Read Konyak Naga JEREMIA 18 Bible Online

JEREMIA 18 - Konyak Naga bible

JEREMIA 18

¹Youngwanpawe Jeremiate peipu ngao:

²“Tükyaopa nokte yutüoh, tüoken me Taowe nangte ü-ngaolan phalak!”

³Tüokhei tao tüokente lai hüyange; tükyaopa-a yoi tüknei me toi linge ngoh.

⁴Hangkih tingme yaopu tükja yemeipe leihkheih ngailakei, Iye kümpkahtok-a yah hüyange tüopawe ülaoja ne linge ngai.

⁵Hüwante Youngwanpa ngao üte pei,

⁶“Tük yaopawe kümp ounte hanghe ling, tüo kih-e Israel kahtalante Taowe linglak shupu ne yejelak a? Tükyaopa yak me kümpoun ngohpu kih-e Israellan-a ü-yak me ngohnang.

⁷Hanghe hipak me Taowe jat ja yejema-a ahngching ja bheiwinlak, yejema-a mengwinlak, hüyange mahtamlak jeng ngaolakei,

⁸hüwante tüopa jat iman ümengpa mepu monglüpma-a, Taowe hanghe linglakei she ngaoyangki tüopa yelingtamlak.

⁹Tüoyangpoi üne-o, hanghe hipak me Taowe jat ja yejema-a ahngching ja shomlak yejema-a linglakei she ilakei,

¹⁰hüwante tüopa jatte ü-ngao yejai hüyange ümeng lingma-a, Taowe hanghe linglakei she iyangki Taowe yelinglak.

¹¹Sha-a hüma-a, Judah hüyange Jerusalem kahtalante Taowe iman phei tüi-e ümeng tümnang hüyange imante shaoshiyateng phalak jingne tümteki she itüoh. Ünupa üyinlan-e nyoipu mepu laktüoh she, iman tai-ongpu lam jeileilak hüyange iman-e lingpu toishaolan mepu jeileitüoh she imante itüoh.

¹²“Hüpoi iman-e janlak, ‘Yeje, toman-a hangne? Toman khongkümpu hüke muh üngei palan-e hüyange toman-e lengpu kih-e ünu memuh ngohlak.’ ”

¹³Tüokhei Youngwanpawe inang, “Jat lilite tongtüoh hükihpu toishao üshongwante je-ngai yapu! Israel kahtalan-e nyam nyamshepu toishao ja lingteki!

¹⁴Lebanon longwak üdao me yi yehütpe je-ngohtepu a? Wüngmakpu kahtang mepu yünpu yengyinlan eamahpu je-ngaitepu a?

¹⁵Tüoyangpoi ü-kahtalan-e Tao pemahteki; iman-e peshaolante sünyet jaknang. Iman kemhah shepu tailamme iman yashah hüoteki, iman shaaji ülangpa tailamte yewoi; iman lamkonte kemnang.

¹⁶Iman-e tüopa kahmük-a nyam nyamshepu toilam ja ne, jinte yeleihupu nyoija ne linge tamteki. Aoyin tüopa linne tai khongkümpuwe iman-e hanghe nge tüopa jingne mokhlak; yashan yalepuwe iman-e iman ngüm shenglak.

¹⁷Heongye wangyange kahmak puwe teipu kih-e, Taowe ü-kahtalan iman wepalan sheshao me yanne tamlak. Imante Taowe ü-tokphei lüplak; aope wengtuh ümeng peilakeih Taowe imante yejamlak.”

¹⁸Hüwante kahtalan-e i, “Kei Jeremia jeng me teman-e ülam ja linghah! Temante konnyüo ngaoleilak jingne ngengpalan jinte ngohlak, temante nyüoweleipu phalak jingne kentamongtingpalan hüyange Kahwangpa ngaolan ponge tamlak jingne hipalan ngohlak. Kei, I phei tüi-e ngaomeng yahpeihah, hüyange Iye hanghe iyapeih yejailak jingne lakke tamhah.”

¹⁹Tüokhei taowe yop, “Youngwanpa, taowe hanghe iyapeih jaipha hüyange ü-wepalan-e ü-jeng hanghe i jaitüoh.

²⁰Ümeipa jingne ümeng phawe yelak a? Tüoyangpoi iman-e tüopa me tao yei tamlak jingne kahsa shaoteki. Tao hangke nang tangte pei hüyange iman nanleiye ngao, tüokaiye nange iman phei mongshih ngaiye yengaolak jingne ngao teihtüo pha.

²¹Tüokhei Youngwanpa, iman hayimlan seanyao yengleye li ne tamtüoh; wehok me iman toi ne tamtüoh; shekonyulan-e iman jing netanpalan hüyange hayimlan mahne tamtüoh; kahtalan daktin phei li ne tamtüoh hüyange naoshelan shapju me yanglow-e toine tamtüoh.

²²Deingao yephape imanjing noksalan nyieye yahlak jingne ükhong üyong shontam tüoh; nyampu üyonge iman üngwünne ngaone tamtüoh. Tüopa me yeitamlak jingne iman-e üjingne kahsa shao hüyange tao pholak jingne tün tün.

²³Hüpoi, Youngwanpa, tao toilak jingne iman-e konkonpulan khongküm nange shing. Imante ümeng tahwin yejema-a iman ünu winne tahtam. Ye-okpu ngene tamme yeitam tüoh hüyange aope nang mongshih ngailakei iman phei ngaotam tüoh.”