Read Konyak Naga LEVITOISHAO 23 Bible Online

LEVITOISHAO 23 - Konyak Naga bible

LEVITOISHAO 23

¹Youngwanpawe Mosate ngaowe i:

²Israel kahtalan phei ngaotüoh hüyange imante itüoh: “Tüolan-a Youngwanpawe leyahpu molan hüke numan-e üjao shüpjem-e taowe lepu molan she pongtamlak yang.”

³Numan toishao linglak jingne nyih wok ngohnang, hüpoi nyit shepupa nyih-a Sabbath, toloi meilak nyih ngohnang. Tüo nyih toi tahling, hüpoi yoppe khümlak jingne shüppe jemtüoh. Nang ümeken me ngoh shulakei hangne-o yeje, Sabbath-a Youngwanpa jing.

⁴Tüolan-a Youngwanpa jingne leye ngaipu üjaopa me tüm-e tawe jempu mo ngohnang; numan-e iman jingne leye ngaipu hipak ja me ponge tamtüoh.

⁵Youngwanpate yihnoonpu Yinyepu mowa, üwangpa leat tepu nyih pen me peli shepupa nyih wanghe nyip phei me ükong wanglak.

⁶Hüyange Do yenyütpu an mowa nyih pen me nga shepupa nyih me wanglak, hüyange nyih nyit mong jingne numan-e do nyütyangpu an hango yehahlak yang.

⁷Tüopa üwangpa nyih hipak me numan-a yoppe khümlak jingne shüppe jemlak hüyange numan-e nyih jeih linghümpu toi hango yelinglak.

⁸Numan jing hahying dopu nyih nyit mong jingne Youngwanpate phatüoh. Nyih nyit shepupa nyih me yoppe khümlak jingne numan üne-o jemlak, hüpoi numan-e nyih jeih linghümpu toishao hango numan-e yelinglak yang.

⁹Youngwanpawe Mosate i;

¹⁰“Israel kahtalan phei ngaotüoh hüyange imante itüoh; Taowe numan te phapu kahmükte aope numan ngoilakei hüyange numan-e numan jing tahlick yah yalakei, üwangpa tah yakshüpa Ngengpate yah peitüoh.

¹¹Iye tüopa-a Youngwanpa te dopu ümei ja ne yah peilak, tüo kaiye numan-a yahne oklak. Ngengpawe tüopa-a Sabbath nyih phei me yah peilak.

¹²Numan-e tahlick yahpeiye dopu nyih me, tüophei üne-o üko üshang yenangpu wangja nao nyee ha ja jakke dopu ne dotüoh.

¹³Tüophei jam-e numan-e hahying dopu ne olive minnga phei nyütyang phei an kilogram ni yah peitüoh. Tüopa dopu üpe ümei-a Youngwanpa jingne meipu ja ne ngohnang. Numan-e tüophei jam-e wuwüngti litre ja dopu yah peilak yang.

¹⁴Numan-e tüopa dopu Kahwangte yah manpei pute tahlick üla ühüng me jeyah ngüwyange jeyah yejema-a an ne lingyange jeyah hango tah hah. Tüopa ngaokenglan-a numan jing huhayimlan khongkümpuwe ngoikülak hipak khongkümpu jingne jonlakpa.

¹⁵“Sabbath phei me, numan-e tahyakshüp dopu ne peipu hatmong nyit khakshuwe itüoh.

¹⁶Nyit shepupa Sabbath phei me nyih denga itüoh, hüyange Youngwanpate ülick üla yah peilakyang.

¹⁷Noksa phe puwe anbung nipong yah peilak hüyange Youngwanpate hünghao ümei ne tüolan-a phalak. Anbung ja ja-a ankhoih kilogram nipong yah yange do phei nyütte linglak hüyange üwangne yahpu tahlick tepu dopu ne Youngwanpate yahpeilak.

¹⁸Hüyange anphei jam-e ükhonge üko üshang hango yenangpu wangja nao nyeeha nyit, mahu üpong ja, hüyange younpong ni yah peilak yang. Tüolan-a Youngwanpa te jakke dopu ja ne tahlick dopu hei wuwüngti dopu phei jam-e dolak yang. Youngwanpa jingne tüopa dopu üpe-a meipu ja ne ngohnang.

¹⁹Üne-o ünu dopu ne younpong ja hüyange shüppejempu dopu ne wangja nao nyee pong ni do tüoh.

²⁰Ngengpawe nyeeha ni-a Youngwanpa sheshao me yakyüp-e dopu ja ne, üwangpa ülick an phei jam-e dolak. Tüolan-a ngengpa jingne Youngwanpate üjaopa me dopulan.

²¹Tüopa nyih me numan-e nyih jeih lingpu toishao hango tahling, hüpoi yoppe khümlak jingne jemtüoh. Numan jing huhayim lan-e ngoikülak jin khongkümpu me tüopa ngaokenglan jonlakpa.

