Read Konyak Naga LEVITOISHAO 7 Bible Online

LEVITOISHAO 7 - Konyak Naga bible

LEVITOISHAO 7

¹“Hatüolan-a püohpu jingne dopu ngaokenglan ngohnang; tüolan ünyei shejaopupa.

²Tüopa dopu jingne yinmok-a wümjong apyekao, ümeken me jakke dopu yinmoklan toinang tüoken me toilak yang; hüyange tüopa mepu iy-a wümjong ünuk peli khongkümpute shaitamlak yang.

³Tüopa tepu üyaolan-a khongkümpu khoklak yang hüyange wümjong tangme dolak yang; üyei tepu üyao, üyei ütanglan me lümpu üyaolan,

⁴tetoilan hüyange tüolan me ngohpu üyao, hüyange mongphang shemeipupa nyoi, tetoi phei yah ngaipu üyaolan.

⁵Ngengpawe üyao khongkümpuwa Youngwanpate hahying dopu ja ne wümjong me jaklak. Hatüowa püohpu jingne dopu ngohnang.

⁶Ngengpa nok mepu netan lili-e hatüo dopuwa hahne ok, hüpoi tüopa-a üjao nyoime hahlak yang; hangjingne hatüowa ünyei shejaopupa ngohnang.

⁷“Ünu dopu hei püohpu jingne dopu moini jingne ngaokeng ja jonlak ngohnang: mei-a ngengpa aowe toidopu do-nang tüopa jing ngohnang.

⁸Tüokih-e ngengpa aohipawe ao jingne jakke dopu phalakei, lye toidopu phapu üshowa tüopa ngengpa jingne ngohlak.

⁹Ülick dopu lili ansa me lingpu hahying dopu, yejema-a ankang sheng me lingpu yejema-a anlingpu sheng me lingpulan dopu phapu lep iye ngengpa aowe tüopa Kahwangte do nang I jingne mengkülak.

¹⁰Hüyange ühüngme dopu lili, minnga phei nyütpu jeyah yejema-a eawahpu jeyah, tüolan-a Aaron noksa ngengpalan moilan jing hüyange tüolan-a moilante jakih-e tam-e yahlak.

¹¹“Youngwanpate phapu shüppe jempu dopu tepu ngaokenglan-a hatüolan ngoh nang.

¹²Kahta jawe tüopa dopuwa Kahwangte minyong phapu dopu ja ne lingma-a, lye tüopa-a toidolak yinmok phei jam-e do yenyütpe do ne lingpu an hükih-e peilak yang: olive minnga nyüt yangphei jeilehpu anbung jeyah yejema-a olive minnga phoyang phei ankhüo yejema-a ankhoih hei olive minnga nyütte lingpu awkek an peilak yang.

¹³Tüopate paowe do yenyütpe lingyang phei anbung lye dolak yang.

¹⁴Hüyange tüopa mepu lye dopu an ülam lili mepu jaja yah jem-e lye ünyeipa ne Youngwanpate dolak yang; hatüowa ngengpa aowe yinmok jing iy yahyange hüyange wümjong te shaitam tüopa jingne menglak.

¹⁵Hüyange sheakpu yinmok jing mei-a tüopa toidopu nyih muh hahkümlak wongpong; ünepu nyih napning ngoiye tüopa mepu hanghe-o towe ye-anglak yang.

¹⁶“Hüpoi kahta jawe lye jiengjep yangpu jingne shüppe jempu dopu yejema-a lye yoi mongloong dopu peima-a, tüopa dopu nyih khongkümpu hahkümlak ne kangpu ne yeje, hüpoi tüopa mepu ütam towe ngohpune mengma-a ünepu nyih-o tüopa-a hahne ok,

¹⁷Hüpoi nyihlüm shepupa nyih ngoiye mei ütam towe ngohma-a, vün me jaklak.

¹⁸Lüm shepupa nyih me tüopa mepu ülam ja nehoi hahma-a, kahtapawe dopuwa Kahwange yeyahlak; Tüopa dopuwa lye phalak ne ngohpu meitam lannang she yeyahlak, hüpoi hatüowa yejao yeshapu ne ilak; hüyange aohipawe tüopa hahying lakei tüo kaiye ngaipu ümeng lye kilak.

