Read Konyak Naga LEVITOISHAO 9 Bible Online

LEVITOISHAO 9 - Konyak Naga bible

LEVITOISHAO 9

¹Nyih tet shepupa nyih me Mosawe Aaron hei Ihayim hüyange Israel lwngmei lante nyik.

²Iye Aaronte i, “Ko-shangpu hango yenangpu mahu üpongha ja ünu dopu dolak jingne hüyange nyeepongha ja jakke dolak jingne yahtüoh, hüyange tüolan-a Youngwanpa te dotüoh.

³Hüyange Israel kahtalante itüoh, ‘Ünu dopu jingne younpong ja, wangja nao mahu üha ja, hüyange wangja nao nyeepongha ja, ko-shangpu hango yenangpu jakke dolak jingne,

⁴hüyange mahu üpong ja hüyange nyeepong ja shüpshe jempu dopu jingne yahtüoh she itüoh. Tüolan-a minnga nyütyang phei ülick dopu phei jam-e Youngwanpate toidolak; tüolan-a linglak yang hangjingne iman tangte tenyih Youngwanpa ngailak.’ ”

⁵Hüyange Mosawe imante ngaowe tampu kih-e iman-e shemin lamphe khümjing nyenok nokshao me yahpei, hüyange Youngwanpate yoppe khümlak jingne ükhong nopu tüoken me shüppe jem.

⁶Hüyange Mosawe i, “Hatüowa numan-e linglak jingne Youngwanpawe ngaophapu ngohnang; hümme nakshih Youngwanpa phihlangpu wangngai numan tang te ngailak.”

⁷Tüokhei Mosawe Aaronte i, “Wümjong shong te owe wentüoh, hüyange nang ünulan hüyange kahtalan jing ünulan yah teilak jingne ünu dopu hüyange jakke dopu phatüoh; Youngwanpa ngaokeng phapu mei mei kih-e kahtalan jing ünulan yahteilak jingne tüopa dopu phatüoh.”

⁸Tüokhei Aaron wümjong shongte owe wen, hüyange I jingne hanghepa ünu dopu jingne ngoh, tüopa mahu üha toi.

⁹Hüyange I hayimlan-e I tangte iy yahpei, hüyange tüopa iy me I yaklan hüng, hüyange wümjong ünuklan me ngohpu ümüklante pho, hüyange topulan-a wümjong yajenth shongte shokke tam.

¹⁰Tüophei me Youngwanpawe Mosate ngaophapu kih-e, ünu jingne dopu üyao, tetoi, hüyange mongphang shemeipu nyoilan, lye wümjong me jakke tam.

¹¹Hüyange mei hei üsholan-a lye lakjing ü-at me jakke tam.

¹²Tüophei me Iye yinmok hanghepa yoi jingne jakke dopu ngoh tüopa toi. I hayimlan-e Ite iy yahpei, hüyange lye tüopa-a wümjong ünuk peli khongkümpute shaitam.

¹³Hüyange iman-e Ite jakke dolak mei üphin üphin, hüyange üshang wette pha; hüyange lye tüolan-a wümjong me jakke tam.

¹⁴Hüyange lye üyei ütang hüyange üyunglan poi, hüyange wümjong tangme dowe tampulan üshei tangme jakke do.

¹⁵Tüophei me lye kahtalan-e yahpeipu dopu pha; hüyange kahtalan ünu jingne dolak younpong lye yah, tüopa toi hüyange lye yoi jing ünu dopu phapu lingpu kih-e, tüopa dopu pha.

¹⁶Hüyange lye jakke dolak jingne yinmok yahpei, hüyange wanglam kih-e dopu pha.

¹⁷Hüyange lye ülick dopu yahpei, hüyange ankhoih yakpoih ja yah hüyange wümjong me tüopa-a jakke tam. Tüopa-a shom me jakke dopu tokte paopu ne ngoh yangki.

¹⁸Hüyange kahtalan jingne shüppe jempu dopu phalak jingne lye mahu üpong hüyange nyeepong toi. I hayim lanne Ite iy yahpei-e pha, hüyange lye hatüo wümjong neikonne shaitam.

¹⁹Hüyange mahu üpong hei nyeepong üyao-nyeijong üyao, üyei ütang te lümpu üyao, tetoi ni hüyange tüolan me ngohpu üyao, hüyange mongphangte lümpulan yah,

²⁰hüyange yinmok düam tangme angyange tüolan khongkümpuwa wümjong te yah tei. lye üyaowa wümjong me jakke tam,

²¹hüyange Mosate ngaowe tampu kih-e ngengpalan jingne Youngwanpate hünghao ünyei meipupa ne Aaron-e düam hüyange üyung yajahye peiye pha.

²²Aope Aaron-e toidopu lili phawe shoyapeih, lye kahtalan tangme I yak no, hüyange imante moimantam, tüophei me I yu.

²³Hüyange Mosa hei Aaron ni khümjing nyenok te ong, hüyange aope iman nokshaote yuyapeih, kahtalante moimantam, hüyange Youngwanpa phihlangpu wangngai kahta üshei tangme pei.

²⁴Mokhshe Youngwanpawe vün shon, hüyange wümjong tang me ngohpu jakke dopu üyaolan khongkümpu hahküm. Aope kahtalan-e tüopa nge, iman khongkümpuwe üngwün hüyange imanjing sheta kahtokte lette khuhta.