Read Konyak Naga LEVITOISHAO 8 Bible Online

LEVITOISHAO 8 - Konyak Naga bible

LEVITOISHAO 8

¹Youngwanpawe Mosa phei ngaowe i,

²“Aaron hüyange I halan khümjing nyenokte yah ongtüoh, hüyange ngengpalan nyemo, pholak minnga, ünu dopu jingne phalak mahu üpongha, nyeepong ni, hüyange do yenyütpu an kümja yahpei tüoh.

³Hüyange ükhong nopu khümjing nyenok tafün shongme jemtüoh.”

⁴Hüyange Youngwanpawe ngaophapu kih-e Mosawe ling; hüyange aope bangnyuha lan jemyapeih,

⁵Mosawe ükhong te i, “Hatüowa Youngwanpawe hanghe linglak jingne ngaokeng pha, tüo ngohnang.”

⁶Tüophei me Mosawe Aaron hei Ihalan sheshao yeme yahpei, hüyange yeng phei iman jaotam.

⁷Hüyange lye Aaronte phakshaoh hüyange ngeng-ahng phakshaoh shaohtam hüyange shiengshüm neiye shienghit hitte tam. lye I tangme ngengpa phakshaoh shaohtam, hüyange shemei yaomawe takpu shienghit khek-e I shiengshüm neiye shatam.

⁸Hüyange lye Ite mongkhüp khüppe tam; hüyange mongkhüp me lye Urim hüyange Thummim khüppe tam.

⁹Hüyange lye I shangme shangnyeih khek nyeihtam, hüyange shangnyeih khek sheshao yeme lye hon juyük shatam, üjaopa jingne jaowe tampu yepinlakpa hüke Youngwanpawe Ite ngaokeng phapu kih-e linge tam.

¹⁰Tüophei me Mosawe phowe tamlak minnga yah, hüyange khümjing nyenok hüyange tüopa me ngohpu khongkümpute pholak jingne ang, hükih-e linge lye tüolan khongkümpuwa Youngwanpate jaowe tam.

¹¹Hüyange lye minnga ütam yah hüyange wümjongte hüyange tüopatepu toinante hüyange yankhong hüyange tüopatepu yajenth, tüolan-a Youngwanpate jaowetamlak jingne nyit me shaitam.

¹²Hüyange Aaron jaowetam-e anglak jingne lye I shangme pholak minnga shokke tam-e Aaron phünne phawe jao.

¹³Tüophei me Mosawe Aaron hayimlan sheshao yete woipei, hüyange Youngwanpawe Mosate ngaophapu mei mei kih-e, imante phakshaoh shaohtam, iman shiengshüm neiye shienghit hittam, hüyange iman shangme shaoshaoh shatam.

¹⁴Tüophei me ünu dopu phalak jingne Mosawe mahu üpong woipei, hüyange Aaron hüyange I hayimlan-e tüopa mahu üpong shang me iman yak-e shüng.

¹⁵Hüyange Mosawe tüopa toi, hüyange tüopa mepu iy ütam yah, hüyange I yaklan phei wümjong ünuk neikonne ngohpu ümüklante, tüopa jaowe tamlak nanjingne phowe tam. Tüophei me lye towe ngohpu iy-a wümjong yajenth me shokke tam. Hükih-e linge lye tüopa-a jaowesha hüyange üjaone linge tam.

¹⁶Mosawe üyei ütang me ngohpu üyao khongkümpu, shemeipupa nyoi, hüyange tetoilan imantepu üyao phei jam-e yah, hüyange tüolan khongkümpuwa wümjong me jaktam.

¹⁷Hüpoi Youngwanpawe Ite ngaokeng phapu mei mei kih-e, mahu üpongtepu topulan üsho, ühak, hüyange üyeilan khongküm omme lye yah, hüyange tüolan-a lakjing ü-at ye me jakke tam.

¹⁸Tüophei me Mosawe jakke dopu nyee üpong yahpei; hüyange Aaron hei I hayim lan-e nyee üpong üshang me iman yak-e shüng,

¹⁹hüyange tüopa-a toi; Mosawe wümjong ükao peli neikonne iy-a shaitam.

