Read Konyak Naga LEVITOISHAO 4 Bible Online

LEVITOISHAO 4 - Konyak Naga bible

LEVITOISHAO 4

¹Youngwanpawe Mosate

²Israel lante ilak jingne i, “Hüke ütam-e yeshingpe Youngwanpa ngaokeng menge ünu ompu ne mengma-a, nyanne ngohpu ngaokenglan kih-e linglak wongpong.

³“Ünu ompa-a Ütahpa Ngengpa ja ne mengma-a; hüyange kahtalan tangme ünu yahpeilak ne ngaima-a, hüwante lye ompu ünu jingne lye üko üshang yenangpu mahu üpongha ja yahpeiye Youngwanpate toi dotüoh.

⁴lye mahu üponga khümjing nyenok tafün shongme, Youngwanpa sheshaote yahpeilak yang; hüyange lye mahu üpong shang me I yak-e shünglak, hüyange Youngwanpa sheshao me mahu üponga toilak.

⁵Tüophei me Ütahpa Ngengpawe mahu üpong jing iy ütam yahlak hüyange tüowa khümjing nyenok te yah inlak,

⁶hüyange ngengpawe yoi yaklan iy te hüngyange üjao nyoi me jhotnye sheshao me lye iy-a nyit me shailak.

⁷Tüophei me khümjing nyenok mepu sünyet wümjong ünuklan me ngohpu üwonglan tangme lye iy ütam phowe tamlak. Topu iy-a lye jakke dolak jingne jonpu wümjong yajenth hanghepa khümjing nyenok nokshao yeme ngohnang tüoken me shokke tamlak yang.

⁸Hüyange tüopa mahu üpong mepu üyao khongkümpuwa lye yahlak; üyei ütang me lümpu üyao hüyange üyei ütang me ngohpu üyao khongkümpu,

⁹hüyange tetoilan hüyange tüome ngohpu üyao hüyange mongphang shemeipupa nyoi khongküm omme lye yahlak yang.

¹⁰Ngengpawe tüolan üyaowa yahlak hüyange jakke dopu me jonpu kih-e tüopa-a wümjong me jaklak, shüppe jempu dopu jingne toipu yinmok üyao lan-e lye hangke ling, tüokih-e linglak.

¹¹Hüpoi lye mahu üpong üsho, hüyange tüopa mei khongkümpu, tüopa üshang, üyalan, hüyange tüopatepu üyei ütang üyeilan-o omme,

¹²mahu üpong nopuwa lakjing ü-at yeme ümeken me khüm-e wümpu toishao ja ne vünla shokke tamnang tüoken nyoite teitüoh, hüyange tüoken me lye han phei vün jaklak.

¹³“Israel ükhong khongkümpuwe yeshingpe ünu ompu ne mengma-a, hüyange Youngwanpa ngaokhüm yo me ja yeshingpe püohyange ngohpu ne mengma-a,

¹⁴hüma-a tüopa ünu ompu shinge peipu phei jamshe, ükhonge ünu dopu ja ne phalak jingne mahu üpongha ja yah peilak yang. Iman-e tüopa-a Youngwanpa khümjing nyenok te yah peilak yang;

¹⁵hüyange Israel ükhong tepu lwngmei lan-e mahu üpong shangme Youngwanpa sheshao me iman yak-e shünglak yang; hüyange mahu üponga tüoken me toilak yang.

¹⁶Hüwante Ütahpa Ngengpawe mahu üpong iy ütam Nyenok te yah peilak.

¹⁷hüyange ngengpawe I yaklan iy me hüngyange, jhotnye sheshao me nyit me ngoiye Youngwanpa sheshao me hatüo shailak yang.

¹⁸lye iy ütam-a khümjing nyenok ümongme ngohpu sünyet jakpu wümjong ünuklan tepu üwonglante phowe tamlak yang, hüyange topu iy-a khümjing nyenok tafün shongme ngohpu toidopu wümjong yajenth me shokke tamlak yang.

¹⁹Tüophei me tüopa mepu üyao khongkümpu yahyange lye wümjong tang me jaklak yang.

