Read Konyak Naga LEVITOISHAO 21 Bible Online

LEVITOISHAO 21 - Konyak Naga bible

LEVITOISHAO 21

¹Youngwanpawe Mosate i: Aaron hayim ngengpalan te tüopa ngao itüoh; “Ngengpa aowe-o yoi nying nyingke yoi pheipulan lipu manglünge taiyange üjao toishao nuwe shak-e yetamlak yang;

²Inyu, Ipa, Iha, yoiha sheko yha, hüke nyahmei ja jeiheinao ne yejepute,

³yejema-a yoinok me ngohpu nokne manmengpu yoinao sheko yha üjepute ye-omlak yang.

⁴I pheipu noksa kahta she teihyange iman lipu me ompu kaiye I yoi nying nyingke nuweshak-e yetamlak yang.”

⁵“Ngengpa aowe-o I shappe yoong nangki she hüowe yoi shang linne, yejema-a jumin shayange, yejema-a iman püm me ngohpu ümin hango yelinlak yang.

⁶Iman jaowe ngohlak wongpong hüyange ü-min ye-i-yeshepe yelinglak yang. Iman-e üte hahying dopu phanang, hüyange iman üjaopa me ngohlak wongpong.

⁷Ngengpa jawe üsho yüonyu ne ngoh yangphei sheko yejema-a wang ngoiye yenangpu sheko yejema-a netan-e yanne tamyangphei sheko yeyahlak yang; hangjingne iman-a üjao kahta.

⁸Kahtalan-e ngengpa-a üjao kahta she iyeshelak wongpong, hangjingne lye üte hahying dopu phanang. Taowa Youngwanpa; Taowa üjao me ngohnang, hüyange Taowe ü-kahtalan jaowe linge tamnang.

⁹Ngengpa ja üha naoyha üsho yüonyu ne mengma-a, yhawe yoipa wüotüo ne tamnang; tüokhei yha-a vün me jakke toilak yang.

¹⁰“Ütahpa Ngengpa-a I shangme minnga yei-e phowe jao yang phei hüyange ngengpa nyemo yahlak jingne jaowe tümyang phei ngohnang, tüokhei Iye yoi shang yeshaipe lanne ye-anglak yejema-a I shappe yoong nangki she hüowe inkhek yehitlak yang.

¹¹Yejema-a yoipa jingne yejema-a yoinyu jingne yoi nying nyingke nuwe, lipu mang hanghe shongte-o I yewenlak yang;

¹²yejema-a Iye khümjing mepu yengailak yang, yejema-a I Kahwang khümjing yenutamlak yang; hangjingne I Kahwang minnga phowe leye phünne phapu I tangme ngohnang; Tao Youngwanpa ngohnang.

¹³Hüyange Iye wangngoipu naoyha shekonyu ne yahlak yang.

¹⁴Wamnyu yejema-a yanne ngohpu sheko, yejema-a üsho yüonyu ne ngohyangpu sheko, yejema-a phwngngampu sheko, tüolan kihpu lye yeyahlak yang; hüpoi yoi kahta mepu wange ngoipu sheko Iye sheko ne yahlak yang;

¹⁵tüokhei iman kahta yo me I hayim yenu yeshaklakyang. Taowa Youngwanpa, Taowe I jaotam.”

¹⁶Youngwanpawe Mosate ngaowe i,

¹⁷“Aaronte itüoh, Nanghalan yo me pümta me tah tüopu ao ne menglakei mengyapoi jin kümme I Kahwang jingne an dolak owe peine tahtam.

¹⁸Hangjingne aohe kahta me yewang yengoipu ngohlakei, I yepeilak yang; mükmüopa jeyah, yafaipu jeyah, ülamja yewangpu sheta jeyah, yak hei ya laopu jeyah,

¹⁹yejema-a yafaipa yejema-a yakshokpa ne jeyah,

²⁰tokkokpu jeyah, nyinha jeyah, yejema-a mük maa pheipu yejema-a sho maa pheipu jeyah; yejema-a lingyangpu kahta ne jeyah;

²¹Aaron ngengpa hayim aowe-o vün phei Youngwanpa jingne dopu phapu ü-o-te yewenlak yang; I me tahtüo tepuwe lye yoi Kahwang jingne hahying dopu ü-o me yepeilak yang.

²²Iye yoi Kahwang jingne dopu an, shejaopupa nyoi yejema-a jaoshapu nyoilan mepu hahne ok;

²³hüpoi ü-khümjing Iye yenutamlak jingne I jhotnye shongpu nyoite ye-onglak, yejema-a wümjong ü-o-te yewenlak yang, hangjingne I me yewangpu ngohnang; hangjingne numan jaowe angtampu Kahwang Tao ngoh nang.”

²⁴Tüokhei, Mosawe Aaron hüyange I hayim, hüyange Israel kahtalan üsheite tüopa ngaowe tam.