Read Konyak Naga JEREMIA 19 Bible Online

JEREMIA 19 - Konyak Naga bible

JEREMIA 19

¹Youngwanpawe üte taipuwe tükmei ja shaklak jingne i. Iye üne-o üte kahtalan mepu lwngmeilan ütam hüyange shelwngmeipu ngengpalan ütam yahlak jingne i,

²hüyange Hinnom kahjee yemepu Tükjaknyoi Peten kaiye taitüoh she i. Tüoken me Iye üte phapu ngaolan taowe pongtamlak.

³Youngwanpawe üte hüke ilak jingne i, “Judah ahngpalan hüyange Jerusalem kahtalan, Tao, ütahpa Youngwanpa, Israel Kahwange hanghe ilak ne ngoh jaitüoh. Hükih-e mahtampu tüopa nyoite Taowe yah peilak hüke kahta lili aoyinne tüopa jeng jailakei mengmahlak.

⁴Taowe tüopa linglak hangjingne ima-a kahtalan-e Tao winne tüohteki hüyange hatüo me ülao kahwanglan te toidopulan phawe tüopa nyoi nushakteki, iman yejema-a imanjing pajeiyonglan nehoi yejema-a Judah ahngpalan nehoi tüopa jeng yeshingpu kahwanglan. Iman-e tüopa nyoijing hang ümengo yenangpu kahtalan iy-e maatamteki,

⁵hüyange iman-e iman hayimlan Baalte toidopu ja ne vünte jakke dolak jingne Baal jingne wümjonglan lingteki. Tüopa linglak jingne taowe aope-o imante ngaokeng yepha; tüopa-a ü-mongjang me nehoi aope-o teih yepei.

⁶Tüokhei, tüopa nyoijingte shaaji Topheth yejema-a Hinnom kahjee she yenyiklak hipak ja peikülak. Tüopa nanleiye tüopate Toilangpu kahjee she nyiklak hipak peiküki.

⁷Tüopa nyoijing me Taowe Judah hüyange Jerusalem kahtalan-e tümtapu khongküm jajang japu ne menge tamlak. Taowe iman tangme iman jing wepalan-e naone tamlak hüyange shapju me toilak. Taowe imanjing lipu manga awhalante hüyange phao yinmoklante iman heei ne phalak.

⁸Taowe hükihpu nyam nyamshepu mahlakpa tüopa chingnyute yahpeilak tüokaiye tüopa nyoi linne kempalan lili mokhlak hüyange yashanlak.

⁹Hüyange Taowe iman hala hüyange yhalalan mei hahne tamlak, hüyange tukyange ngohpu hüyange shaoshi hanghe-e iman wepalan aoyinne iman shaoshitamlak jingne yamnang, hükih-e ngohwante, kahta lilite yoi yupipa mei tei uh ne tamlak.”

¹⁰Hüwante Youngwanpawe üte ü-phei jamme aoyin kahtalan kemyapeih tüolan sheshao me tükmei-a pailak jingne i;

¹¹hüyange Ütahpa Youngwanpawe hüke inang she imante ilak jingne i, “Taowe tüopa kahtalan hüyange tüopa chingnyu paiwinlak, hüyange tüopa-a hatüo tükmei paipu kih-e nishe linge ye ne yemeipe ngohlak. Kahtalan-e iman lipu manga Topheth me nehoi mulak hangjingne ima-a iman mulak nyoi ümeken me-o yetüopu jingne.

¹²Taowe tüopa chingnyu hüyange tüome ngohpu kahtalan Topheth kih-e linge tamlak jannang.

¹³Jerusalem noksalan, Judah ahngpalan noksalan, hüyange ütingpa me aoyin noktok shanhalan yekaote üpeameipu jakke tam hüyange kahwanglante dopu ja ne ümeken me wuwüngti shokke tam, iman khongkümpu Topheth yejaopu kih-e yejaolak.”

¹⁴Tüophei me taowe Topheth, ümeken me I ngaolan ponge tamlak jingne Youngwanpawe tao shon tüohyange tai. Tao tai hüyange khümjing ghonyoi me tao yong hüyange kahtalan khongkümpute i,

¹⁵hüke Ütahpa Youngwanpa, Israel Kahwange inang, “Taowe tüopa chingnyu tangme hüyange tüopa shongme ngohpu chingshaolan khongkümpu tangme Taowe peilakeih she ipu shaoshi lili peitamlak, hangjingne numan üngeine meng hüyange Taowe hanghe i tüopate yejai.”