Read Konyak Naga LEVITOISHAO 6 Bible Online

LEVITOISHAO 6 - Konyak Naga bible

LEVITOISHAO 6

¹Youngwanpawe Mosa phei ngaowe i:

²“Kahta ütam-e yoi pheipu Israelpawe ang kei she tüohpu minyetam she lanne tam-e yejema-a Imepu ülam ja kuhyange yejema-a Ite lowe lamyange Youngwanpa kaiye ünu om ma-a,

³yejema-a ülam ja meihahki she ngaoleih ima-a hüyange lye yetüo she iye jiengma-a tüo kihpuwe ünu omnang.

⁴Hüwante hatüo hüke ngohlak, Iye ünu om-e ngohma-a, hüyange ünu ngohma-a, Iye kuhleih-e yahpu yejema-a Iye shaoshine tamyange yahpeipu toinan, yejema-a I yak me anglak jingne phapu toinan, yejema-a mahpu toinan lye tüopu, tüolan-a lye leih-e phalak yang,

⁵yejema-a shemin lamphe me lye tahleih phei jiengjeppe ngoh; lye hatüo khakshuwe leih phalak yang, hüyange tüo tokte meitam da paowe phalak yang. Hüyange lye ünu yamme okpu nyih me lye hatüo nokpute phalak yang.

⁶lye Youngwanpate shümme yepu dopu ja ne nyeepong ja yejema-a younpong ja üko üshang hango yenangpu yahyange lye ngengpa tangte yah peilak yang. Tüopatepu ümee-a üjao nyoi me jonpu toklak me itte sheamlak yang.

⁷Ngengpawe tüopa kahta ünu jingne Youngwanpa sheshao me toidopu phalak, hüyange hanghe jeng me ünu om ne tam-e ngoh ünu wintamlak.”

⁸Youngwanpawe Mosa phei ngaowe i:

⁹“Aaron hüyange I hayimlante jakke dopulan jingne ngaokenglan hükih-e phalak jingne ngaowe i. Jakke dopuwa wümjong tangme wangnyak phapan tüohlak, hüyange vün-a yemeipe pah-e angne tamlak;

¹⁰Tüophei me ngengpawe I jing pengkhai ngeng-ahng phakshaoh, hüyange pengkhai phakshaoh, shaohyange wümjong tangme jeileh-e phongyange ngohpu vünla kinne yahlak hüyange tüolan-a wümjong ünah me angtamlak.

¹¹Tüophei me lye yoi nyemo jeileilak, hüyange vünla-a lakjing khümme wümpu üjao nyoi ü-at ye me yah teilak.

¹²Hüyange wümjong vün-a yelakpe tüopa tangme loonge anglak, hüyange hatüo meine yetamlak yang. Napjeih she ngengpawe tüopa tangme han jaklak yang, hüyange tüopa tangme jakke dopu üyin shinne anglak yang, hüyange tüopa tangme shüppe jempu dopu üyao jaklak yang.

¹³Wümjong tangme yelakpe vün loonge anglak, hüyange hatüo aope-o meine yetamlak yang.

¹⁴“Hatüowa ülicklan dolak jingne ngaokenglan; Aaron hayim ngengpa lan-e wümjong sheshao me Youngwanpate ülick dopu phalak yang.

¹⁵Hüyange lye tüopa mepu ankhoih yakpoih ja hüyange minnga yahlak yang, hüyange tüopa tangme sünyet angyange wümjong tangme tüolan mepu khongküm Youngwanpate doteki she teihtüopu kenpu ja ne jaklak yang.

¹⁶Hüyange tüopa mepu topulan-a Aaron hüyange I halan-e hahlak; hatüowa do yenyütpe üjao nyoi me hahlak; khümjing nyenok nokshao me iman-e hatüowa hahlak yang.

¹⁷Hatüo do nyütyange ye-ngüolak yang; hatüo Taowe imante vün phei üte dopu mepu iman meitam ne menglak jingne phateki. Ünu dopu hüyange püohpu jingne dopu kih-e hatüowa loishe üjaopa ne mengnang.

¹⁸Ngoikülak hipak khongkümpu me Aaron huhayim netan lan-e Youngwanpa te dopu hahying mepu imanjing meitam yelakpe hahlak. Aowe hahying dopute letlakei, tüopatepu üngan wonge ütuhne menglak.”

¹⁹Youngwanpawe Mosa phei ngaowe i,

²⁰“Hatüowa Aaron hüyange I hayimlan Youngwanpate phünphapu nyih: lye ankhoih kilogram ja, nyih jeih she hahying dopu meitam shinne lye yah peilak, shomme tangkhüw ja hüyange ün me towe angpu tangkhüw ja.

²¹Hatüowa minnga phei nyütlak hüyange ansheng me yanglak hüyange tüopa-a khoihlak hüyange ülick dopu ja ne phawe tamlak, üpe ümeiye Youngwanpa mongmeilak.

²²Ngoikülak jin khongkümpu me Aaron huhayim aoyinne Ütahpa Ngengpa ja ne shaoshan lakei iman lili-e tüopa dopuwa phalak wongpong. Tüopa-a Youngwanpa te toidopu ja ne lanshe jakke tamlak yang.

²³Ngengpa jawe ülick dopu ja ne lingpu mepu hanghe meitam-o yehahlak yang; khongkümpuwa lanshe jakke tamlak.”

²⁴Youngwanpawe Mosa phei ngaowe i:

²⁵“Aaron hüyange I hayimlante, hatüolan ünu dopu me jonlak ngaokeng ngohnang she itüoh: Ünu dopu jingne toipu yinmoklan-a, wümjong apyekao ümeken me jakke dolak jingne yinmoklan toinang tüoken me toilak. Hatüowa yeonge üjaopa dopu ngohnang.

²⁶Ngengpa aowe hatüo ünu jingne yinmok toidolakei, Iye hatüowa khümjing nyenok ghonyoi üjao nyoi ja me hatüo hahlak yang.

²⁷Hanghe yinne tüopa ühakte letlakei, üjaopa ne menglak; hüyange nyemo ütam me iy shaiye ngohma-a, hanghe me shaiye ngoh hatüowa üjao nyoi ja me jaoweshalak yang.

²⁸Hüyange kümptük hanghepa me hatüo mei honglakei, hatüowa paiye tamlak yang; hüpoi hatüo yantük me hongma-a, hatüowa shitte phowe yeng-e jemyange shokke wintüoh.

²⁹Ngengpa nok mepu netan lili-e hatüo dopuwa hahne ok; hatüowa yeongpu üjao hahying.

³⁰Hüpoi ünu dopu phapu hanghepa khümjing nyenok sheshao me iy pheipu ünu tantamlak jingne yahpei ngohnang, hatüo yehahlak yang; hatüowa vün phei jakke winlak yang.