²⁰Hüke lye ünu dopu mahu üponge lingpu kih-e, tüokih-e lye jakih muh tüopawe linglak yang; hüyange tüokih-e kahtalan jing ünu jingne lye toidolak yang, hüyange imante ünu wintamlak.

²¹Hüyange lakjing ü-at ye me lye mahu üponga yah-e teiye jaklak, lye I jing ünu dopu jingne jakke tampu mahu üpong meimei kih-e jaklak. Tüopa-a ükhong jing ünu yahteilak jingne dopu ngohnang.”

²²Aope wanglamlampa jawe ünu om, hüyange Youngwanpa I Kahwange tahling she ipu toi ütam yeshingpe lingyange ünu ompu ne mengma-a,

²³ünu omyangpu yang she lye shinge peipu phei jamshe, lye üko üshang yenangpu youn pong ja lye yoi dopu ja ne yah peilak yang.

²⁴Hüyange lye younpong shangme I yak-e shünglak, hüyange hatüo ümeken me jakke dopu dowe toinang, tüoken apyekao wümjong me toilak yang. Hatüowa ünu yahteilak jingne dopu ngoh nang.

²⁵Hüyange ngengpawe yinmok iy me yoi yaklan hünglak, hüyange wümjong ünuklan mepu üwonglan me phowe tamlak; hüyange topulan-a tüopa wümjong yajenth me shokke tamlak.

²⁶Hüyange tüomepu üyao khongkümpu lye wümjong me jaklak, lye shüppe jempu dopu jingne toipu yinmoklan üyao jakpu meimei kih-e jaklak. Tüokih-e wanglamlampa jawe ompu ünu jingne ngengpawe toidopu dolak, tüophei me Ite ünu wintamlak.

²⁷“Numan yomepu üpainyuha ütam-e yeshingpe ünu ompu ne meng ma-a, hüyange Youngwanpa ngaokhüm yo me ja püohpu ne mengma-a,

²⁸hüma-a ünu omyangpu yang she lye shinge peipu phei jamshe lye üko üshang yenangpu youn üpi ja lye dolak jingne yah peilak yang.

²⁹Hüyange lye ünu dopu tüopa üshang me yoi yak-e shünglak yang, hüyange wümjong apyekao me ümeken me jakke dopu yinmoklan-a toinang tüoken me tüopa-a toitüoh.

³⁰Ngengpawe yinmok iy me yoi yaklan hünglak, hüyange wümjong ünuklan mepu üwonglan me tüopa-a phowe tamlak; tüophei me topu lan-a wümjong yajenth me shokke tamlak.

³¹Tüophei me lye tüopa tepu üyao khongkümpu khokke yahlak, shüppe jempu dopulan jingne toipu yinmoklan jing üyao khokpu meimei kih-e khoklak, hüyange lye tüopa-a wümjong me jaklak tüokaiye tüopa üpe ümei pepuwe Youngwanpa mongmei tamnang. Tüokih-e linge kahtapawe ompu ünu jingne ngengpawe dolak, hüyange Ite ünu wintamlak.”

³²Kahta jawe ünu dopu jingne nyee ja yah peima-a tüopa-a üko üshang hango yenangpu üpi ja ne menglak.

³³lye tüopa tepu üshang me yoi yak-e shünglak hüyange wümjong apyekao, ümeken me jakke dolak jingne yinmoklan toinang tüoken me tüopa-a toilak.

³⁴Ngengpawe yinmok iy me yoi yaklan hünglak, hüyange tüopa yahpuwe wümjong ünuklan tepu ümüklan te phowe tamlak hüyange topulan-a wümjong yajenth me shokke tamlak.

³⁵Tüophei me lye tüopatepu üyao khongküm khoklak, shüppe jempu dopu jingne toipu nyee mepu üyao khokpu meimei kih-e khoklak, hüyange lye Youngwanpate hahying dopu phapu phei jam-e wümjong me tüopa-a jakke dolak. Tüokih-e linge kahtapa ünu jingne ngengpawe toidopuwa dolak, hüyange Ite ünu wintamlak.