Read Konyak Naga LEVITOISHAO 2 Bible Online

LEVITOISHAO 2 - Konyak Naga bible

LEVITOISHAO 2

¹“Aope ütam-e dolak jingne Youngwanpa tangte ülick hahying dopu phayalakei, lye üwangne tüopa dopuwa ankhoih ne menge shulak yang. lye tüopa tangme olive minnga hüyange sünyet shokke tamlak yang,

²hüyange tüopa-a Aaron hayim ngengpalan tangte yah peilak. Shaoshan-e ngohpu ngengpawe ankhoih hei minnga hüyange sünyet khongkümpu mepu yakpoih ja yahyange, dopu khongkümpuwa tüolan ne ngohkülak she kenne teihpu hüowe wümjong me jaklak. Hüke hahying dopu üpe ümeiye Youngwanpa mongmei tamnang.

³Hüyange dopu phayange towe ngohpuwa Aaron hüyange I hayimlan jingne ngohlak; tüopa-a Youngwanpate vünne dopu mepu ne menge yeonge jaopu toishao ngohnang.

⁴“Aope nange an lingpu wan me an ngüowe hahying dopu phayalakei, tüopa-a do yenyütpu ankhoih ümei olive minnga phei nyütyange yejema-a do yenyütpu anpe olive minnga phoyange yahlak yang.

⁵“Hüyange nange dopuwa anlingpu tük me ngüwpu ne mengma-a, hatüowa do yenyütpu ankhoih ümei, olive minnga phei nyütyange ngohlak yang;

⁶nange hatüowa khoihyange tüopa tangme minnga shokke tamlak yang; hatüowa hahying dopu ngohnang.

⁷“Hüyange nange dopuwa tükme ngüowpu hahying dopu phapune mengma-a, hatüo ankhoih ümei olive minnga phei nyütyange ngohlak yang.

⁸Hüyange tüolan hahying dopu ja ne nange Youngwanpa tangte yah peilak yang; hüyange hatüo ngengpa te phalak, hüyange lye hatüo wümjong te yahpeilak.

⁹Hüyange ngengpawe hahying dopu mepu teih tüolak jingne ütam yahpuwe, wümjong kenme jaklak; hatüowa Youngwanpate üpe ümei, vün phei dopu ngohnang.

¹⁰Hüyange hahying dopu phapu mepu towe ngohpuwa Aaron hüyange I hayim jingne ngohlak; hatüowa Youngwanpa tangte dopu mepu yahpu jingne yeonge jaopu toishao ja ngohnang.

¹¹“Hahying dopu, hanghepa numan-e Youngwanpa te doyalakei, hatüowa do phei yelinglak yang; hangjingne vün phei Youngwanpa te dopu me numan-e do yejema-a zahtai jelo yejaklak yang.

¹²Tüolan nange üwangpa pelick dopu ne Youngwanpate dopu ok; hüpoi tüolan-e üpe ümei jingne wümjong me yejaklak yang.

¹³Yelakpe hahying dopu lili me nange hüm phulak yang; hangjingne Kahwang hei nang ni pa me hüm kaiye jiengjeppu hüo nang. Nange dopu khongkümpu me nange hüm phuyange phalak yang.

¹⁴“Aope nange üwangne yahpu ülick mepu dopu Youngwanpate yah peilakeih, vün me ngüowyang phei ülick yejema-a hahyingne lingyang phei dolak yang.

¹⁵Olive minnga nyüt tüoh hüyange tüopa me sünyet nyüt tam tüoh.

¹⁶Teihtüolak dopu kih-e, ülick shuyang phei hüyange minnga hüyange sünyet khongkümpuwa ngengpawe jaklak; hatüowa Youngwanpate hahying dopu ngohnang.