Read Konyak Naga LEVITOISHAO 3 Bible Online

LEVITOISHAO 3 - Konyak Naga bible

LEVITOISHAO 3

¹“Kahta jawe shüp jempu dopu ja ne inok mahulan mepu dopu ne mengma-a, hüma-a tüopa-a mahu üpong jeyah yejema-a üpi ne jeyah, üko üshang hango yenangpu ne menglak yang.

²Hüyange lye yinmok üshang me I yak-e shünglak, hüyange hatüowa khümjing nyenok tafün shong me toilak. Hüyange Aaron hayim ngengpalan-e wümjong ünuk peli neikonne iy shailak yang.

³Hüyange Youngwanpa te vün phei dopu kih-e chingmei dopu toi-e lye dolak yang, üyei ütang me ngohpu üyao khongkümpu,

⁴hüyange tetoilan hüyange tüopa me ngohpu üyao, hüyange shemeipupa mongphang dolak yang.

⁵Hüyange Aaron hayim ngengpalan-e jakke dopu phei jam-e wümjong me tüolan khongkümpuwa jaklak yang. Tüopa hahying dopu üpe ümeiye Youngwanpa mongmei ne tamnang.

⁶“Shüpshapu dopu ja ne nyee yejema-a youn ja jonpu ne mengma-a, tüopa-a üpong ne yejema-a üpi ne mengne ok, hüpoi tüopa-a üko üshang hango yenangpu ne menglak wongpong.

⁷Kahta jawe nyee ja dopu ne mengma-a, nange tüopa-a Youngwanpa sheshao me peilak yang,

⁸lye tüopa üshang me I yak-e shünglak hüyange tüopa-a khümjing nyenok nokshao me toilak. Hüyange Aaron hayimlan-e tüopa iy yahpuwe wümjong ünuk peli khongkümpu te shaitamlak;

⁹hüyange Youngwanpate hahying dopu ja ne tüopa yinmok tepu hatüolan yah peitüoh: Üyao, tokwaan pong phei owe lange yahpu ünyei tepu üyao khongküm, üyei ütang khongküm tepu üyao,

¹⁰tetoilan hüyange tüolan me ngohpu üyao, hüyange mongphang shemeipupa tetoi nyoilan.

¹¹Tüopa me shaoshanpu ngengpawe tüolan khongkümpuwa Youngwanpate hahying dopu ja ne wümjong me jaklak.

¹²“Nange dopu-a youn ja dopu ne mengma-a, nange tüopa-a Youngwanpa sheshao me yah peilak;

¹³hüyange tüopa üshang me I yak-e shünglak hüyange tüopa-a khümjing nyenok nokshao me toitüoh. Tüophei me Aaron hayimlan-e tüopa mepu iy yahpuwe wümjong ünuk peli khongkümpu neikonne shaitüoh;

¹⁴hüyange hahying dopu phapu kih-e hatüo meitamlan yah peitüoh: üyei ütanglan tepu üyao khongküm,

¹⁵tetoilan hüyange tüolan me ngohpu üyao khongküm, hüyange mongphang tepu shemeipu tetoi nyoilan üshei.

¹⁶Youngwanpa te mongmei ne tamme hahying dopu ja ne tüolan khongkümpuwa, wümjong me ngengpawe jaklak. Üyao khongkümpuwa Youngwanpa jing ngohnang.

¹⁷Numan-e tüopa-a Israellan ümeken me chingnyoi lakei tüoken nyoi üshei me jin jin tepu ngaokeng ja ne anglak yang.”