²²“Aope numan-e numan jing kah yahyalakei, kah jeam ngoiye tah tahwet, hüyange numan-e peye tüohpu yakpa wetne leih tahye; tüolan-a toihalan hei yinpalan jingne tüotüoh. Taowa numan Kahwang.”

²³Youngwanpawe Mosate ngaowe i,

²⁴“Lekeng nyit shepupa üwangpa nyih-a yihnoonne toloimeiye nyoilak yang, hüyange nyawong wünge yoppe khümlak jingne jamshe shüppe jemtüoh.

²⁵Youngwanpate jakke dopu yahpei tüoh hüyange numan-e nyih jeih linghümpu toishao hango tahling.”

²⁶Youngwanpawe Mosate ngaowe i,

²⁷“Sha-a lekeng nyit nyih pen shepupa nyih-a kahtalan jing ünu jaowe tantampu nyih ne menglak. Tüopa nyih me hango tah hah; yoppe khümlak jingne shüppe jemtüoh, hüyange Youngwanpate jakke dopu yah peitüoh.

²⁸Tüopa nyih me toi tahling, hangjingne tüolan nyih-a ünu yahteilak jingne numan Kahwang Youngwanpa sheshao me tantampu lingpu nyih ngohnang.

²⁹Ütamjawe tüopa nyih me ülam ja nehoi hahma-a, I-a Kahwangpa kahtalan yo me ja she shaaji ye omlak.

³⁰Hüyange tüolan nyih me ütamjawe toi ülam ja nehoi lingma-a, Youngwanpa lye tüopa kahta-a li ne tamlak.

³¹Tüopa linglak toishaowa iman ümeken me ngohlakei ngohyapoi numan jing huhayimlan khongkümpu jingne ngohlak.

³²Tüopa-a numan jingne yihnoonne toloimeipu Sabbath ne menglak, hüyange numan nying nyingke shangne tamlak; Lekeng tepu nyih tu shepupa ünpong me ükong wange, ünpong mepu ünpong ngoiye numan-e Sabbath anglak yang.”

³³Youngwanpawe Mosate ngaowe i,

³⁴“Israellan te itüoh; Peamsheam mo lekeng nyit nyih pen me nga shepupa nyih me wanglak hüyange nyih nyit jingne yelakpe ngohlak.

³⁵Tüolan nyih üwangye me yoppe khümlak jingne jamshe shüppe jemtüoh hüyange numan jing nyih jeih toishao hango tahling.

³⁶Nyih nyit mongme numan-e nyih jeih jakke dopu yah peitüoh. Nyih tet shepupa nyih me üne-o yoppe khümlak jingne jamshe shüppe jemtüoh hüyange jakke dopu yah peitüoh. Tüopa-a yoppe khümlak nyih, hüyange numan-e hang toishao-o tah ling.

³⁷“Tüolan-a mengpu wanglam me mopulan hanghepawe numan-e yoppe khümlak jingne jamshe shüppe jempu kaiye hüyange hahying dopulan, jakke dopulan, tahlick dopulan, toidopulan, hüyange wuwüngti dopulan nyih jeih hangshin wongpongne meng tüolan kaiye numan-e Youngwanpate yihnoon nang.

³⁸Tüolan mopulan-a yeshaipe Sabbath ngohyang pheite paopu, hüyange tüolan dopulan-a numan-e yeshaipe hünghao phayang pheite paopu, dopulan-a numan-e janyangpu ütahte ngaitampu hei, hüyange numan-e mongloong dopulan-a numan-e Youngwanpate phapu lan ngoh nang.

³⁹“Aope numan-e numan jing kah yahya lakei, lekeng nyit shepu nyih pen me nga me wange Youngwanpate tüopa mo nyih nyit jingne ngoh tüoh. Üwangpa nyih-a lanshe toloimeipu nyih hüyange tet shepu nyih lanshe toloimeipu nyih ne menglak.

⁴⁰Tüopa nyih me numan jing pee mepu shemeipupa pelick ütam yahtüoh, log yak ütam yahtüoh hüyange üyak ngüt-shappu peequi ütam yahtüoh, hüyange numan Kahwang Youngwanpate yihnoon ne nyih nyit mongme ngohtüoh.

⁴¹Tüopa-a nyih nyit jingne Youngwanpate mo tüoh. Tüopa linglak wanglam-a numan jing huhayimlan-e ngoikülak hipak khongkümpu jingne tükke anglak.

⁴²Israel kahtalan khongkümpu nyih nyit jingne peamsheam mo ngohtüoh hüyange peamsheam mo nyoitüoh.

⁴³Tüokaiye numan huhayimlan-e aope iman Egypt mepu yahtei yapeih Israel kahtalan-a peamshem me Youngwanpawe ngohne tam she shinglak. Tao numan Kahwang Youngwanpa.”

⁴⁴Tüokhei hükih-e Israel kahtalante Youngwanpa te yihnoonne mengpu wanglam mo ngohlak jingne Mosawe linge jonlak wanglam pha.