Read Konyak Naga JEREMIA 1 Bible Online

JEREMIA 1 - Konyak Naga bible

JEREMIA 1

¹Hatüo-a Benjamin yikeng pong mepu Anathoth jila mepu ngengpalan yo me ja, Hilkiah üha Jeremiawe hanghe ngaoyangki tüopa jeng.

²Judah me Amon üha Josiah ahngne mengpu wangpeng penme lüm shepupa wangpeng me Youngwanpawe Jeremiate ngao,

³hüyange üne-o aope Josiah üha Jehoiakim ahngne ngoh Iye Iphei üne-o ngao. Tüophei me, Josiah üha Zedekiah wanglam lampu wangpeng penme ja manngoi manngoi Youngwanpawe Iphei hipak phe me ngao. Tüopa wangpeng lekeng nga shepupa me Jerusalem kahtalan phowe tei.

⁴Sha-a Youngwanpa ngao üte peiyange i,

⁵“Taowe nang naonyoi me ang shao memuh Taowe nang shing, hüyange nang puhshao memuh Taowe nanga jaoshayange ang; Taowe nanga jatlan tangte hipa ja ne mengne leyangki.”

⁶Hüwante taowe jan, “Okkeshangpu Youngwanpa, hangke ngaolak taowe yeshing; hangjingne tao jamloi naha.”

⁷Hüpoi Youngwanpawe üte i, “Nanga jamloipu naha she tah i, hüpoi Taowe nang shonne teipu kahtalan tangte taitüoh, hüyange Taowe nangte ngaowe tamlak jingne ngaopha yangpu khongküm imante ngaotam tüoh.

⁸Imante tahnyam, hangjingne nang yinlak jingne Tao nang phei jamme ngohlak. Tao, Youngwanpawe ngaoyangki.”

⁹Tüophei me Youngwanpawe I yak nowe in, ü-jupente let, hüyange üte i, “Sha-a, nange ngaolak jingne Taowe nangte ngao phanang.

¹⁰Leihuyah, tenyih Taowe nangte jatlan tangme hüyange ahngchinglan tangme, bheilak jingne hüyange bhei toiloi tailak jingne, menglak jingne hüyange shokke winlak jingne, linge yelak jingne hüyange shomme tamlak jingne wong phanang.”

¹¹Youngwanpa ngao ü-tangte pei, “Jeremia, nange hanghe ngenangki?” Taowe jan, “Wuh-ha (almond) peequi ja.”

¹²Youngwanpawe üte i, “Nanga shunang.” “Hüyange ü-ngaowa ütingpa me ngaiya shi she Taowe yomme leinang.”

¹³Tüophei me Youngwanpa ngao üne-o nishe pei. “Nange üne-o hanghe nge nangki?” she Iye tong. Taowe jan, “Apyekao me tük ja hokke taowe ngenangki, hüyange hatüowa tüoyekaote shaaji ngailak ne oteiye!”

¹⁴Youngwanpawe üte i, “Tüopa kahmük me aoyin nyoi ngohnang tüolan khongkümpu tangme mahtampupa apyekao mepu hokke ngailak;

¹⁵hang-jingne jatlan üsheite apyekao me peilak jingne Taowe nyiknang. Iman ahngpalan-e imanjing ahngpa shotjing Jerusalem petenlan me linglak hüyange tüopa jantpenyulan neikonlak, hüyange üne-o Judah mepu ülao chingnyulan-o neikonlak.

¹⁶Taowe ü-kahtalante shaoshi yatengne tamlak hangjingne iman-e ünu omyangki; iman-e Tao winne tüohyangki, ülao kahwanglante toidopu phayangki, hüyange peshao lingyangki hüyange tüolante yoppekhüm teki.

¹⁷Tümyah Jeremia; taitüoh hüyange Taowe nangte imante ngaowe tamlak jingne ipu khongkümpu ngao tamtüoh. Iman-e mokhne tahtam, yejema-a taowe iman sheshao me nang mokhne yetamlak.

¹⁸Jaiyah, Jeremia! Tüopa kahmük me ngohpu moilan, Judah ahngpalan, üyih üyonglan, ngengpalan, hüyange kahtalan, nang phei tüi-e ngohkülak. Hüpoi tenyih Taowe nangte iman jange oklak wong pha nang; nanga meipe latyangpu chingnyu kih-e, yan shongnyu kih-e, hüyange shakphan yan jantpenyu kih-e ngohlak.

¹⁹Iman-e nang phei tüi-e hoklak; hüpoi iman-e nang phei tüi-e ye-oklak, hangjingne nang yinlak jingne Tao nang phei ngohlak, she Youngwanpawe ngaoyangki.”