Read Konyak Naga JEREMIA 14 Bible Online

JEREMIA 14 - Konyak Naga bible

JEREMIA 14

¹Youngwanpawe Jeremiate heleipu jeng ngaowe i,

²“Judah-a mangshappu phei ngohnang; I mepu chingnyulan-a linang, tüopa mepu kahtalan-a mongmeng pu phei kahtok me lamnang, hüyange Jerusalem-e jamlak yamme üngwün nang.

³Hakpalan-e yeng yamme imanjing shaoshannyulan teinang; iman yengkoklante tainang, hüpoi yeng yetüo; imanjing yengtük ükeng phei iman leih yenang. Mongshangne tamme hüyange nüngneine tamme, iman-e yoi sheta lonang.

⁴Hangjingne ima-a wai yekei hüyange kahtok-a ea-mahyange em-ngai, kahhampalan mongjangte peiye dak-e teih, iman-e iman sheta lonang.

⁵Hüng yenangpu nanjingne meishi ünyuwe nehoi yoi-e puhpu üha phao yo me tüoh nang.

⁶Phao gadolan kahmüoh ütanglan me yongnang, hüyange hiyanlan kih-e lüoyahlak jingne ngan-nang. Iman-e hahyinglak yenang tüoh-e iman mük pihmahnang.

⁷“Toman ünuwe toman yeshuja she iyapoi, nange janyangpu kih-e, tomante jampha, O Youngwanpa. Nang mepu toman hipak phe me yanne taiyangki; toman-e nang phei tüi-e ünu omyangki.

⁸Israel monghümpuwa nang ja shing; aowe toman mahlakpa mepu yinnang hatüowa Nang. Toman kahmük me yinpa ja leye, pha ja shingha pümpu yinkempa ja leye nang hangne ngohpu?

⁹Mokhshe woiyahpu kahta ja, jamlak jingne wong yenangpu wetaipa kih-e nang hangne ngohpu? Ütingme, Youngwanpa, nanga toman phei ngohnang! Toman-a nang kahtalan, toman winne tah tüohpha.”

¹⁰Youngwanpawe tüolan kahtalan jeng inang, “Iman ne ü-mepu phette tailak jingne lengnang, hüyange iman-e iman nying nyingke tükke ye-oklak. Tüokhei Taowe iman phei mong yemeilak. Iman-e lingyangpu püohpinpu Taowe teihtüolak hüyange iman ünu jingne Taowe shaoshi yateng phalak.”

¹¹Youngwanpawe üte i, “Tüolan kahtalante jamlak jingne üte tahtong.

¹²Iman-e nyaowele yapeyoi, jamlak yamme iman-e üngwünpute Taowe yejailak; hüyange iman-e toidopu phayapoi hüyange hahying doyapeyoi, imante Taowe monghahpu yengohlak. Tüonanleiye, Taowe iman-a wehokke hüyange seanyaoyengle-e hüyange daktin phei toilak.”

¹³Hüwante taowe i, “Okkeshangpupa Youngwanpa, leihuyah hüke hipalan-e kahtalante, ‘Shaaji wehok yejema-a seanyao yenglepu yenanglak she inang, hangjingne nange janpu phayangki she, hüke teman kahmük me chingmei shaha ngohlak she iman-e inang.’ ”

¹⁴Hüpoi Youngwanpawe üte janne i, “Hipalan-e ü-minme tahleih inang; Taowe iman yeshon, yejema-a Taowe imante hang ngaokengo yepha yejema-a imante ngao pha ja nehoi yengao. Iman-e ngaohümpu himanglan-a ü-mepu peipu ne yeje; iman-e itte ipulan-a iman-e teihtüowe ipu jajang japulan ngohnang.

¹⁵Tao, Youngwanpawe tüolan hipalan aoyin Taowe yeshon hüpoi aoyinne ümin me ngao hüyange wehok hei seanyao yenglepuwe tüopa kahmükte yeshahlak üja she i, Taowe imante hanghe linglak jingne tüm nangte inang-Taowe iman-a wehok me hüyange seanyao yenglepuwe toilak.

¹⁶Kahtalan aoyinte iman-e tüopa ngaolan ngaoyangki iman-o hüke muh toilak. Iman jing manga Jerusalem chingkenglamnyu lanme shüppe tüohlak, hüyange iman muwe tamlak jingne ao-o yenanglak. Tüolan-a iman khongkümpu tangme, iman shekonyulan, iman shelalan, hüyange iman yhalalan tangme ngailak. Iman-e lingpu ümenglan jingne Taowe leih phalak.”

¹⁷Youngwanpawe kahtalante ü-mongmengpu jeng hüke iye tamlak jingne üte ngaokeng pha: “Ü-mük me wangnyak wangngai mükphei yünne tamtüoh, shappeyoongpu tao aope-o minlak ngoh, hangjingne ima-a ü-kahtalan yeonge luwe mayah, hüyange yemeipe mako sha.

¹⁸Tao kahkote ngaiye tai ma-a, wehok me toipu kahtalan mang taowe nge; tao bangchingnyute ngaiye tai ma-a, seanyao yengleye lipu kahtalan taowe nge. Hipalan hei ngengpalan-e iman toishao yelakpe ling, hüpoi iman-e hanghepa ling iman-e yeshing.”

¹⁹Youngwanpa, nange Judah-a lanshe winpu a? Zion kahtalante nange nupu a? Toman meiye ye-oklak ne hangne nange tomante teshinne yemeipe mako shapu? Toman-e chingmei jingne yammelei; hüpoi ümeipa hango yengai; meiye tamlak jingne toman-e monghümme teih, hüpoi tüopa nanleiye nyamnyam shepupa pei.

²⁰Toman-e nang phei tüi-e ünu omyangki, Youngwanpa; toman-e toman ünulan hüyange toman pajeiyonglan ünu jannang.

²¹Nange janyangpulan teihtüo pha hüyange tomante tahnupha; nangjing müktishiwa ahngpa shotjing nyoi, Jerusalem tangme mongmeng tahpei pha. Nange toman phei yahpu jiengjeppu tahmeng pha.

²²Jatlan jing peshaolan aowe-o wai yeshon oklak; yejema-a wange yoi nying nyingke waishuya yüttam ne ye-oklak. Toman monghümpu toman-e nang me angyangki, O Youngwanpa toman Kahwang, hangjingne ima-a tüolan khongkümpu lingpuwa nang ja shing ngohnang.