Read Konyak Naga JEREMIA 15 Bible Online

JEREMIA 15 - Konyak Naga bible

JEREMIA 15

¹Hüwante Youngwanpawe üte i, “Mosa hei Samuellan üte yoppe towe tüome yongyapoi, tüolan kahtalante Taowe shüpshe hango yehüolak. Iman taine tamtüoh; ü-phin mepu iman yonge taine tamtüoh.

²Hüyange aope iman-e nangte “Toman üpeyekaote tailak? She tongma-a, nange imante itüoh: Youngwanpawe hüke inang: Aoyin dakmeng jingne nyingtam, dakmeng me! Hüyange aoyin yanglow jingne nyingtam, yanglow-e! Aoyin seanyaoyengle ne nyingtam, seanyaoyengle-e! Hüyange aoyin photeilak ne nyingtam, photeilak!”

³Tao, Youngwanpawe iman tangme nyam nyamshepu ülam peli ngailak tümyangki: iman wehok me yanglow-e toilak; iman manga kuihalan-e tekke ngailak; iman-a awhalan-e hahlak, hüyange hanghe towe tüoh tüopa tangme phao yinmoklan petlak.

⁴Aope I Judah me ahngne mengyapeih, Hezekia üha Manasseh-e Jerusalem me hanghe ling tüopa jingne kahtoknyu kahtalan nopu Taowe imante mokhne tamlak.”

⁵Youngwanpawe inang, “Aowe nangte yayenge teihlak shi, Jerusalem kahtalan hüyange nangte aowe shappe yoonglak? Nang hangke ngohnangki she tonglak jingne hipak yah-e ao laklak?

⁶Kahtalan numan-e Tao yeyah; numan-e üte numan tokphei lüpyangki. Tüokhei Taowe ü-yak noyangki hüyange numan mahne tamyangki, hangjingne ümongshihpu tükpuwe shaaji Tao eang.

⁷Kahmük mepu jila phe me tahphan kih-e Taowe numan wangyangte winne tam. Ü-kahtalan, Taowe numan mahne tam, Taowe numanjing hayimlan toi, hangjingne numan-e numan ünu lam mepu yelak ok.

⁸Numan kahmük me yengching pheih ükek phei shepang she wamnyulan ünyei ngohnang. Taowe numan jing naoshelan iman dehepu hipak me toi hüyange imanjing nyuyonglan shangne tam. Shaoshiyalipu hüyange nyamnyam shepuwe Taowe imante mokhshe shette tam.

⁹Nyuyong aowe yoi hayim nyit ngoiye mah, lüohepu ye-ok, hüyange liye ta. Yha jing nyihninga wangnyak ne lüp, yha wüokhüw hüyange mongjang ngoiye dak. Numan aoyin üyin me ngohnang, Taowe numan wepalan-e toine tamlak. Tao, Youngwanpawe ngaoyangki.”

¹⁰Taowa hangke mong yemei okpu kahta ja! Hangne ü-nyuwe tüopa kahtoknyute tao peine tam? Kahmük me ngohpu kahta lili phei tao teelakne hüyange ngao moplak ne ngainang. Taowe hang sheng-ngin-o sea yepha yejema-a hango sea yeyah; tüoyangpoi moilanne üte phoinang.

¹¹Youngwanpawe i, üting me ümeipa wongpong jingne taowe nang yinlak; üting me nang wepalan-e mahshümpu hipak me hüyange mongshang mongmeng hipak me nangte tongne lingtamlak.

¹²Kahta jawe yan, apyekao mepu yan yejema-a shakphan yan phak oklak a?

¹³“Kahmük nopu me ü-kahtalan-e omyangpu ünulan jingne, imante shaoshiyateng phalak, imanjing moth hüyange shengngin yah teilak jingne Taowe wepalan shonlak.

¹⁴Iman-e shinge yengohpu kahmük ja me Taowe iman wepalan shaoshan ne tamlak, hangjingne ü-mongshihpuwa vün kih-e, hüyange hatüowa jin jinte pah-e ngohlak.”

¹⁵Hüwante taowe i, “Youngwanpa, nange shinge ngohnang. Tao teihtüopha, hüyange üte jam pha. Aoyinne üte shaoshiyateng ne tam imante taowe phuh hahshih ning. Iman jingne nün-okpu jamloi tahngoh, ngohtüohma-a iman-e tao toine ok. Nang jingne üte teetamyangpu she teihtüoyah.

¹⁶Nange üte ngao, hüyange ngaokek lan-a taowe hahyangki. Taowa nangjing, Youngwanpa Ütahpa Kahwang, tüokhei nang ngaowe ü-mongjang mongmei hüyange hoongli mongongpuwe maatam nang.

¹⁷Ülao kahtalan phei nyiyai-e hüyange wonnewange taowe hipak yewin. Nang ngaokeng jaiye taowa ü-nying nyingke ngoh hüyange mongshih puwe maatam yangki.

¹⁸Hangne tao yelakpe shanglak shi? Hangne ü-makolan-a yemei oklak? Hangne tüolan-a yemeipu? Jüo hipak me eamahpu yengyin kih-e tao mong yemeipe min ngohtei she nange teihpu a?”

¹⁹Tüopate Youngwanpawe janne i, “Nang lüppe yema-a, Taowe nang (nishe) yahlak, hüyange nanga nishe ü-shaoshanpa ne menglak; Ühak yekohpu ngao ngaohah shepu nanleiye nange yahlak ngaolan ponge tamma-a, nanga nishe ü-hipa ne menglak. Kahtalan nang tangte leih-e yekülak, hüyange iman tangte nang tailak wongpong ne yemenglak.

²⁰Tüolan kahtalan sheshao me Taowe nanga shakphan yan jantpenyu shinne monge linge tamlak. Iman nang phei tüi-e hoklak, hüpoi iman-e nang yenaolak. Nang tükke anglak hüyange nang yinne anglak jingne Tao nang phei ngohlak.

²¹Kahta ümenglan hüyange yakphei lükpalan wong mepu Taowe nang yinne tamlak. Tao, Youngwanpawe ngaoyangki.”