Read Konyak Naga LEVITOISHAO 22 Bible Online

LEVITOISHAO 22 - Konyak Naga bible

LEVITOISHAO 22

¹Youngwanpawe Mosate ngaowe i:

²“Aaron hüyange I hayimlante ngao phatüoh; shejaopupa dopulan Israel kahtalan-e üte yihnoonpu phei phünne phapu ü-min tangme numan-e ye-i-yeshepu yah yepeilak yang. Taowa Youngwanpa ngohnang.

³Imante itüoh; ‘Numan huhayimlan yo mepu ütamja, I yejao yeshape ngohwante, Israel kahtalan-e üte hanghepa shejaopupa dopu phapu shongte owe peilakeih, lye shaaji nishe aope-o wümjong me shaoshanne ye-oklak. Tüopa-a jin khongkümpu jingne hüke jonlak. Taowa Youngwanpa.

⁴Aaron huhayimlan yo me ao me sho maa ngoh yejema-a üdi (üyieng) taiye shangpu hipak me ngoh I ütingpa me jaowe mantampute üjaopa me dopulan hango yehahlak yang. Ngengpa aowe kahta mangte jonne paipu yejema-a I me pongyeng ngaipu jonyangki,

⁵yejema-a Iye yejao yeshapu yinmok yejema-a kahtate jonyangpu ne mengma-a I-a yejaopu.

⁶Ngengpa ao yejao yeshape ngoh, ünpong ngoiye yejaope ngohlak yang, hüyange I yeng manyüo manyüo she üjaopa dopulan hango yehahlak yang.

⁷Wanghe nyip pheima-a I-a jaopu, hüyange tüophei ma-a üjaopa me dopulan hangheyin I jing hahying ne ngoh, Iye hahne ok.

⁸Iman nying nyingke lipu yejema-a phao yinmok-e toipu yinmok mei Iye yehahlak yang; tüowe Ite yejao yeshape ngailak. Taowa Youngwanpa.’

⁹“Ngengpalan-e Taowe phapu ngaokenglan jonlak yang. Hüke yejonma-a, iman-a püohpu hüyange lilak, hangjingne ima-a üjaopa ngaokenglan iman-e yejon. Taowa Youngwanpa hüyange Taowe iman jaowe tam.”

¹⁰“Ngengpa noksa ne üjepu lan-e üjao dopulan-a hahne ye-ok; ngengpa phei ngohpu ütam ja ne jeyah yejema-a lye nan shakke angpu ne mengyah aowe-o tüolan-a hahne ye-oklak.

¹¹Hüpoi Iye yoi ngin phawe shakpu ngengpa jing rhapa yejema-a inok me puhpaipu lan-e ngengpawe tüopongpu hahying hahne ok.

¹²Ngengpa nok yhala ngengpa ne yemengpu ütam ja phei nokne menge ngohma-a üjaopa dopulan hango hahne ye-oklak.

¹³Hüpoi wamnyu ja ne mengeyepu yejema-a ha nao yenangpe inokte leih ye ne tamtüoh-e yoipa nok me ye ngohpu yhawe ngengpa ja ne menge yoipawe tüopu hahying hahpu oklak. Ngengpa noksalan-e hei tüolan hahyinga hahpu oklak.”

¹⁴“Ngengpa nok me yejepu kahta ütam jawe yeshingpe üjaopa dopulan hah ngohma-a, tüo tokte meitam üphong da paoyange ngengpate Iye shümme yelak yang.

¹⁵Hahne yetampu kahtalan-e tüolan hahne tam-e, ngengpa lan-e üjaopa dopulan nu ne yetamlak;

¹⁶hüke hahyingpu kaiye tüopa kahta tangme püohpinpu hei shaoshi yatengpu yah peilak. Taowa Youngwanpa hüyange dopulan-a Taowe jaowe tamnang.”

¹⁷Youngwanpawe Mosate ngaowe i:

¹⁸Aaron hei I hayimlan hüyange Israel kahtalan te tüolan linglak jingne ngao phatüoh; Aope Israel lan-e jeyah yejema-a Israel me nyoipu yinpalanne jeyah jakke dopu phayalakei, jiengjeppu lingpu ne jeyah yejema-a mongloonge dopu ne jeyah, yinmok me tah tüopu hango yenanglak yang.

¹⁹Yah oklak jingne, tüopa-a üko üshang hango yenangpu yinmok yejema-a nyee yejema-a youn üpongne menglak wongpong.

²⁰Numan-e üko üshang üjingha nehoi ngohpu yinmok doma-a, Youngwanpawe tüopa-a yeyahlak.

²¹Aope kahta ütam-e shüppeshapu dopu Youngwanpa te yah peilakeih, jiengjeppu lingpu ne jeyah yejema-a mongloonge dopu ne jeyah, tüopa yahne tamhupu ne mengma-a üko üshang hango yenangpu yinmok ne menglak yang.

²²Youngwanpate mükmüo tephei yejema-a yafai tephei yejema-a fainyok tephei yejema-a maa ngaipu yejema-a üsho khokte phei yejema-a ütu pheipu yinmok hango dopu tah pha. Hükihpu yinmok hango wümjong me jakke dopu ne yedolak yang.

²³Mongloong dopu ne numan-e yewang yengoipu yejema-a khakshuwe yejongpu yinmok do ne ok, hüpoi tüopawe jiengjep yangpu linge tampu ne yeje.

²⁴Hanghepa yinmok jing üyieng paiyang, metyang, phütte paiyange, yejema-a phünne yeiteiye ngohlakei Youngwanpate tah do.

²⁵Hahying dopu ne ülao jatlan mepu yahpu yinmok hanghe-o tah do. Hükihpu yinmok-a yewang yengoipu ne ilak hüyange tüolan-a yeyahlak.

²⁶Youngwanpawe Mosate ngaowe i,

²⁷“Aope mahu üpongha yejema-a nyee yejema-a younha puhlakei, nyih nyit mongme ünyulan mepu iman yeyan tamlak yang, hüyangpoi tüophei pama-a hahying dopu ja ne tüopa-a yahpu ok.

²⁸Nyih ja me mahu ünyu hei üha yejema-a nyeenyu hei nyeeha yejema-a younnyu hei üha jamme toidopu tahpha.

²⁹Aope numan-e Youngwanpate minyong phapu toidolakei, wanglam khakshuwe jontüoh, hüma-a numan-e dopu yah oklak;

³⁰tüopa-a tüonyih muh hahtüoh hüyange ünenap ngoishao me hango towe tahtüoh.

³¹“Youngwanpawe i, ü-ngaokenglan jaiyah, Taowa Youngwanpa ngohnang.

³²Ü-üjaopa min tangme wüotüo tampu yah tah pei; Israel kahtalan khongkümpuwe üte üjaopa she shinge yahlak yang. Taowa Youngwanpa hüyange Taowe numan üjao ne menge tamnang;

³³hüyange numan jing Kahwangne Tao menglak jingne Taowe numan Egypt mepu yah pei yangki. Taowa Youngwanpa.”