Read Konyak Naga JEREMIA 13 Bible Online

JEREMIA 13 - Konyak Naga bible

JEREMIA 13

¹Youngwanpawe üte “taitüoh hüyange ü-nying nyingke pengkhai shiengnye shaktüoh hüyange tüowa yahtüoh; hüpoi tüopa-a yeng me tahhüngtam she Iye üte i.”

²Tüokhei Youngwanpa ngao kih-e taowe tüolan-a shak hüyange yah.

³Hüwante Youngwanpawe üte nishe ngao, hüyange i,

⁴“Nange shakyange yah ngohpu shiengnye yayah hüyange Euphrates yengnyute taitüoh hüyange shiengnye-a longnyu phang me üsha ja me lowe angtüoh.”

⁵Tüokhei Youngwanpawe ngaopu kih-e tao tai hüyange tüopa-a Euphrates yengnah me lo.

⁶Hipak ütenja linyang phei me Euphrates te leihye-e shiengnye yah yelak jingne Youngwanpawe üte i.

⁷Tüokhei tao leihye, hüyange ümeken nyoi me taowe tüopa-a lowe ang tüopa nyoi taowe tüo, tüolan-a heamteiye hüyange shaaji yemeipe taowe nge.

⁸Hüwante Youngwanpawe üte üne-o i.

⁹Youngwanpawe hanghe i tüo ngohnang: “Hatüo kih-e Judah otapu hüyange Jerusalem otapu üyong Taowe mahtamlak.

¹⁰Tüolan ümeng kahtalan-e ü-ngao minjai she lan. Iman üngeipalan ne hüyange jinte ümenglan ne meng, hüyange ülao kahwanglan shaoshan hüyange yoppekhüm. Tüokih ngohtepuwe, iman-a tüolan shiengnye kih-e hangne-o ümeipe ngohlak.

¹¹Shiengshüm neiye shiengnye-e mongjüonge hitpu kih-e tüokih-e Israel hüyange Judah kahtalan khongkümpuwe üte mongjüonge künne tamhuwe teih. Iman-a ü-kahta ne menge tamlak hüyange üte yihlupu hei yihnoonpu yahpeilak jingne Taowe tüopa ling; hüpoi iman-e ü-ngao minjai she lingyangki.”

¹²Youngwanpa Kahwange üte ngaowe i, “Jeremia, Israel kahtalante itüoh hüke wuwüngti tük lili me wuwüngtiye maatamtüoh. Wuwüngti tük lili wuwüngtiye maatamlak iman-e shingnang she iman-e janlak.

¹³Hüwante imante itüoh, Tao, Youngwanpawe tüopa kahmük me ngohpu kahta lili iman manjok manjok Taowe wuwüngtiye maatamlak: aoyin David huhayimlan-e ngoh iman ahngpalan, ngengpalan, hipalan, hüyange Jerusalem kahtalan khongkümpu!

¹⁴Tüophei me wuwüngti tük kih-e Taowe iman üjoi hei üyonglan teihokke kawinlak. Shüpsheye, yayenge, yejema-a kenne teihpuwe iman toilak mepu Tao tükne ye-oklak.”

¹⁵Israel kahtalan, Youngwanpawe ngaoteki! Innenyaiyah hüyange Ite jaiyah.

¹⁶Iye wangnyak yah peishao me, hüyange kahtanglan me numan yashah hüoshao me, numan Kahwang Youngwanpate yihnoon tüoh; numan-e monghümme teihpu wangngai Iye wangnyak üyongne lingshao me!

¹⁷Numan-e yejaima-a, numan otapu jingne taowe laowe üngwünlak; tao khah-e shaplak; hüyange ü-mükphi yünlak, hangjingne ima-a Youngwanpa jing kahtalan phowe teipalan-e yahtei teki.

¹⁸Youngwanpawe üte i, “Ahngpa hüyange Inyute iman shotpu ahngpa shotjing mepu yutüoh she itüoh; hangjingne ima-a iman shang mepu shemeiyaomapu ahngpa shaoshaoh yeiteki.

¹⁹Judah heyekao bangchinglan-a tukteki; iman kaiye sheja nehoi yetai oklak. Judah kahtalan khongkümpu phowe yahtei teki.”

²⁰Jerusalem leitüoh! Numan wepalan-a apyekao mepu yeküki! Nangte paone tampu numan kahta, tüopa jingne nang teshinne otayangpulan-a üpu?

²¹Aope nange nang shümpalan she teihpu kahtalan-e chinghah yange nang tangme wanglam lamma-a, nange hangke ilak? Nanga moipaiwantepu sheko pongpu kih-e shange ponglak.

²²Nangte tüolan khongkümpu hangne ngaipu she nange tongyahma-a hangne nang jing inkhek-a hit hüyange nang kange tei, tüo hangne ima-a nangjing ünu-a jamloipu jingne.

²³Ethiopialan-e yoi üsho jeileipu oklak a? Yejema-a shengtüp-shah-e yoi me shangpu winpu oklak a? Iman-e oklakne mengma-a, numan aoyinne ünu lingnang hango yeje hüpoi ümeng lingpalane-o hanghe ütingpa linglak shinglak.

²⁴Youngwanpawe numan-a wanwüngjeng wangyange puwe teipu tahphan (tahjan) kih-e shaiye tamlak.

²⁵Iye iyangki hatüowa numan jing ngoikülak yatuhshao ne ngohlak. Hatüo kih-e Iye numante linglak tümteki, hangjingne ima-a numan-e I pemei hüyange tahleih kahwanglante ütinglak.

²⁶Youngwanpa Iye nang inkhek khokke winlak hüyange nang pümkeng me wüotüo ne tamlak.

²⁷Iye nupu toishaolan linge Iye nang nge. Ülao jat kahwanglan pheite kahtalante hüyange kah yete, inok yupipa shekonyu waowe woipu kahta kih-e yejema-a koi üpi pheite woipu koipong kih-e nang woipu Iye ngeteki. Jerusalem kahtalan, numan mahnang! Numan jaowe aope ngoh oklak shi?