Read Konyak Naga JEREMIA 10 Bible Online

JEREMIA 10 - Konyak Naga bible

JEREMIA 10

¹O Israel nokphong, Youngwanpawe numan jingne phapu ngaolante jaiyah.

²Youngwanpawe hüke i; “Ülao jatlan tailamte tahwoi; Wangme jeje manngaipu ngeye mong toitaiye tahteih, ülao jatlan nyamyapoi tahnyam.

³Tüolan kahtalan mengpu wanglam-a jajang japu. Phao mepu pee ja akke yah, hatüowa pee-ai jonpa nyit-hei yang phei yaowe ngai,

⁴hüyange honhei khüm o-tümme tam. Hatüo toi yetalak jingne yanlag phei takke tamnang.

⁵Hükihpu peshaolan-a maikoh kah mepu nyamshao-mieng kih-e hei ngohnang; iman-e yengao ok; iman yekem okpu nanjingne iman-a kiye kemlak. Imante nyamme tah teih; iman-e numante hang ümengo yeling oklak, hüyange iman-e numante hang ümei-o yeling oklak.”

⁶Youngwanpa, nang lepu ao-o yenang, nanga wongnangpupa, hüyange nang min-a yongnang hüyange wongnang nang.

⁷Jatlan üshei jing ahngpa nangte, aowe yihnoonpu yephalak? Nange yihnoonpu yahlak-a wangnang. Jatlan mepu kentamongtingpu kahta üshei yo me yejema-a ahngpalan üshei yo me, nang kihpu ao-o yenang.

⁸Iman khongkümpu woopalan hüyange ngayounpalan. Pee phei lingpu peshao mepu iman-e hanghe shinge yahlak?

⁹Iman jing peshaolan-a Tarshish mepu khümme, hüyange Uphaz mepu honne phoyange, khongkümpu yakke lingpu toishaha; iman-a inkhek takpu manpalan-e takpu wanghüng hüyange phutti hase inkhek inyange ngoh nang.

¹⁰Hüpoi nang, Youngwanpa, ütingpa Kahwang, nanga üyin Kahwang hüyange jinte üküm yenangpu ahngpa. Aope nang mongshih ngai, kahtoknyu ninnang; jatlan-e nang mongshih ngaipu tükke ye-ok.

¹¹Hüke numan kahtalan-e tüopa imante ilakyang: hüke kahwanglan aoyinne kahtoknyu hei wangdang linge yengai, kahtoknyu hüyange wangphang mepu iman mahtamlak. Shaaji iman-a kahtoknyu ümeken me-o yengelak.

¹²Youngwanpawe kahtoknyu-a I ünganwong kaiye ling; I konjong kaiye Iye kahtoknyu lingengai, hüyange wangdanglan lanne tam.

¹³Aope Iye üngwünlakeih, wang ütang yeme yeng khungkhak nang; Iye kahtoknyu üküm ye mepu wangphomlan yah peinang. Iye waikeipu yo me wanglüppe tamnang, hüyange Iye yowe angpu noongnyu mepu wangyang shonnang.

¹⁴Tüolan phinme, kahtalan üngapa ne hüyange juteih mah tamnang; aoyinne peshaolan ling wüokhüw tamnang, hangjingne ima-a iman-e lingpu kahwanglan-a tahleih hüyange üyin yenang.

¹⁵Iman-a ühak yekohpulan hüyange ye-i-yeshepe linge tamlak yang; aope iman phei hüolak jingne Youngwanpa peilakeih iman-a mah-e tamlak.

¹⁶Jacob Kahwang-a iman kih-e yeje; aowe shemin lamphe ling hatüowa I, hüyange Israel-a I yoi kahtalan-e menglak jingne Iye leyah. Ütahpa Youngwanpa-a I min ngohnang.

¹⁷Jerusalem kahtalan, numan-a tukyange ngoh nang! Numan jing toinan shaijemyah.

¹⁸Youngwanpawe numan-a tüopa kahmük mepu jange teilak; numan yo mepu sheja nehoi towe yetüohpe Iye numan mah-e tamlak. Youngwanpawe ngaoyangki.

¹⁹Jerusalem kahtalan-e üngwün, “Toman hangshin yemeipe mayahpu! Toman makolan-a yemeioklak yang. Hatüowa tomane-o nünne oklak ümuhma she toman-e teih!

²⁰Toman jing nyenok-a heamteki; tüolan shuwe shapu wu phünteki. Toman jing nahalan khongküm taiye kümteki; nishe tomanjing nyenok linge yelak ao-o yenang; tüolan tepu jhotnye kange yelak ao-o yenang.”

²¹Taowe jan, “Tomanjing nyeeyompalan-a üngapalan; iman-e Youngwanpate lamwoilak jingne yetong. Tüojingne iman-e ye-okpu nge, hüyange iman jing nyeelan khongküm yanne tamyangki.

²²Jaihuyah! Ngaolan peiteki! Apyekao jat me nguk-ngukshe popu üyong ja ngoh nangki; tüomepu nyahponglan-e Judah chingnyulan-a wanwüngjeng, ümeken me hiyanlan nyoi tüopa nyoi ne linge tamlak.”

²³Youngwanpa, taowe shingnang yoi teihjing ngoiye oklakte nokpune menge oklak ao-o yenang; kahta aowe-o yoi üyin tangme tükke okpu yenang.

²⁴Nang kahtalante tinge tampha, Youngwanpa; hüpoi toman tangme jamloi wanne yejema-a aope nang mongshih ngaiyapeih shaoshiyateng ne tahtamkei; tüopawe tomante üküm ngoine tamkülak.

²⁵Nangte yoppe khümpu yenangpu jatlan tangme, hüyange kahtalan aoyinne nang yeyah tüolan tangme nang mongshih shoktam tüoh. Iman-e nang kahtalan toiyangki; iman-e toman lanshe mahtamteki, hüyange toman kahmük heamne tamme tüohteki.