Read Konyak Naga LEVITOISHAO 25 Bible Online

LEVITOISHAO 25 - Konyak Naga bible

LEVITOISHAO 25

¹Sinai kahtang me Youngwanpawe Mosate ngaowe i,

²Israellante ngaotüoh hüyange imante itüoh: “Aope numan taowe numante phane ngohpu kahmükte onglakeih, kahmük-e Youngwanpa jingne Sabbath ngohlak.

³Wangpeng wok jingne numan kah me deilitüoh, hüyange wangpeng wok numan-e wuwüngkah manwai yange, ülick khaitüoh.

⁴Hüpoi nyit shepupa wangpeng kahmük-e Sabbath toloimeilak, Youngwanpate Sabbath ngohlak. Numan kahme deilipu yejema-a wuwüngkah manwaipu tah ngoh.

⁵Yedeipu te iman nying nyingke ngaipu ülicklan nehoi tahyah, hüyange numan-e yehampute ngaipu wuwüng wu mepu wuwünglick-o tah khai; hatüowa kahmük jingne lanshe toloimeipu wangpeng.

⁶Tüopa wangpeng me kahmük me kah yeham yapoi, numan jingne, numan jing rhapalan jingne, numan-e nanshakke angpalan jingne, numan phei nyoi ngohpu yinpalan jingne,

⁷numan-e nokme tampu yinmoklan jingne, hüyange numan jing kah me ngohpu phao yinmoklan jingne hahying phakülak. Tüopawe ngaiye tampu lili hahne oklak.”

⁸“Numan-e wangpenglantepu hat nyit itüoh, wangpeng nyit mongme nyit nyit me itüoh, tüome wangpenglantepu hat nyit monge wangpeng deli me tu ngohlak.

⁹Tüophei me leat nyit nyih pen shepupa me tantampu nyawong wünglak; numan-e numan kahmük nopu me nyawong wüngtamlak.

¹⁰Tüokih-e numan-e denga shepupa wangpenga tümme ngailak hüyange kahmük nopu mepu kahtalan khongkümpu te ta-ngai ponge tamlak. Tüopa wangpeng mongme yüowe tamyang phei mothlan khongkümpu nokpu ülang yejema-a I huhayimlante leih yene tamlak, hüyange ütamja rha ne yüoyange ngohma-a I noksalan yamme yene tamlak.

¹¹Wangpeng denga shepupa-a numan jingne Jubilee; Numan-e numan kahte yedeilak yejema-a iman nying nyingke ngaipu ülick yeyahlak, yejema-a yehampute ngaipu wuwünglick yekhailak.

¹²Hangjingne hatüowa Jubilee, hatüowa numan jingne üjaopa kah mepu hanghepa iman nying nyingke ngaitam tüo hei numan-e hahlak.

¹³“Tüopa Jubilee wangpeng me kahta lili yoi moth tangte leihyelak.

¹⁴Aope numan-e numan yupi pate kahtok yüolakei yejema-a I mepu kahtok shak lakei, lüplo-e tahling.

¹⁵Aope nange yupipa mepu shaklakei, ünepu wangpeng me yah yeshao me kahmük-e wangpeng hangshin mongme ülick ngaitam lakei, tüopa tok-e leiyange ümee-a itlak yang.

¹⁶Wangpeng nangjange ngohpu ne mengma-a, ümee-a yonge ngailak, hüpoi wangpeng üten ja hei ngohpu ne mengma-a, ümee-o shoiye ngailak, hangjingne ima-a hanghepa yüoyangki kahmük-e ülick ngaitampu shinne ngoh yangki.

¹⁷Yoi pheipu Israel pate lowelam-e tahling, hüpoi nang Kahwang te nyam yah, hangjingne Taowa nang Kahwang Youngwanpa.”

¹⁸“Youngwanpa jing ngaokhüm hüyange ngaokenglan khongkümpu jaitüoh, hümme nakshih kahmük me numan yenyampe nyoipu oklak.

