Read Konyak Naga JEREMIA 11 Bible Online

JEREMIA 11 - Konyak Naga bible

JEREMIA 11

¹Youngwanpawe Jeremiate i,

²“Jiengjeppu ngaolante jaiyah. Judah hüyange Jerusalem kahtalante itüoh,

³hüke Tao, Israel Kahwang Youngwanpawe aoyinne tüopa jiengjeppu ngaolan yeyah, iman kahta lili tangme phoiwümpu angteki she nange itüoh.

⁴Hatüowa iman pajeiyonglan phei aope iman Egypt kahtok me yan vünjhom kihpu me ngohwante Taowe woiye ngai, hüwante Taowe lingpu jiengjeppu ngohnang. Taowe imante hüke i, iman-e ü-ngao jaima-a, iman-a ü-kahtalan ne menglak hüyange Taowa iman Kahwangne menglak.

⁵Hüwante Taowe iman pajeiyonglan te hanghepa kahyao pheipu kahmük iman-e sha-a tüowe ngohnang tüopa phalak she janpu Taowe linglak.” Taowe i, “Hüke lingtamtüoh, Youngwanpa.”

⁶Hüwante Youngwanpawe üte i, “Judah chingnyulan tangte hüyange Jerusalem chingkeng lamnyulante taitüoh. Tüolan nyoi me ü-ngaolan pongtam tüoh hüyange kahtalante jiengjeppu ülam yahpute jailak hüyange tüolante jaitüoh she itüoh.

⁷Aope Taowe iman pajeiyonglan Egypt mepu yahngai, Taowe lahnyik mongko puphei ü-ngao jailak jingne imante deingao pha, hüyange tüopa nyih ngoiye Taowe kahtalante deingao phawe angnang.

⁸Hüpoi iman-e yeyah yejema-a yejai. Tüo nanleiye kahta lili üngeine hüyange shemeng she ümeng ne yelakpe mengnang. Jiengjeppu anglak jingne Taowe imante ngaokeng pha, hüpoi iman-e lanyangki. Tüokhei tüopa me iye angpu shaoshiyateng lili Taowe iman tangme yahpei.”

⁹Hüwante Youngwanpawe üte i, “Judah hüyange Jerusalem kahtalan-e ü-phei tüi-e ümeng konling nang;

¹⁰Iman pajeiyonglan ünu tangte iman leih yeteki, aoyinne Taowe ipu minling she lan; iman-e ülao kahwanglante yoppe khümteki. Taowe iman pajeiyonglan phei lingyangpu jiengjeppu Israel hüyange Judah moiniye mengteki.

¹¹Tüokhei sha-a, Tao Youngwanpawe imante deingao pha nang, hüke Taowe iman tangme mahtampupa yahpeilak, hüyange iman yeyin oklak. Hüyange aope iman-e jamlak yamme üte üngwünlakei, Taowe imante yejailak.

¹²Hüwante Judah hüyange Jerusalem kahtalan iman kahwanglan aoyinte iman-e toidopu pha iman tangte tailak hüyange jamlak yamme imante üngwünlak. Hüpoi aope tüopa mahtampupa peilakeih tüolan kahwanglan-e iman yintamne ye-oklak.

¹³Judah kahtalan ne iman-e chingnyulan hangshin ngoh teshinne kahwanglan ngohnang, hüyange Jerusalem me nyoipu kahtalan-e chingnyu me chingkeng lamnyulan hangshin ngoh teshinne Baal kahwang ünupate toidolak jingne wümjonglan lingteki.

¹⁴“Jeremia, tüolan kahta min me üte tahyop yejema-a hango tahtong. Aope iman shange ponglakei hüyange jamlak jingne üte nyiklakei, Taowe imante yejailak.”

¹⁵Youngwanpawe inang, “Taowe kenpu kahtalan-e ünupa lingteki. Ü-khümjing me ngohlak iman me hanghe wong ngohnangki? Iman-e janpu maawe phapuwe hüyange yinmoklan toidopu we mahlakpa mepu tükke oklak she iman-e teihpu a? Hatüowe iman mongmei tamlak a?

¹⁶Hipak ja me Taowe imante, ‘Üyak ngüt-shappu, shemeiyaomapu ülickke maayange ngohpu olive pee she nyik’; hüpoi sha-a, wangkhongpu shinne üngwün puphei tüopa üyaklan Taowe vün me jaklak hüyange tüopa üquilan phakke khaiye tamlak.”

¹⁷“Tao, Ütahpa Youngwanpawe Israel hüyange Judah shomme tam; hüpoi sha-a Taowe imante mahlakpawe nyamshao nang. Iman-e tüopa-a iman tangme yahpei hangjingne ima-a iman-e püoh-e ling; iman-e Baalte toidopu kaiye Tao mongshih ngaine tamyangki.”

¹⁸Ü-wepalan-e ü-phei tüi-e tümpu jeng, Youngwanpawe üte shingne tam.

¹⁹Taowa toilak jingne yah-e teipu ütinglakke teihpu nyeeha ja leye ngoh yangki; hüyange iman-e ü-phei tüi-e ümengpa tümnang she taowe yeshing. Iman-e i, “Üne-o wangngoiye ngohpu hipak me tüopa pee-a akke taihah; I toihah hümme nakshih shaaji aowe-o I yeteih tüolak.

²⁰Hüpoi nang, Ütahpa Youngwanpa, nanga ütingpa me kahphünpa; nange kahtalan juteih hüyange teihpeipulan tokke leinang. Tao shangpuwa taowe nang yak me angtam nang; tüokhei taowe nangte leiye ngohning tüolan kahtalan tangme phuh hah shih.”

²¹Tüokhei Youngwanpawe Anathothlan jeng me hüke inang, “Aoyinne nang üyin yamnang hüyange inang, Youngwanpa min me nange itpu tahngao, yejema-a nang toman yak me lilak.”

²²Tüokhei Ütahpa Youngwanpawe inang, “Taowe imante shaoshiyateng phalak! Iman jing shelalan-a wehok me toilak; iman jing nahalan-a seanyao yenglepuwe lilak.

²³Anathoth kahtalan tangme mahtamlakpa yah peilak Taowe tümteki, hüyange aope tüopa hipak peilakeih, iman ao-o yinpu ye-oklak.”