Read Konyak Naga JEREMIA 12 Bible Online

JEREMIA 12 - Konyak Naga bible

JEREMIA 12

¹Youngwanpa, taowe nang phei ü-jeng ngaoma-a, nanga shuwemuh ngohkülak. Tüoyangpoi ngaotingpa jeng taowe nangte tonglak: Hangne ümeng kahtalan teshinne jalunpu? Hangne ngaoting ye-ipu kahtalan okkeshangpu?

²Nange iman dei hüyange iman yalah yu; iman jong hüyange ülick lick. Iman-e hipak phe me nang meipu ngaonang, tüoyangpoi ütingpa me iman-e nangjingne teihtüopu yenang.

³Hüyangpoi, Youngwanpa, nange tao shing; taowe hanghe ling, hüyange taowe nangte hangke ken nange ngenang. Tüolan ümeng kahtalan meine toiyange phatamlak nyeeha kih-e kange shutüoh; iman jingne langlak hipak manngoi manngoi iman yomtüoh.

⁴Hangshin laowe toman kahmük eamahlak, hüyange kahmük lili tepu hüng kuimahlak? Toman kahtalan ünu ümeng jingne yinmoknyuha hüyange awha yuhhalan liküm nang, kahtalan-e inang, “Teman-e hanghe ling Kahwange ye-ngeja.”

⁵Youngwanpawe i, “Jeremia, kahtalan phei phetpute towe nyaima-a, koiponglan phei nang hangke phet oklak? Ngaiphaihpu kahmük me nehoi nang yongpu ye-ok ma-a, Jordan phao yekao me nange hangke linglak?

⁶Nangjei nangnaolan, nenok noksa kahtalan-e nehoi, nang lowelam ne tam; iman jamyange nangte shümme ümeng lingyangki. Iman-e ngaomei ngaoyah peyoi, imante üting tahlak.”

⁷Youngwanpawe i, “Taowe Israel tüohyangki; Taowe leyangpu jat Taowe winyangki. Taowe kenpu kahtalan iman wepalan yakte Taowe phayangki.

⁸Taowe leyangpu kahtalan ü-phei tüi-e yongteki; phao mepu yengkong mailang ja kih-e, iman-e üte waowe hünge tam, tüokhei Taowe imante nuyangki.

⁹Taowe leyangpu kahtalan-a üshei yekao me awlan ükhonge shümpu awha ja leye ngohnang. Momopute peiye omlak jingne phao yinmoklante nyiktüoh!

¹⁰Nyeeyompalan maapuwe üjing wuwüngkah menge tamteki; iman-e ü-kahte ya-e lokke taiteki; iman-e yahhukeipu ü-kahmüka wanwüng jengne ling tamteki.

¹¹Iman-e tüopa-a wanwüngjeng ja ne linge tamteki; ü-sheshao me tüopa-a wüngmakke shüppe tüoh nang. Kahmük nopu wanwüngjeng ja ne mengteki, hüyange aowe-o hangko yeteih.

¹²Kahjee phaotang wanwüng jeng üshei yekao mepu toinan nyieyahlak jingne kahtalan peiteki. Kahmük nopu mahtamlak jingne Youngwanpawe wehok shonteki; ao-o chingmei me yenyoilak.

¹³Ü-kahtalan-e wheat tah dei, hüpoi huh hüng wet; iman-e ngange toi ling, hüpoi tüopate hango yetüo. Nyam nyamshepu Youngwanpa mongshihpu jingne iman deiha liha hango yengai.”

¹⁴Youngwanpawe inang, “Taowe Israel yupilan aoyinne Taowe ü-kahta Israel lante phapu kahmük heammengne tamyangki tüolan jeng ilak ütam ngohnang. Üphao bheiye yahpu kih-e Taowe tüolan kahta ümenglan iman kahtok mepu yahteilak, hüyange Taowe iman mepu Judah yinlak.

¹⁵Hüpoi Taowe iman yah-e teiyang phei me, Taowe iman tangme shüpshe ngohlak; Taowe jat lili yoi yoijing kahmükte hüyange yoi yoi kahtokte yah yelak.

¹⁶Iman mongjang üsheiye ü-kahtalan-e mengpu wanglam yahma-a, hipak ja me iman-e ü-kahtalante Baal min me jiengne tamyangpu kih-e ‘Youngwanpa üyin me ngohtepuwe’ she iman-e janpu yahma-a, hüma-a iman-o ü-kahtalan meitam ja ne menglak hüyange jalunlak.

¹⁷Hüpoi jat ütam-e ngao yejaima-a, hüma-a Taowe tüopa-a lanshe bheiye winlak hüyange tüopa-a mahtamlak. Tao, Youngwanpawe ngaoyangki.”