Read Konyak Naga LEVITOISHAO 24 Bible Online

LEVITOISHAO 24 - Konyak Naga bible

LEVITOISHAO 24

¹Youngwanpawe Mosate ngaowe i:

²Israel kahtalante ngao tamtüoh: Vüntüklan jingne shemeipupa jaoshepu olive minnga yah peitüoh, hümme nakshih vün-a yelakpe pah ngohlak.

³Yajeih she Aaron-e tüolan-a pahtamlak hüyange jhotnye ü-atye Youngwanpa ompu Ngaokhüm ghonu hanghepa üshei phei shejaopupa nyoi shao me wang manngai manngai she tüolan-a pah anglak. Tüopa ngaokenglan-a ngoikülak jin üshei me jonlakpa.

⁴Jaoshepu hon vüntük yongjing mepu vüntüklan te Aaron-e paowe tüklak hüyange Youngwanpa sheshao me tüolan-a yephünpe pah angya shi she leilak wongpong.

⁵Ankhoih kilogram pen me ni yahtüoh hüyange anbung pen me ni ne lingtüoh.

⁶Anbung üleng ni ne, üleng ja me wokpong, jaoshepu honne lingpu khao, hanghepa Youngwanpa sheshao me ngoh nang tüo me angtüoh.

⁷Youngwanpate jakke dopu teihtüowe an angpu nyoijing yahlak nanjingne, üleng lep iye jaoshepu sü angtam tüoh.

⁸Ngoikülak hipak üshei me, Sabbath lep iye, an-a Youngwanpa sheshao me ange tamlak yang. Hatüowa jintepu jingne Israellan toishao.

⁹Tüopa an-a Aaron hüyange I huhayimlan jingne menglak, hüyange iman-e tüopa-a üjao nyoi me hahlak, hangjingne ima-a hatüowa Youngwanpate ngengpalan jingne dopu hahying shejaopupa meitam ngohnang.

¹⁰Sha-a kahtaja ngoh yangki, Ipa-a Egyptlan hüyange Inyuwa Israellan Dan jat mepu Dibri üha Shelomith she minpu ne ngoh. Tüoye lakjing me tüopa kahta-a Israellan sheja phei teyangki.

¹¹Hüke tewante Iye Kahwangte phoiwüm, tüokhei iman-e I-a Mosa tangte yah pei;

¹²I-a yomyange ang, hüyange Ite hangke linge tamlak imante ngaowe tamlak nanjingne Youngwanpa jingne tanne ngoh yangki.

¹³Youngwanpawe Mosate ngaowe i,

¹⁴“Tüopa kahta lakjing mepu yah teitüoh. Iye püohpu üja she hüolak jingne Iye phoiwümpu aoyinne jaiyangki moilan-e yoi yoi yak tüopa kahta shang me shünglak, tüophei me ükhong moilan-e Ite longe shüppe toilak.

¹⁵Tüophei me Israel kahtalante itüoh aowe Kahwangte phoi wümlakei tüopa jingne shangne tamlak, hüyange li ne tamlak wongpong.

¹⁶Israellan ao ne menglakei mengyapoi yejema-a Israel me nyoi ngohpu yinpa kahta ao ne menglakei mengyapoi aowe Youngwanpa te phoiwüm lakei ükhong nopuwe longe shüppe toilak yang.”

¹⁷Aowe kahta toilakei ao ne jelakei jeyapoi li ne tamlak.

¹⁸Aowe yinmok toilakei Iye tüopate shüm-e yelak wongpong; üyin nanleiye üyin.

¹⁹“Kahta ütam-e ülao kahta ja te mako sa tamma-a, Iye hanghepake linge tam hüke Ite-o linge tamlak yang,

²⁰waan phak tampu jingne waan, mük nanlei mük, fa nanlei fa. Kahta ja te hangkipu ükolan satam hüke muh Ite shümme yelak yang.

²¹Aoyinne yinmok toi tamlakei, tüopate-a shümme yelak yang, hüpoi aoyinne kahta toitam I-a li ne tamlak yang.

²²Tüopa ngaokhüm-a Israellan hüyange numan phei nyoi ngohpu yinpalan numan khongkümpute jonlak, hangjingne Taowa numan Kahwang Youngwanpa.”

²³Tüophei me Mosawe Israel kahtalante tüopa ngaowe tam, iman-e kahta-a lakjing ü-atye te yah yüo hüyange longe shüppe toi. Tüo kih-e Mosate Youngwanpawe hanghe ngaokeng pha Israel kahtalan-e lingyangki.