¹⁹“Mei-a khüm wümpu toishao me yejao yeshapu me omyange peipu ne mengma-a, hatüowa yehahlak yang, hüpoi tüopa-a jakke winlak. Khüm wümpu toishao me aohipa jaosheye pei lye mei hahpu oklak.

²⁰Hüpoi kahta ao yejaope ngohyange, Youngwanpate shüpjempu dopu hahlakeih, tüopa kahta-a iman yo mepu winlak.

²¹Üne-o ütam-e yejao yeshapu toite, kahta yejao yeshapute jeyah; yinmok yejao yeshapute jeyah, yejema-a yejao yeshapu nunushepute letyange hüyange Youngwanpate shüppe jempu dopu mei hahma-a, tüopa kahta yoi kahta mepu winlak yang.”

²²Youngwanpawe Mosa phei ngaowe i:

²³“Israel kahtalante ngaotüoh, numan-e mahu üyao, nyee üyao, yejema-a youn üyaolan hango yehahlak yang.

²⁴Iman nying nyingke lipu yinmok yejema-a phao yinmoklan-e toipu yinmoklan jing üyao yehahlak yang, hüpoi tüolan-a ülao wongpong lan jingne jonne ok.

²⁵Kahta ütam-e Youngwanpa te hahying dopu ja ne dopu yinmoklan jing üyao hahma-a I-a shaaji Kahwang kahtalan yo me omne ye-oklak.

²⁶Israellan ümeken me nyoilakei nyoiyapoi, iman-e awhalan hei yinmoklan iy hahying ne yehahlak yang.

²⁷Aowe tüopa ngaokhüm menglakei, I-a Kahwang kahtalan yo me omne yetamlak.”

²⁸Youngwanpawe Mosa phei ngaowe i:

²⁹“Israel kahtalante tüolan ngaotam tüoh. Aoyinne shüppe jempu dopu doyapeih iman-e tüopa mepu ütamja hünghao ünyei meipu ja ne Youngwanpa tangte peilak yang.

³⁰Tüopa-a yoi yak-e hahying dopu ja ne yahpeilak yang. Iye yinmok jing üyao-a tüopa tepu düam phei jam-e yahpeilak yang hüyange hünghao ünyei meipu ja ne Youngwanpate phalak yang.

³¹Ngengpawe üyaowa wümjong me jaklak, hüpoi düampa-a Aaron hei Ihalan jingne menglak.

³²Hüyange hahying dopu me toipu mepu yajahye üyunga mongmei-e phapu ja ne ngengpate,

³³ngengpa aowe shüppe jempu dopu ja ne iy hüyange üyao do yapeih Ite phalak yang.

³⁴Yinmok jing düam-a hünghao ünyei meipupa, hüyange yajahye üyunga mongmeiye phapu hüke Israel kahtalan mepu Youngwanpawe yah hüyange ngengpa lante phanang. Hatüowa hüke Israel kahtalan-e ngoikülak hipak üshei me ngengpalan te phalak yang.

³⁵Tüolan-a Youngwanpate dopu hahying meitam ja ngohnang hüyange hatüowa Aaron hüyange Ihalan te iman ngengpa ne phünne phapu nyih me iman jingne phayangki.

³⁶Tüopa nyih me Israel kahtalante iman-e tüopa meitam dopu phalak nanjingne Youngwanpawe ngaokeng phayangki. Tüopa-a Israel kahtalan-e ngoikülak hipak üshei me ngao jaiye jonlak jingne phapu ngaokeng lan ngohnang.”

³⁷Tüokhei tüolan-a, jakke dopulan, ülick dopulan, ünu dopulan, shümme yepu dopulan, phünne phapu dopulan, hüyange shüppe jempu dopulan jingne phapu ngaokenglan ngoh nang.

³⁸Tüolan-a Sinai kahtang wanwüng jeng me, Israel kahtalante lye imanjing dopulan phalak jingne ipu nyih me Youngwanpawe Mosate tüopa ngaokenglan phayangki.