Read Konyak Naga JEREMIA 17 Bible Online

JEREMIA 17 - Konyak Naga bible

JEREMIA 17

¹Youngwanpawe inang, “Judah kahtalan, numan ünuwa jüpyang phei yanhu-e nyanyange ngohnang; hatüowa numan mongjang me diamond üjuwe watte nyanyange hüyange numan jing wümjong ünuklan me tuyange ngohnang.

²Numan kahtalan-e kahmüohlan me üyak pheipu peshüm phang lili me Asherah kahwanglan lepu hüyange wümjonglan lingyange,

³hüyange kahtanglan me ngaiphaih-e yoppe khüm. Numan kahmük nopu me numan-e omyangpu ünulan jingne numan jing shengngin hüyange numan jing moth numan wepalan-e yah-e teilak jingne Taowe linglak.

⁴Taowe numante phayangpu kahmük numan-e tüohne ngailak, hüyange tüopa jeng numan-e hango shinge yenangpu kahmük me numan-e numan wepalan shaoshanlak jingne Taowe lingtamlak, hangjingne ima-a ü-mong shihpuwa vün kih-e, hüyange hatüowa jin jinte pah ngohlak.”

⁵Youngwanpawe inang, “Aowe ü-mepu lüppe tai hüyange I ütinglakpu kahta me ang, iymei kahta wongte monghüm, tüopa kahtate Taowe phoilak.

⁶I-a wanwüngjeng mepu phümtüm hanghepa eawahpu phaonyu jongme hüm kahtok. Ümeken me hango ngaine ye-ok tüopa me jonge ngai, tüopa lenang, Ime ümeipa hanghe-o jeje manngai.”

⁷“Hüpoi aowe I ütinglakpu Youngwanpame ang, tüopa kahtate Youngwanpawe moimanlak.

⁸I-a yengyin nahme hüyange yalah yeng ngoiye yuwe jongpu pee ja leye ngohlak. Aope wangyang üsheam peilakeih nyampu yenang, hangjingne ima-a tüopatepu üyaklan hü-ünge ngohtepuwe; aope wai yekeilakei tüopa mongshanglak hango yenang; tüopawe yelakpe ülick licktam nang.”

⁹“Kahtanyuha mongjang aowe shinge oklak shi? Tüopa shinne lowelampa ülao hango yenang tüopa meiye oklak mepu jamloi wannang.

¹⁰Tao, Youngwanpawe, kenmong yamnang hüyange kahtalan mongjang te toknang. Taowe kahta lilite I nyoipu wanglam kih-e, Iye hanghe lingyangki tüopa kih-e jonne painang.”

¹¹Kahta aowe ngaoting ye-i-pe ngin tüoyapeih tüopa-a Iye yekek pute awkek tu-ngaipu awha ja lenang. Üyin dehepu hipak me Iye hak-hepuwa Iye mahlak, hüyange üküm ne I hangne-o yemengpe üngapa ne menglak.

¹²Teman khümjinga müktishiwapu ahngpa shotjing kih-e üwangne muh shedaopupa kahmüoh me yongyange ngohnang.

¹³Youngwanpa, nanga Israel monghümpa; aoyinne nang winne tüoh khongkümpute wüotüone tamlak. Kahmak me min nyanpu kih-e iman yeonge mahlak, hangjingne iman-e Youngwanpa nang, jaoshepu yengpeiwo winne tüohyangki.

¹⁴Youngwanpa, tao meipha hüyange tao lanshe meilak; tao yinpha hüyange tao lanshe yinpu oklak. Taowe yihlupu phapuwa nang ja shing!

¹⁵Kahtalan-e üte inang, “Teman te Youngwanpawe ümeng yamhümpuwa üpu? Tüolan-a Iye sha-a lingne tamtüoh!”

¹⁶Hüpoi, Youngwanpa, iman tangme mahtampupa peitamlak jingne taowe nangte aope-o yekang; Iman jingne shanghah shaoshipu hipak peitamlak taowe monge yeteih. Youngwanpa, nange tüopa shingnang; taowe hanghe ngaoyangki nange shingnang.

¹⁷Nyam nyamshepu ja ne üte tah ngohpha; aope shanghah shaoshi peilakeih, nanga tao yinne tampupa nyoi.

¹⁸Aoyinne üte shaoshi yatengne tamnang imante wüotüopu peitam shih, hüpoi tao yintampha, Youngwanpa. Nyam nyamshepuwe iman-a mahne tamtüoh, hüpoi üte nyam ne tahtam pha. Iman tangme mahtampu peitamtüoh hüyange ü-oun ü-oun me paitam tüoh.

¹⁹Youngwanpawe üte i, “Jeremia, taitüoh hüyange Kahtalan jing Peten, hanghe kaiye Judah ahngpalan chingnyute ongnang hüyange tainang tüoken me, tüophei me Jerusalem mepu ülao petenlan khongkümpu me ü-ngaolan pongtam tüoh.

²⁰Tüopa petenlan kaiye ongpu ahngpalan hüyange Judah me ngohpu kahta khongküm hüyange Jerusalem me nyoipu kahta lilite, Taowe hanghe i, tüopate jailak jingne itüoh.

²¹Imante tüopa itüoh hüke iman-e iman üyinte kenma-a, iman-e Sabbath me hangki hango yekilak; iman-e Jerusalem petenlan kaiye hango kiyange onge peipu yengohlak;

²²yejema-a iman noksalan mepu hanghe-o kiyange yetailak. Iman-e Sabbath me toi yelinglak; iman-e tüopa-a Taowe imanjing pajeiyonglante ngaophapu kih-e üjao nyih ne nyüolak wongpong.

²³Tüoyangpoi iman-e üte yejai yejema-a hango mong yepha; iman üngei ne meng; iman-e üte yejai hüyange ü-mepu jaiye yeyah.”

²⁴“Iman-e ü-ngaokenglan khongkümpu jailak yang she tüolan kahtalante itüoh. Iman-e Sabbath me hangki hango kiyange tüopa chingnyu petenlan yekailak. Iman-e Sabbath-a üjao nyih ne nyoilak hüyange toishao hango yelinglak.

²⁵Hümme nakshih iman ahngpalan hüyange ahnghalan Jerusalem petenlante ongpu oklak hüyange David me ngohpu jakihpu ahngpa üngan wong ngohlak. Judah hüyange Jerusalem kahtalan phei jamme iman-e pong tongtoilan hüyange koiponglan me lüngleilak, hüyange Jerusalem chingnyuwa hipak phe me kahtalan-e maayange ngohlak.

²⁶Kahtalan Judah jilalan mepu hüyange Jerusalem neikonpu chingshaolan mepu peilak; iman Benjamin yikenglan mepu, kahtang yashong ye mepu, kahtanglan mepu, hüyange Judah heyekao mepulan peilak. Iman-e Ü-khümjingte jakke dopulan hüyange toidopu, hahying dopu hüyange sünyet, tüolan phei jamme minyong phawe dopulan yah-e peilak.

²⁷Tüoyangpoi numan-e ü-ngao jailak wongpong hüyange Sabbath üjao nyih ne nyoilak wongpong. Tüopa nyih me iman-e Jerusalem petenlan kaiye hangki hango yekilak yang, iman-e tüopake lingma-a, Taowe Jerusalem petenlan-a vün pahtamlak. Vünne Jerusalem ahngnoklan shulak, hüyange aowe-o tüopa meiye tampu ye-oklak.”