Read Konyak Naga JEREMIA 16 Bible Online

JEREMIA 16 - Konyak Naga bible

JEREMIA 16

¹Üne-o Youngwanpa ngao üte pei,

²“Hatüo nyoi me nange sheko tahyah, hüyange ha puh moi tahpai.

³Tüome puhpaipu nahalante hüyange iman nyupalante hanghe ngailak ne ngoh Taowe nangte ipha ning.

⁴Nyam nyamshepu daktin phei iman lilak, hüyange iman jingne aowe-o mang yeshaplak yejema-a iman mang yemulak. Iman jing manga jantkih-e kahtok me phongyange ngohlak. Iman-a wehok me toilak yejema-a seanyao yengleye lilak, hüyange iman manga awhalan hüyange phao yinmoklan hahying ne menglak.”

⁵“Ümeken me mangshappu ngoh tüoken noksate nang tah ong. Ao jingne-o mongshang mongmenge tah ngoh. Taowe shaaji ü-kahtalante chingmei yephalak yejema-a imante kenpu hei shüpshe yehüolak.

⁶Tüopa kahmük me hakpa hei toihalan moilan lilak, hüpoi aowe-o iman yemutamlak yejema-a iman jingne mang yeshaplak. Aowe-o I mongmengpu hüowe yoi nying nyingke kowah-e yoi shang yelinlak.

⁷Aope mongkenne teihpupa lilakei, aowe-o I toloimeiye tamlak jingne ao phei-o yehah yeyinglak. Aowe-o shüpshe yehüolak, ütamja aoyinne Inyu yejema-a Ipa mahpu jingne nehoi yehüolak.”

⁸“Ümeken me kahtalan momonang tüopa noksate nang tah ong. Iman phei hah yinglak jingne tahshot.

⁹Tao, Ütahpa Youngwanpa, Israel Kahwange hanghe ilak ne ngoh tüopate jaiyah. Nokyam momowe mongmeipu ngaowüng hüyange hoongli mongongpu ngaowüng Taowe lakne tamlak. Tüome ngohpu kahtalan tüopa ngaipu ngelak jingne üyin me ngohnang.”

¹⁰“Aope nange imante tüolan khongkümpu iye tamlakei, iman-e nangte hangne Taowe imante teshinne yemeipe linglak jingne tümpu she tong phalak. Iman-e hanghe toilang yangpu jingne ümengne meng hüyange iman Kahwang Youngwanpa phei tüi-e hanghe ünu omyangpu she tonglak.”

¹¹Hüwante imante Youngwanpawe hüke iyangki she itüoh, “Numan jing pajeiyonglan ü-mepu lüppe tai hüyange ülao kahwanglante yoppe khümme shaoshan. Iman-e Tao winne tüoh hüyange Taowe nyüopulan yejai.

¹²Hüpoi numan-e numan jing pajeiyonglan phei nehoi shemeng she ling; Numan khongkümpu üngeine hüyange ümengne meng, hüyange numan-e ü-ngao yejai.

¹³Tüojingne, numan yejema-a numanjing pajeiyonglan-e nehoi jejeman shingpu kahmük jate Taowe numan shüppe tamlak. Hüyange tüoken me numan-e wangnyak wangngai ülao kahwanglan shaoshanlak, hüyange Taowe numante shüpshe yehüolak.”

¹⁴Youngwanpawe inang, “Kahtalan-e shaaji aowe Israel kahtalan Egypt kahtok mepu yahngai, tüopa üyin Kahwang min me jiengjeppu yenanglak hipak peiküki.

¹⁵Tüonanleiye iman-e Taowa üyin Kahwang aowe Israel kahtalan apyekao kahmük mepu hüyange ülao kahmüklan khongkümpu mepu ümeken me Taowe iman yanne tam tüolan mepu woiye pei she, ü-min me jiengjeplak. Taowe iman pajeiyonglan te phapu kahmük, iman jing yoi kahmükte Taowe iman yah yelak. Tao, Youngwanpawe ngao yangki.”

¹⁶Youngwanpawe inang, “Nyah ompalan üngang peilak jingne hüyange tüolan kahtalan pholak jingne Taowe shontam nang. Tüophei me Taowe meitoipalan üngangte kahmüoh hüyange kahtang hüyange longnyu yomepu longsalan leihkheih-e imante jang ngailak jingne shonlak.

¹⁷Iman-e hanghe lingnang sheminlamphe Taowe ngenang. Ü-sheshao me hanghe-o lo oklakne yenang; iman ünulan ü-mepu yinne okke yenang.

¹⁸Taowe iman ünu hüyange ümenglan jingne ni me shinne paowe tamlak, hangjingne ima-a iman-e kahta mang kih-e üyin yenangpu peshaolan ne ü-kahmük nuweshak tamyangki, hüyange imanjing tahleih kahwanglan-e maawe tamyangki.”

¹⁹Youngwanpa aowe tao tükke ang hüyange üte wong pha hatüowa nang ngohnang; shangpu hipaklan me nange üte jamyangki. Kahtoknyu üküm yekaolan mepu jatlan nang tangte peikülak hüyange ilak, “Toman jing pajeiyonglan me hango yenang hüpoi tahleih kahwanglan shaha, angsa peshaolan tokte kaiye hango yenang.

²⁰Kahta jawe yoi jing kahwanglan linglak a? Yeje, Iye lingpu ne mengma-a, tüolan-a ütingpa kahwanglan ne yejelak.”

²¹Tüokheima, Youngwanpawe inang, “Ja me lingpuwe jatlante ünganwong hüyange ü-kon üyong Taowe shingne tamlak; hüwante iman-e Taowa Youngwanpa she shinglak.”