Read Konyak Naga LEVITOISHAO 20 Bible Online

LEVITOISHAO 20 - Konyak Naga bible

LEVITOISHAO 20

¹Youngwanpawe Mosate ngaowe i,

²Israel lante itüoh: “Numan yo mepu ütam-e yejema-a numan phei nyoipu yinpa ütam-e aowe jajakihpu jeyahpoi yoihayimlan Molech kahwangte yoppe khümwante jonlak jingne phalakei, I-a ükhong nopuwe longe shüppe toilak.

³Hüyange kahta ütam-e yoihalan yo mepu ja Molech te phama-a hüyange ü-khümjing nyenok nu ne tamme hüyange Ü-üjao min mengne tamma-a, I phei tüi-e Tao yonglak hüyange shaaji I-a ü-kahta yo me omne yetamlak.

⁴Kahmük me ngohpa lan-e tüopa kahta yoi hayim Molechte phünne pha wante iman mük shiye mahküma-a, hüyange I li ne yetam ma-a,

⁵hüwante tüopa kahta hüyange I nok noksalan hüyange aoyin I phei jam iman phei tüi-e ümong shihpu ngohlak, hüyange iman yoi kahtalan mepu Molech pheite nuweshak-e woipu I hüyange khongkümpu phünne winlak. Shaaji Taowe iman-a ü-kahtalan ne yeyahlak.

⁶“Kahta ütam-e litepulan yaha yimleipa tangte taima-a, Tao I phei tüi-e yonglak hüyange shaaji I-a ü-kahtalan yo me ja she Taowe ye ilak.

⁷Numan nying nyingke phünne phatüoh, hüyange jaowe ngohyah; hangjingne Tao Youngwanpa numan Kahwang ngohnang.

⁸Ü-ngaokhümlan jontüoh, hüyange tüolan-a lingtüoh; hangjingne Taowa Youngwanpa hüyange Taowe numan jaowe tamnang.”

⁹“Kahta aowe yoipa yejema-a yoinyu phoiwümlakei üting me I-a li ne tamlak; lye Ipa yejema-a Inyu phoiwümpu jingne, I iy yoi shangtang me ngohlak.”

¹⁰“Netan aowe yoi yupipa shekonyu phei phwngngam lakei, phwngngampa hüyange phwngngamnyu moini li ne tamlak.

¹¹Aowe yoipa shekonyu phei meilakei hüyange yoipa wüotüo ne tamnang; moini li ne tamlakyang, iman iy yoi shangtang me ngoh lak.

¹²Kahta ütam-e yoiha sheko nyemnyanyu phei meima-a, imni moini li ne tamlak yang; iman ngayoun yangki, iman lipu ümenga iman-e kilak.

¹³Netan ütam-e netan phei muh sheko pheipu kih-e phwnge toi lingma-a, imni moiniye nulakpa toi lingteki; iman li ne tamlak; iman lipu ümenga iman-e muh kilak.

¹⁴Netan jawe I sheko phei Inyu-o omme sheko ne yahma-a, hatüowa nuweshakpu toi; numan yo me nuwe shakpu yengohlak nanjingne iman moilan lüm vün me jakke tamlak yang.

¹⁵Netan ja yinmok phei phwngngam ma-a, I li ne tamlak; hüyange numan-e yinmok-a toilak.

¹⁶Sheko ütam-e yinmok phei meima-a, numan-e shekonyu hüyange yinmok-a toilak yang; iman üting me li ne tamlak; iman iy iman tang me ngohlak.”

¹⁷“Kahta ütam-e yoi nyaheinao hüyange yoipa hei yoinyuwe puhpu shekone yahyange ngohma-a, hatüowa wüolakpa ngoh nang; iman yoi kahtalan sheshao mepu jange winlak yang; lye yoinya yejema-a yoinao phei meiyangki, tüokhei Iye yoi ünu kilak.

¹⁸Kahta jawe sheko ja phei yha lekeng lep ipu iy taiye ngohwante yha phei meima-a, imni moini ükhong yo mepu jange teilak, hangjingne imniye jaowe shawe angpu wanglam meng yangki.”

¹⁹Kahta jawe Inyeilan hüyange Inyujoi hei Inyuyonglan phei meima-a, tüopa me ngaipu ümenglan imni moi niye kilak.

²⁰Kahta ütam-e yoipa üyong hei üjoilan shekonyu phei phwngngam ma-a Iye yoi payong hei yoipa joilan wüotüone tamnang; iman-e yoiye ompu ünu kilak, hüyange iman ha-nao yetüope lilak.

²¹Kahta ütam-e yoi jeiheinao sheko yahma-a, hatüowa yejaopu ngohnang; lye yoi jeiheinao ütahte ngaiye wüotüone tamnang; iman ha-nao yenanglak.

²²“Taowe hanghe me numan angtamlak jingne woi pei, tüopa kahmük-e numan faiye yewinlak jingne; ü-ngaokhüm khongkümpu, ü-ngaophünpu khongkümpu numan-e tükke angtüoh; hüyange tüolan-a jontüoh.

²³Numan sheshao me jange teipu jatlan wanglam kih-e numan-e tahkem; hangjingne iman-e tüolan khongkümpu ling, tüokhei taowe imante nu.

²⁴Hüpoi Taowe numante ngaoyangki, ‘Numan-e iman kahtok mothleilak, hüyange düamyeng hei zahtai jelo yünne ngohpu kahtok, hatüo numan jingne menglak Taowe numante yahphalak;’ jatlan mepu numan yanne tampu Youngwanpa numan Kahwang Tao ngohnang.

²⁵Tüojingne numan-e jaoshapu yinmok yejaopu mepu, hüyange yejaopu awha jaoshepu phei yan-e tamlak yang; hüyange yinmok-e, yejema-a awhawe yejema-a numan mepu yejaopu leye angpu kahtok me leh-e kempu hanghe-o numan yaha nulakpa ne menge tahtam.

²⁶Numan üjingne üjao me ngohyah; hangjingne Tao Youngwanpa üjao me ngohnang, hüyange numan üjingne menglak jingne jatlan yo mepu Taowe numan yanne tamyangki.”

²⁷“Netan jeyah sheko jeyah, hileipu yejema-a phongyengpu ütingme li ne tamlak yang; iman-a longe shüppe toine tamlak yang; iman iy iman tangme ngohlak.”