²⁰Hüyange aope nyeeponga khoih nyai-e teh, Mosawe üshang, hüyange meikhoi, hüyange üyao vün me jak.

²¹Hüyange aope üyei ütanglan hüyange yashok yakshoklan yeng phei poi, Mosawe nyeepong lanshe wümjong me jakke do; hatüowa üpe ümei jingne jakke dopu ne ngoh yangki; hatüowa Youngwanpawe Mosate ngaokeng phapu kih-e lingyangki.

²²Tüophei me Mosawe ni shepupa nyeepong yahpei, hanghepa ngengpalan phünne phalak jingne ngoh, hüyange Aaron hei I hayimlan-e nyeepong üshang me iman yak-e shüng,

²³hüyange tüopa-a toi, Mosawe tüo mepu iy ütam yahyange, Aaron yakjah ye nakoksa te, hüyange yakjah ye yakpennyute hüyange yakjah ye yapenyute phowetam.

²⁴Tüophei me Aaron hayimlan woipei, hüyange iman yakjahye nakoksa te, hüyange iman yakjah ye yak penyute, hüyange iman yajahye yapenyute Mosawe iy photam. Tüophei me topu iy-a Mosawe wümjong neikonne shaitam.

²⁵Hüyange üyao, ünyei me ngohpu üyao hüyange üyei ütangme ngohpu üyao khongküm, hüyange mongphangte lümpu hüyange tetoi ni, hüyange tüolan üyao, hüyange yajahye üyung Iye yah.

²⁶Hüyange Youngwanpate jaowe tampu do yenyütpu an küm ja mepu lye do yenyütpu ankhüo ja, hüyange minnga phei lingpu an ja, hüyange do yenyütpu anpe ja, yah hüyange tüolan üyao hüyange yajahye üyung tangme angtam.

²⁷Hüyange lye khongkümpu Aaron yak me hüyange I halan yak me angtam, hüyange iman-e Youngwanpa sheshao me yakyüppe dopu ja ne peitam.

²⁸Hüyange Mosawe tüolan-a iman yak mepu yah hüyange wümjong me jakke dopu tang me phünne phapu dopu ja ne jakke do. Tüopa-a hahying dopu, hüyange tüopa üpe meipuwe Youngwanpa mongmei ne tamnang.

²⁹Hüyange Mosawe düam yahyange Youngwanpa sheshao me yak yüppe dopu ja ne pha. Hatüowa phünne phapu nyeepong Mosa jing meitam ne ngoh yangki. Youngwanpawe hangke ngaokeng pha tüokih-e Mosawe sheminlamphe ling yangki.

³⁰Hüyange Mosawe pholak minnga ütamja yah, hüyange wümjong me ngohpu iy ütam yahpei, hüyange hatüo Aaron hüyange I hayimlan hüyange imanjing kheklan me tüolan-a shaitam. Hükih-e linge lye iman hüyange imanjing inkheklan Youngwanpate jaowe shatam.

³¹Hüyange Mosawe Aaron hei I hayimlante i, “Khümjing nyenok tafün shongme mei-a yah intüoh, hüyange yangtüoh; hüyange Youngwanpawe ngaokeng phawe tampu meimei kih-e phünne phawe dopu küm me ngohpu an phei tüokenme tüowa hahtüoh.

³²Hüyange hanghepa mei yejema-a an tolakei, numan-e hatüowa vün me jaktüoh.

³³Numan jaotampu nyih hei hipak manlin manlin, khümjing nyenok tafün mepu nyih nyit mongme numan yengaipe ngohlak yang. Hangjingne numan jaotamlak jingne nyih nyit yahlak.

³⁴Numan ünu yahteilak jingne numan-e tenyih hanghe lingyangki, tüopa linglak jingne Youngwanpawe tomante ngaokeng pha.

³⁵Khümjing nyenok nok me Youngwanpawe hanghe lingne tam tüolan linge wangnyak wangngai nyih nyit mongme numan nyoi ngohlak yang. Numan-e ngao yejaima-a, numan lilak. Hatüowa Youngwanpawe üte hanghe ngaokeng pha tüopa ngohnang.”

³⁶Tüokhei Aaron hei I hayimlan-e Mosa kaiye Youngwanpawe ngaophapu khongkümpu lingyangki.