Read Konyak Naga LEVITOISHAO 5 Bible Online

LEVITOISHAO 5 - Konyak Naga bible

LEVITOISHAO 5

¹Kahta ütamte gho me saki phalak jingne nyik, hüyange lye hanghe ngeyangki yejema-a jaiyangki, tüopa jingne lye ngaolan hango yephama-a, ümeng ngaipu jingne I shanglak.

²Yejema-a kahta ütam-e yeshingpe yejao yeshapu toilam ütamte yejaopu yinmok mangte jeyah, yejaopu ching yinmok mangte jeyah, yejema-a yejaopu lehkempu yinmok mangte jeyah letma-a, I yejaope ngailak hüyange lye hanghe lingyangki teihtüopu phei jamshe I-a püohpu ne menglak.

³Yejema-a kahta ütam-e yejaope ngaipu kahtate yeshingpe letyange ngohma-a, hanghe ne menglakei mengyapoi, lye hanghe lingyangki teihtüopu phei jamshe I-a püohpu ne menglak.

⁴Yejema-a kahta ütam-e ken yetingpe jiengjeppu yah yange ngohma-a, hanghe jingne menglakei mengyapoi, lye hanghe lingyangki teihtüopu phei jamshe I-a püohpu ne menglak.

⁵Aope kahta jawe püohpinpu shinge peilakeih, lye püoyangpu ümeng janlak wongpong;

⁶hüyange lye püohyangpu ünu jingne Youngwanpa tangte I ünu jingne nyee ja yejema-a youn ja dopu yah peilak yang. Ngengpawe kahtapa ünu jingne toidopu phalak.

⁷“Hüyangpoi hatüo kahtawe nyee yejema-a youn peine ye-ok ma-a, lye Youngwanpa tangte yoi ünu jingne awshu ni yejema-a awyei ni yah peilak yang; ja-a ünu dopu jingne hüyange ülao japa-a jakke dopu jingne peilak yang.

⁸Iye tüolan-a ngengpa tangte yahpeilak, aowe üwangpa awha-a ünu dopu jingne phalak lye shang yephüntampe üngte yüppe toilak,

⁹hüyange tüopa mepu iy ütam-e wümjong te shaitamlak. Topulan iy-a wümjong yajenth me yünne tamlak. Hatüowa ünu yahteilak jingne dopu ngohnang.

¹⁰Tüophei me ni shepupa awha-a jonpaipu wanglam kih-e jakke dopu ja ne dolak. Hükih-e linge kahtapa ünu jingne ngengpawe toidopu dolak hüyange Ite ünu wintamlak.

¹¹“Hüpoi kahtapawe awshu ni yejema-a awyei ni phalak ye-ok ma-a, lye ünu dopu jingne ankhoih kilogram ja yah peilak yang. lye tüopa tangme olive minnga yejema-a sünyet hango tüopa me yenyütlak, hangjing ne hatüowa ülick dopu yeje hüpoi ünu jingne dopu ngohnang.

¹²Hüyange hatüo lye ngengpa tangte yah peilak, hüyange hatüo ngengpawe I yakpoih ja maawe teihtüolak jingne yahlak, hüyange Youngwanpate wümjong tangme hahying dopu ja ne jaklak. Hatüowa ünu yahteilak jingne dopu ngohnang.

¹³Hükih-e linge kahtapawe ompu ünu jingne ngengpawe toidopu dolak, hüyange Ite ünu wintamlak. Topu ankhoih lan-a ngengpa jingne menglak, ülick dopu hangke ling tüo mei mei kih-e ngohlak.”

¹⁴Youngwanpawe Mosa phei ngaowe i:

¹⁵“Kahta ütam-e Youngwanpa te üjao toishao jingne yeshingpe yephape peye ünu om ma-a, lye shümme yepu dopu ja ne, üko üshang yenangpu nyeepongja yejema-a younpong ja Youngwanpate yahpeilak. Tüopatepu ümee-a üjao nyoi me jonpu toklak me itte sheamlak.

¹⁶Üjao toishao me lye püohpinne yephape angpu phalak hüyange tüote phomme meitam nga phalak wongpong. Iye tüopa-a ngengpate phalak, hüyange kahtapa ünu jingne ngengpawe yinmok-a toidolak, hüyange Ite ünu wintamlak.”

¹⁷“Kahta ütam-e ünu om ma-a, hüyange Youngwanpawe tahling she ipu ütam lingma-a, lye hatüo yeshingpe lingyapeyoi yoi ünu lye kilak.

¹⁸Hüyange lye shümme yepu dolak jingne üko üshang yenangpu nyeepong ja yejema-a younpong ja, ngengpa tangte yahpeilak yang. Tüopa tepu ümee-a üjao nyoi me jonpu toklak me itte sheamlak. Kahtapa ünu jingne ngengpawe toidopu dolak, hüyange Ite ünu wintamlak.

¹⁹Hatüowa Youngwanpa kaiye lye omyangpu ünu jingne shümme yepu dopu ngohnang.”