¹⁹Kahmük-e yoi mepu ülick ngaitamlak, hüyange numan-e yahhuwe teipu khongküm hahne tüolak hüyange yenyampe nyoipu oklak.

²⁰“Numan ütam-e kah me hango yedeipute hüyange ülick hango yeyah jempute wangpeng nyit shepupa me teman-e hanghe hahlak she tongne ok;

²¹Taowe numante wangpeng wok shepupa me moiman üyong shonlak, tüokaiye kahmük-e wangpeng lüm jingne ülick ngaitamlak.

²²Aope numan-e wangpeng tet shepupa me numan kah me üli deilakei, wangpeng wok shepupa me yowe angpu yelakpe hah ngohlak, hüyange tu shepupa wangpeng manngoi manngoi ülang hahlak.”

²³“Kahtok-a jintepu jingne yeyüolak, hangjingne hatüowa nange angpu ne yeje, tüopa-a Üjing, hüyange numan-a tüopa jonne tampu yinpalan kih-e hei ngohnang.

²⁴“Numan moth ne ngohpu kahmük nopu me, numan-e kahtok jingne shümyepu phalak yang.

²⁵“Israel yo me ja toinanpa ne mengma-a, hüyange I jing kahtok yüolak ne kangpu ne mengma-a, I pheipu ütam yo me shejawe, tüopa-a shak-e yelakyang.

²⁶Tüopa shak-e yelak jingne kahta me jeihei nao yenangpe ngoh, phei me jalun-e ngaine ok hüyange I nying nyingke tüopa shak-e yelak wangman-e ngohne ok.

²⁷Hüke ngaima-a aowe tüopa shakyapeih tüopa kahtate Iye shak-e shinne yepu wangpeng manngoi pu mongtepu jingne shujange ngin phalak, aope Iye oklakei shupu hipak ja me Iye yoi kahtok-a tüowe yelak.

²⁸Hüpoi I me kahtok shak-e yepu oklak ne wange ngin yenang ma-a, ünepupa shak-e shinne yepu wangpeng manngoi manngoi aowe tüopa kahtok shakyapeih Iye muh paowe tük-e anglak. Jubilee wangpeng me hei nokpu ülangte tüopa-a leihye-e tamlak.

²⁹“Kahta jawe chingtuk pepeyang phei mongmepu nok ja yüoma-a, I yüoyangpu nyih mepu üwangpa wangpeng ja ngoipu mong me Iye shak-e yepu oklak.

³⁰Hüpoi wangpeng ja mongme Iye shak-e üye küma-a, Iye nishe shak-e yelak ülam mahnang, hüyange tüopa nok-a shak-e yahpupa hüyange I huhayimlan moth ne jintepu jingne menge mahlak; tüopa-a jubilee wangpeng me-o yene ye-ok.

³¹Hüpoi chingtuk pee yepepu chingshaolan mepu noklan-a kah phei ja ne phinlak; üwangpa nokpulan-e tüolan-a shak-e yepu oklak, hüyange tüolan-a jubilee wangpeng me leih yelak.

³²Tüoyangpoi Levilan-e pa-a imante tampu chingnyulan mepu-a imante shupu hipak me shak-e yepu oklak.

³³Levilan shejawe tüolan chingnyulan mepu nok ja yüoyange ngohma-a hüyange tüopa shak-e üyepe ngohma-a, tüopa-a jubilee wangpeng me leih yene tamlak wongpong, hangjingne ima-a Levilan-e iman chingnyulan me ngohpu noklan-a iman jingne jintepu moth Israel kahtalan yo me ngohnang.

³⁴Hüpoi Levilan chingnyu neikon-e ngohpu heeijong kahmük-a aope-o yeyüolak; tüopa-a jintepu jingne iman moth.

³⁵“Nang pheipu Israellan sheja toinanpa ne mengma-a, hüyange I nying nyingke paowe tükpu ye-ok ma-a, nanshakpu kahta jate lingpu kih-e Ite nange jam-e ponglak yang, hümme nakshih nang shongme I-a nyoipu oklak.

