-a numan jingne peshao tahling. Taowa Youngwanpa numan Kahwang ngohnang.”

⁵“Aope numan-e shüppe jempu dopu Youngwanpate phalakei Taowe numante phapu ngaokenglan jontüoh, hümme nakshih numan-e dopu Taowe yahlak.

⁶Mei-a numan-e yinmok toipu nyih yejema-a ünepupa nyih me hahlak yang; lüm shepupa nyih ngoiye hanghe mei towe ngohlakei, hatüowa vün me jakke winlak yang;

⁷nyih lüm shepupa nyih me hah ma-a hatüowa yejao, hüyange ütam-e tüopa hahma-a, dopu ne phapu Taowe yeyahlak.

⁸Hüpoi kahta lili aowe tüopa hahlakei, lye ompu ünu ümeng kilak, hangjingne Youngwanpa üjao toi lye nuwe tamteki; hüyange tüopa kahta yoi kahta mepu winlak.”

⁹“Aope numan-e numan kah me tah yahlakei, nange nenok kah jeam shüp neipute ngoiye tah yeyahlak yang, yejema-a numan-e yeyah kümpu tüopa tah yahne tahye.

¹⁰Hüyange nange nenok wuwünglick kah me peye tüohpu shaine yeyelak yang; yejema-a yüm-e yeipu yetonlak yang; tüolan-a toihalan hüyange yinpalan jingne tüohtüoh. Taowa Youngwanpa nang Kahwang ngohnang.”

¹¹“Numan-e tahkuh; yejema-a lüppe lowe tahjon, yejema-a shejawe sheja phei ngaoleih tah i.

¹²Hüyange numan-e yejon oklakte ü-min me lowe lamme tahjieng, tüokih-e lingpuwe nang Kahwang ü-min nuwe tamnang; Taowa Youngwanpa nang Kahwang ngohnang.”

¹³Nange aohete-o lüppe lowe tahling, yejema-a nyiye tahyah: Nange nanshakpu nanpate nanmee yepha pe yaja nehoi tükke ye-anglak yang.

¹⁴Nange napanlante yephoilak yang, yejema-a mükmüopa sheshao me yashah hüolak ne ye-anglak yang, hüpoi nange nang Kahwangte nyamlak yang: Tao numan Kahwang Youngwanpa ngoh nang.

¹⁵“Numan-e ngao phün jing nyoi me ngaoting ye-i pu hango yelinglak yang; nange toihalante sheta tahlei, yejema-a üyonglan te ülaopake tahjon; hüpoi ngaotingpa phei nange nang yupipa ngao phüntüoh.

¹⁶Nange numan kahta yo me ngaolüp lopa ne menge lüngleiye yengohlak yang; aope kahta ütam I üyin jingne ngao phünpu yah-e ngohlakei, nange ngaokhüm-e jamlakne ngohma-a yelope ngaotüoh. Tao Youngwanpa ngohnang.

¹⁷“Nange nang mongjang me nang jeiheinao te yenulak yang: hüpoi I kaiye nange ünu ye-omlak jingne, I phei hanghe teiyemeipu ngoh ngaowe lanyang yah.

¹⁸Nange phuh yehahlak yang, yejema-a nange kahta hayimlan kaiye mongmengpu hango tah-ang, hüpoi nange yoi yupite yoi kih-e kenlak yang. Tao Youngwanpa ngohnang.”

¹⁹“Numan-e ü-ngaokhümlan jonyah, numan-e numan tampu yinmok ülam yoi yoi phei ühalan tahtam; numan-e numan kah me üli ülam ni yedeilak yang; yejema-a toilam yoi yoi ni nyütyange tak-e lingpu nyemo nang me ye inlak yang.”

²⁰“Kahta ütam-e rhanyu ja ülao kahtate phongphenyu ne yüohuwe janma-a hüpoi hatüo ülao kahtawe yha jingne yhamee manpha pune mengma-a, hüma-a tüopa nokpu hüyange rhanyu shüppe jaipu toi lingküma-a iman li ne yetamlak; imante shaoshi tampu pa phalak. Hangjingne yha-a I jing rhanyu muh ngohnang.

²¹Hüpoi lye yoi ünu dopu Youngwanpa tangte khümjing nyenok tafün shong te hüke nyeepong ja ünu jingne dopu yahpeilak yang.

²²Hüyange ngengpawe I jingne ünu dopu nyeeponge lye ompu ünu ümeng jingne Youngwanpa sheshao me ünu tantampu toishao linglak yang, hüyange Kahwange Ite ünu winlak.”

²³“Aope numan Kanan kahmükte peiye hahyinglak jingne pelick weanglick ülam üngang deiyalakei, lickpu ülicklan-a wangpeng lüm jingne manjaopu she teihyah. Tüopa hipak mongme numan-e tüolan-a yehahlak yang.

²⁴Hüpoi wangpeng peli shepupa me tüolan ülick üshei üjaone ngohlak, hatüowa Youngwanpa üte minyong dopu ne ngohkülak.

²⁵Hüpoi wangpeng nga shepupa me-a numan-e pelick-a hahne ok. Numan-e tüolan khongkümpu lingma-a, numan jing peelan-e ülick üngang licklak. Taowa Youngwanpa numan Kahwang ngohnang.”

²⁶“Numan-e mei hanghe-o iy omyange yehahlak yang. Numan-e ngoikülak juwan itlak jingne hüyange phongyengpu toi yelinglak yang.

²⁷Numan-e neikon-e shang tahlin yejema-a jumin tahsaye;

²⁸nange lipupa jingne nang püm me üko hango yeshalak yang, yejema-a nangme yepinlakpa hango yetulak yang; Tao Youngwanpa ngohnang.”

²⁹“Numan yhalalan üshoyüonyu ne menglak jingne phawe mongmeng ne tahtam; numan-e hüke lingne tama-a ülao kahwanglan tangte numan lüppe tainang hüyange kahmük-a nuweshak puwe maawe ngohlak.

³⁰Numan-e Sabbath nyüotüoh, hüyange ümeken me üte yoppekhüm nang yihnoonne angtüoh: Tao Youngwanpa ngoh nang.”

³¹“Numan-e litepulan jingne yimleine yejema-a yaha yam ne tahtai. Numan-e hükihpu lingma-a, lipu yaha te numan yejaope ngailak. Tao Youngwanpa numan Kahwang ngohnang.”

³²“Nange wupalan sheshao me yonglakyang, hüyange lwngmei khongkümpute wangshüm hüolak yang, hüyange nange nang Kahwangte yihnoonlak yang: Tao Youngwanpa ngohnang.”

³³Aope yinpa kahta ja numan phangme loiyange, kahmük me ngohlakei, numan-e Ite wümme, naowe tahling.

³⁴Numan phei loiyange ngohpu yinpa-a numan sheshao me numan yo me puhu kih-e ngohlak, hüyange numan-e Ite yoi kih-e kenyah; hangjingne numan Egypt kahtok me yinpa ja ne ngohyangki she teih tüoyah. Tao Youngwanpa numan Kahwang ngohnang.

³⁵“Numan-e püohpinne shempu me, toklak me, yejema-a phonge angpu me lowelamme yelinglak yang.

³⁶Khakshuwe shempu, khakshuwe tokpu, hüyange khakshuwe phonge angpu jontüoh. Tao numan Kahwang Youngwanpa ngohnang, hüyange Taowe numan Egypt mepu woipei yangki.

³⁷Hüyange numan-e ü-ngaokhüm khongkümpu hüyange ü-ngaokenglan khongkümpu anglakyang hüyange tüolan-a lingtüoh; Tao Youngwanpa ngohnang.”