Read Konyak Naga LEVITOISHAO 26 Bible Online

LEVITOISHAO 26 - Konyak Naga bible

LEVITOISHAO 26

¹“Numan-e yoppe khümlak jingne mieng tahling yejema-a peshao, long shongnyu, yejema-a long watte hango tah ling. Hangjingne Taowa numan Kahwang Youngwanpa.

²Ü-Sabbath yihnoon angtüoh hüyange ümeken nyoilan me üte yoppe khümnang, yihnoonpu phei angtüoh, Tao Youngwanpa ngohnang.”

³“Numan ü-ngaokhümlan kih-e nyoima-a hüyange ü-ngaokenglan jaima-a,

⁴hipak khakshuwe Taowe numante wai shonlak, tüo kaiye kahmük-e hahying ngaitamlak, hüyange peelan-e ülick licktamlak.

⁵Numan-e wuwünglick khaipu hipak ngoiye tahyahpu yekümpe ngohlak, hüyange tahdeilak hipak ngoitephei te nehoi numan-e wuwünglick khaipu yeshope ngaitamlak. Numan-e hahhupu ülam khongkümpu numan-e tüolak, hüyange numan kahmük me numan ütuh yenangpe nyoipu oklak.”

⁶“Taowe numan kahmükte chingmei phalak, hüyange aote-o nyampu yenangpe numan shipu oklak. Kahmük mepu phao yinmok ümenglan Taowe jange teilak, hüyange shaaji tüoken me yanglow no paipu yengohlak.

⁷Numan-e wepalante jang woilak hüyange iman-a numan yanglow sheshao me toitalak.

⁸Numan naoshe nga-e ghoja tangme naowe tamlak, hüyange numan gho jawe haja pen naopu oklak, hüyange numan wepalan-a numan yanglow sheshao me toitalak.

⁹Taowe numante moimanlak hüyange numante hayim üngang moimantam lak; Taowe numan phei jiengjeppu yahyangpu kih-e Taowe ü-ngao tükke anglak.

¹⁰Numan-e yo-e angpu nük ülang yelakpe hahpu ngohlak; hüyange nük üla inpu anglak nyoi ngaine ülanglan-a win ne ngailak.

¹¹Taowe Ü-nyoijinga numan yo me linglak, hüyange taowe numan yetüohlak.

¹²Tao numan phei ngohlak; Tao numan Kahwangne menglak hüyange numan-a ü-kahtalanne menglak.

¹³Tao, Youngwanpa numan Kahwange shaaji numan rhapalan ne yemenglak jingne Egypt kahtok mepu numan yah ngaiyangki. Taowe numante shepyange angpu sheam phakke winyange numan tingkhakke kemlak jingne linge tamyangki.”

¹⁴“Hüpoi numan-e Ü-ngao yejaipe hüyange ü-ngaokenglan khongkümpu yejaima-a,

¹⁵numan-e ü-ngaokhümlan, hüyange ngaokenglan minjai she ima-a, hüyange Taowe numan phei lingyangpu jiengjeppu mengma-a,

¹⁶Taowe numante shaoshi ne tamlak. Taowe numante limahlakpa yah peilak - yemei okpu daktin, hüyange hangheye numan mükmüone tamlak hüyange numan üyin mahtamlak tüopa dak yah peilak. Numan-e yoi üli deilak, hüpoi tüopawe numante meipu hango yengailak, hangjingne numan-e hanghe hamme ngai numan jing wepalan-e hahwinlak.

¹⁷Tao numan kaiye yonglak tüokaiye numante naowe tamlak, hüyange aoyinne numante nu iman-e numan tangme wanglam lamlak; numan jamloi nyampu ngailak tüokaiye aowe-o yejangpute numan nying nyingke phette tailak.

¹⁸“Tüolan khongküm ngai yangphei te nehoi numan-e ü-ngao yejaima-a, Taowe numan shaoshi-a üphong nyit nyeiye paowe tamlak.

¹⁹Numan otapu üngei-a Taowe menge mahne tamlak; hüyange Taowe numan phei tingpu wanga yan kih-e hüyange numan kahtok-a langh kih-e lingtamlak.

²⁰Numan ngange toi lingpu lili-a hangne-o yemenglak, hangjingne ima-a numan kahmük-e ülick hango yengai tamlak, hüyange peelan me pelick hango ülicklak.

²¹“Numan-e üne-o ü-phei tokteiye ü-ngao yejaipe taima-a, Taowe üne-o numan shaoshine tampuwa üphong nyit paowe tamlak.

²²Taowe numan yo me nyam nyam shepu yinmoklan shonlak, hüyange iman-e numan hayimlan, numan-e tampu yinmoklan mahtamlak, hüyange numan üjingha hei towe tüohlak, tüo kaiye numan jing jonglam lan-a wüngmak-e linge tamlak.

²³“Tüolan shaoshipu khongküm ngoi yangphei te numan-e yelakpe ü-ngao yejaima-a, hüyange Tao nuwe shak-e tamma-a,

²⁴hüwante numante Tao lüppe yelak hüyange üwangpe phapulan phei üphong nyit me nyeiye wanne Taowe üne-o numan shaoshi ne tamlak.