³⁶Ite hanghe me-o shompu tahyu, hüpoi Kahwangte nyamtüoh hüyange nang pheipu Israelpa nang shongme nyoine tamtüoh.

³⁷Nange Ite üsea phayangpu nginte shompu tahyu hüyange nange Ite phayangpu hahyingte küw tahyam.

³⁸Hatüowa numan Kahwang Youngwanpa ngaokeng aowe Kanan kahtok phalak jingne hüyange numan Kahwang ne menglak jingne Egypt mepu numan yah ngaiyangki.

³⁹“Nang pheipu Israelpa loishe toinanpu kaiye Iye yoi nying nyingke nangte rha ne yüotam ma-a, nange Ite rha toishao lingne yetamlak yang.

⁴⁰I nang phei nanpa kahta ja ne ünepupa jubilee wangpeng manngoi manngoi ngohlak.

⁴¹Hüwante I hüyange I halan-e nang tüohlak hüyange I yoi noksalan tangte hüyange ipu ipawe tüohpu moth tangte leih yelak.

⁴²Hangjingne Israel kahtalan-a Ü-rhalan ngohnang, hüyange iman-a Egypt mepu woipei yangki; tüokhei iman-a rha ne yeyüolak yang.

⁴³Imante taklak ne tah jon, hüpoi numan Kahwang te nyamyah.

⁴⁴Numan-e rhanyu hei rhapa wongpong ne mengma-a, numan neikon-e ngohpu jatlan mepu numan-e iman-a shak ne ok.

⁴⁵Numan-e yinpalan aoyin numan phei jam-e nyoi ngoh nang iman-o shakne ok. Hükihpulan numan kahmük me puhyangki numan jing moth ne mengne ok;

⁴⁶hüyange numan-e iman-a numan mothlei ja ne numanjing hayimlante tüoh ne ok, hüyange iman-e üyin ngohpu hipak mongme shaoshanlak. Hüpoi numan-e numan pheipu Israel pate yemeipe taklakpa ne yejonlak yang.

⁴⁷“Numan phei ngohpu yinpa kahta ja hakpa ne mengma-a, hüyange numan pheipu Israelpa toiha ne meng hüyange yoi nying nyingke tüopa yinpa kahta hakpate rha ne I yüone tam yejema-a inok kahtalan ütamte yüoma-a;

⁴⁸I yüoyang phei me I shak-e leih yepu oklak ülam ngohlak. I jeiheinaolan yo mepu shejapawe

⁴⁹yejema-a ipayim lan-e yejema-a nyahtüp jeiheinaolan-e yejema-a nokphong kahta ütam-e I shak-e leih yepu oklak; Yejema-a lye okjange nanyange ngohma-a Iye yoi bumei shak-e yepu oklak.

⁵⁰Aohipawe I shak-e angyangpeih, I phei Iye teingaolak yang, hüyange iman-e Iye yoi nying nyingke yüowe tampu nyih mepu ünepupa jubilee manngoipu mong iye leilak yang, hüyange nanpa jate phapu ümee wanglamme shak-e yelak phei itlak yang.

⁵¹Wangpeng nangjange ngohpu ne mengma-a I shakwante phapu ümee mepu tamme shonge leih yene tamlak yang.

⁵²Jubilee eipe wangpeng üten ja towe ngohpu ne mengma-a, ngin jeng-a Iye itteshemme sholak yang; towe ngohpu wangpenglan jing ityange I yoi bumei shak-e yelak jingne ngin-a leih ye-e tamlak yang.

⁵³I-a wangpeng te shümme yelak ülam me nan shakpu ne mengma-a, Itepu nokpuwe Ite yemeipe yejonlak yang.

⁵⁴Hükih-e lingyang phei te I lanne yeyetam ma-a, I hüyange Ihalan moilan jamshe jubilee wangpeng me lanne yene tamlak yang.

⁵⁵Hangjingne Israel kahtalan-a ü-rhalan ngohnang; aoyin Egypt kahtok mepu ü-rha ne taowe yahngai: Taowa numan Kahwang Youngwanpa.”