Read Konyak Naga LEVITOISHAO 27 Bible Online

LEVITOISHAO 27 - Konyak Naga bible

LEVITOISHAO 27

¹Youngwanpawe Mosate ngaowe i,

²“Israel lante ngaotüoh hüyange imante itüoh: Aope kahta jawe Youngwanpate ünyei ne jiengjeppu yah-e kahta üyin shangpu ümee phalak janyalakei,

³netan ümee shangpu-a wangpeng da mepu dewok ngoipute shangpu ümee-a üjao nyoi me jonpu toklak me tokpu khüm ngin ükhüw denga.

⁴Kahta-a sheko ne mengma-a, yhatepu ümee-a khüm ngin ükhao delüm ngohlak,

⁵wangpeng nga mepu da ngoipu kahta ne mengma-a, netan jing ümee-a ngin da, hüyange sheko jingne-a ngin pen it tüoh.

⁶Wangpeng it pu me lekeng ja mepu wangpeng nga ngoipu te itpu-a, netan jingne khüm ngin nga, hüyange sheko ne mengma-a khüm ngin lüm ngohlak.

⁷Hüyange kahta-a wangpeng dewok tüo toktepu lwngmei ne mengma-a netan ümee-a ngin penme nga, hüyange sheko ümee-a ngin pen.

⁸Aowe jiengjeppu yah tüopa kahtawe üjao nyoi me jonpu toklak me ümee phane ye-ok ma-a, Iye kahta-a ngengpa tangte yah peilak yang, hüyange ngengpawe ümee sheshoi she, kahtapawe phawe oklaklan shinne linge tamlak.

⁹“Jiengjeppuwa yinmok jengme jema-a hatüowa Youngwanpate dopu ja ne yahpu oklak, tüophei me Youngwanpa te phapu hünghao lili-a üjao ngohlak,

¹⁰hüyange kahta aowe jiengjeppu yahnang Iye tüopa nanleiye ülao yinmok japa yephalak yang. Iye ülao japawe nanleipu ne mengma-a yinmok moini-a jao tam nang.

¹¹Hüpoi khümwümpu jeng me yinmok-a yejao yeshapu ne mengma-a, hanghepa Youngwanpate dopu ne phapu yeyah oklak ne ngoh, kahtawe yinmok-a ngengpa tangte yah peilak.

¹²Ngengpawe tüopa yemeipu hei meipu phei phinne tüopa jingne ümee itlak hüyange ümee-a tüopa me shopu ne menglak.

¹³Kahtapawe tüopa Iye muh shak-e yehuma-a, Iye tüopatepu meitam da paoyange ümee phalak.

¹⁴“Aope kahta ütam-e Youngwanpate inok jaowe tamlakei, tüopa yemeipu yejema-a meipu ityange ümee-a ngengpa-e itlakyang, hüyange ümee-a tüome sholak.

¹⁵Nok jaowe tampu nokpuwe muh shak-e yah yehupu ne mengma-a, lye paopu meitam da paoyange ümee phalak yang, hüyange nok-a nokpu jingne mengmahlak.

¹⁶“Kahta jawe I jing kahtok ütam Youngwanpa te jaowe tampu ne mengma-a, ümee-a tüopa kahmükte üli hangshin yahyange deilak ne ngoh tüopa phei itte shemme leiyange, barley tah kilogram da jingne khüm ngin ükhüw pen ityange ümee-a itlak yang.

¹⁷Iye kah-a jubilee wangpeng me jaowe tamhupu ne mengma-a, ümee khongkümpu yahlak.

¹⁸Iye tüopa-a jubilee phei me hei jaowe tamhupu ne mengma-a, ngengpawe ünepupa jubilee ngoishao me wangpeng hangshin towe ngoh tüopa phei shuwe phei ümee-a itlak, hüyange ümee-a sheshoi she itlak.

¹⁹Kahta aowe kah jaowe tamyange üne-o shak-e yehunang, Iye ümee tokte paopu meitam da phalak.

²⁰Kahta jawe üwangne Youngwanpa mepu shak-e yeyepute Iye kah-a kahta ütamte yüopu ne mengma-a, Iye shaaji shak-e leihyelak ülam mahtam nang.

²¹Hüpoi jubilee wang me peiye tüopa-a Youngwanpa jing jintepu moth ne menglak; tüopa-a ngengpalan jingne menglak.

²²“Kahta jawe Inoksalan jing üjepe, Iye shakpu kah ja Youngwanpa te jaowe tampu ne mengma-a,

²³ngengpawe ünepupa jubilee wangpeng manngoipu mongme wangpeng hangshin ngoh tüophei shuwe tüopatepu ümee-a itlak; hüyange kahtapawe ümee-a tüonyih muh phalak; tüopa ngin-a Youngwanpa jing.

²⁴Jubilee wangpeng me kah-a nokpu ülangte yejema-a Ihu hayimlante leih yene tamlak.

²⁵Ümee khongkümpuwa üjao nyoi me jonpu toklak phei ityange phei-a phinlak.

²⁶“Üwangne puhpu yinmoklan-a Youngwanpa jingne ngohpu yüo, tüokhei mongloong dopu ja ne aowe-o tüolan jaowe tamne ye-ok. Mahu üha, nyee üha, yejema-a younha tüolan-a Youngwanpa jing,

²⁷hüpoi üwangne puhpu yejaoyeshapu yinmoklan-a üjao nyoi me jonpu toklak me tokpu ümee tokte meitam da paoyange shak-e yelak. Tüolan shak-e yeyema-a, tüopa-a üjao nyoime tokpu toklak ümee te ütam jate yüolak.

²⁸“Aowe-o Iye hanghepa Youngwanpa jingne lanshe jaowe tamyang phei, kahta üyin ja ne jeyah, yinmok ja ne jeyah, yejema-a kahtok ne jeyah yeyüolak yejema-a shak-e yeyelak. Tüopa-a jintepu jingne Youngwanpa jing ngohnang.

²⁹Kahta üyin nehoi aohipa lanshe jaowetampu ne phayangki shak-e yene ye-ok; I-a li ne hei tamlak.

³⁰“Kahtok me ngaipu penphong, üli jeyah ülick jeyah khongkümpuwa Youngwanpa jing. Tüolan Youngwanpa jingne üjao me ngoh nang.

³¹Kahta ütam-e tüolan yo mepu ütam shak-e yehuma-a, Iye üjao nyoi me itte shempu toklak me itpu ümee phei üphong da meitam paowe phalak yang.

³²Tampu yinmok pen yo mepu ja-a Youngwanpa jing. Aope yinmoklan iye leilakei, üpüm pen ngoipu yo mepu ja-a Youngwanpa jing.

³³Aowe-o yinmok ülao japa nanleipu hango yelinglak yang. Iye yinmok ja jingne japa nanleiye angpu ne mengma-a hüma-a yinmok moini-a Youngwanpa jingne menglak hüyange shak-e yene ye-oklak.”

³⁴Tüolan-a Israel kahtalan jingne Youngwanpawe Sinai kahtang me Mosate phapu ngaokenglan ngoh nang.