²⁵Jiengjeppu mengpu jingne numante shangne tamlak; Taowe wehok yah peilak, hüyange numan yinlak yam-e chingnyulan me numan kemma-a, Taowe numan yo me yemei oklak daktin shontamlak, hüyange numan-a numan jing wepalante dolak jingne Taowe kange tamlak.

²⁶Aope Taowe numan hahying lam phüntamlakei, sheko naoyha pen-e vünjüo ja me hei numan hahying ngüolak, hüyange iman-e numan hahyinga ityange hei tamphalak; hüyange numan-e hahyapoi, numan yemohphalak.

²⁷“Hüke linge kümyang pheite üne-o numan-e yelakpe muh Tao nuweshak-e tamma-a hüyange ü-ngao minjai she ima-a,

²⁸hüwantepa-a ümengshi puphei Tao numan yete lüplak hüyange üne-o shemengpupa shangne tampu üphong nyit nyeiye linge tamlak.

²⁹Numan-e numan hayimlan mei, hüyange numan yhalalan mei hahlak.

³⁰Numan-e yopkhümpu nyoijinglan Taowe menge winlak, hüyange numan jing sünyet jakpu wümjonglan mette winlak, hüyange numan jing lipu manglan-a numan jing peshao ümanglan tangme phongne tamlak; hüyange ü-yahawe numan te nyamlakpa ne lüklak.

³¹Taowe numan jing chingnyu lan-a heam ne tamlak, numan-e yopkhümpu nyoi jinglan menge winlak, hüyange numan-e toidopu Taowe yeyahlak.

³²Taowe numan kahmük-a jaoshe-e mahne tamlak tüo kaiye wepalan aoyinne tüopa küppe omme pei, tüopa menge mahpu ngeyange mokhlak.

³³Taowe numan-a hengching kahmüklan me yanne tamlak. Taowe numan kahmük-a yanglow kaiye wüngmak-e linge tamlak, hüyange numan jing chingnyu lan-a heamteiye tüohlak.

³⁴“Tüophei me tüopa wüngmak-e ngohpu mongme aope numan-a numan jing wepalan kahmük me ngohlakei, kahmük-e Sabbath tüolak; hüwante kahmük-a toloimeilak hüyange Sabbath ngohlak.

³⁵Hatüo wüngmak-e ngohpu mongme tüopawe toloimeilak, hüpoi kahmük me numan chingnyoi wante ngoh yangpu kihpu Sabbath ne yeje.

³⁶“Numan aoyin ching jangteiye taiye ngohnang, wangyange phümyak po ne tampu wüngte yeonge nyamne tamme phette taine tamlak. Shapju me numante jang nangpu kih-e numan phetlak, hüyange numan shongme wepalan yenangpute numan haolak.

³⁷Aowe-o numante yejangpu te numan phetpuwe jawe ja tang me yashah hüolak, hüyange wepa ao phei-o numan-e hokpu ye-oklak.

³⁸Numan ching jange teiye ngohwante lilak, numan jing wepalan kahmük-e numan-a lünge tailak.

³⁹Numan kahmük me numan yo me üjingha towe ngoh pulan-a numan jing ünu hüyange numan jing pajeiyong lan ünu jingne poiye winlak.”

⁴⁰“Hüpoi numan huhayim lan-e iman jing ünu hüyange imanjing pajeiyonglan jing ünu janlak, aoyinne üte jange win hüyange ü-phei tüi-e hok-e we;

⁴¹hüyange iman phei hokwe Tao lüpne lingne tam hüyange iman jing wepalan kahmükte ching jange teine tam; Ükümne, aope numan jing huhayimlan innyaiye yelakei hüyange iman-e, yoi-e püohyangpu hüyange hokweyangpu jingne ümee phalakei,

⁴²hüwante Taowe Jacob hei Isaac hüyange Abrahamlan phei jiengjeppu teih tüolak, hüyange ü-kahtalante janpu kahtok phalak jingne Taowe üla ne teih tüolak.

⁴³Iman-e kahtok-a wüngmak-e tüohlak, hüyange iman yenangpe wüngmak-e ngohwante kahmükte Sabbath ngohlak, hüyange iman-e yoi püoh pienyangpu jingne teih tüolak, hangjingne iman ü-ngaokhümlan hüyange ü-ngaokenglan yeyah pe win.

⁴⁴Tüoyangpoi üne-o, aope iman imanjing wepalan kahmük me ngohlakei, Taowe iman jaoshe-e yewintamlak yejema-a iman mah ne yetamlak. Tüopawe iman phei ü-jiengjeppu üküm ngoine tamlak, hangjingne Taowa imanjing Kahwang Youngwanpa.

⁴⁵Hüpoi iman jengme Taowa imanjing Kahwang she jatlan te hüolak jingne iman pajeiyonglan phei jiengjeppu Taowe teihtüolak. Taowa Youngwanpa.”

⁴⁶Tüolan-a phapu ngao, ngaokhüm, hüyange linglak ngaokenglan Sinai Kahtang me Youngwanpawe I yoi hei Israellan nipa me Mosa kaiye phatamyangki.