Read Konyak Naga JEREMIA 2 Bible Online

JEREMIA 2 - Konyak Naga bible

JEREMIA 2

¹Youngwanpa ngao ü-tangte ngaowe pei.

²Taitüoh, Jerusalem me ngohpu moilante tüopa ngaolan pongtamtüoh: “Aope nang shela ne ngoh, nang hangshin shemei yaomawe ngoh Taowe teih tüonang; aope teman üwangne nokne meng nange hangshin üte ken, ümeken me yedeiyeli tüopa kahmük kaiye, wanwüng jeng kaiye nang ü-pheite woi.

³Israel, nanga ü-shaha jingne mengnang; nanga shejaopupa üjing toinyunanha. Aoyinne nangte makosa moilante Taowe shangpu hüyange mahtampu shon. Tao, Youngwanpawe ngaoyangki.”

⁴Youngwanpa ngaolante jaitüoh, numan Jacob huhayimlan, numan Israel jatlan.

⁵Youngwanpawe inang: “Numan jing pajeiyonglan-e üme hanghe ümeng phapu yah peipu? Ü-mepu yanne tailak ne imante hanghe lingtüohpu? Iman-e ühak yekohpu peshaolante yoppe khüm hüyange iman nying nyingke ühak yekohpe lak!

⁶Taowe iman Egypt mepu yinne tamyapeyoi iman-e, ‘Youngwanpa üpu she yetong; Wanwüng jeng kaiye iman woiye tam, wanwüng jeng hüyange pheih shaha ngohpu kahmük, eawahpu hüyange nyamlakpa kahmük ja ümeken me ao-o yenyoi hüyange aowe-o kem nehoi yekempu kahmük.’

⁷Taowe numan üyao ngohpu kahmükte woipei, tüopa mepu ülicklan hüyange ülao toimeilam me hoongli mongonglak jingne! Hüpoi tüo nanleiye numan-e ü-kahmük heamne tam; Taowe numante phapu kahmük nuweshakke tam.

⁸‘Youngwanpa ümeken me ngohnangki?’ she ngengpalan-e yetong. Üjing ngengpalan-e Tao yeshing. Wanglam lampalan-e ü-phei tüi-e hokkewe; Hipalan-e Baal min me ngao hüyange jajang japu peshaolante yoppe khüm.

⁹“Tüokhei Tao, Youngwanpawe, ü-kahtalan phei tüi-e ü-ngao tokteipu ngohlak. Iman huhayimlan phei tüi-e Taowe tokteipu yahpeilak.

¹⁰Saipras dikhot te henyipye taitüoh, hüyange Kedar kahmükte ütam ja heongye kaote shontüoh. Hatüo kih-e üshongwante aope-o jeje manngai she numan-e ngelak.

¹¹Ülao jat ao-o iman ütingpa ne yejeyapoi, iman kahwanglan aope-o yejeilei. Hüpoi ü-kahtalan-e iman jingne hango yeling oklak kahwanglan phei imante yihnoonpu yahpeipu Kahwangpa ü-phei teileih nang.

¹²Tüokhei Taowe wangdangte nyam nyamshepu powe tamlak jingne, yashanlak hüyange nyamme mokh tamlak jingne ngao phanang.

¹³Hangjingne ü-kahtalan-e ünu ni omteki: üyin yengpeiwo, ü-mepu iman tokphei lüppe taiteki; hüyange iman-e yeng yengoh oklak üwo pheipu yengnunglan shaoteki.

¹⁴“Israel-rha ja ne puhpu a? I-a nok me rha ne menglak jingne puhpu a? Hümma-a hangne I wepalan-e I-a jange taipu?

¹⁵Ite yengkongmailang kih-e waowe tam; iman-e I jing kahmük-a wanwüng jeng ne linge tam, Hüyange I jing bangchinglan-a lanshe heamteiye shüppe angnang.

¹⁶Üting, Memphis hüyange Tahpanhes kahtalan-e nang jing shangwaan paitam teki.

¹⁷Israel, hatüowa nange nang nying nyingke yah pei! Aope Taowe nang tailam paowe woiyapeih, nange nang Kahwang Youngwanpa Tao, wüngwükke tüoh.

¹⁸Nile mepu yeng yinglak jingne Egypt te taipuwe hanghe küw tüolak she nange teih nangki? Euphrates mepu yeng yinglak jingne Assyriate taipuwe hanghe küw tüolak she nange teih nangki?

¹⁹Nangjing yoi ümengpawe nangte shaoshi ne tamlak, hüyange ü-mepu nang lüppe yepuwe nangte yeitam phalak. Nang Kahwang Youngwanpa Tao winne tüohpuwa, hüyange üte ütingyelakpe ngohlakpa-a, hangshin khahpu hüyange hatüowa yeshupu she nange shinglak. Tao, okkeshangpu Ütahpa Youngwanpawe ngaoyangki.

²⁰“Israel, hipak nangjange taiteki nange ü-wong minyah she win; nange ü-ngao minjai hüyange üte yoppe khümpu minngoh she lan. Shedaopupa kahtang lili me hüyange hü-üngpu peshüm phang lili me nange wangmanne phwngngamme kahwang lante yoppe khüm.

²¹Taowe nanga shemeipupa üli mepu le yahpu wuwüngwu ja leye deishom. Hüpoi leihu nang hanghe ne mengpu! Nanga sea-nampu, ühak yekohpu wuwüngwu ja leye ngohnang.

²²Nange wong shenangpupa makjao phei poiyah peyoi, nange püohpinne nupu Taowe yelakpe ngenang she Youngwanpawe inang.

²³Nange nang nying nyingke ‘Yenu yeshak ja she, nange aope-o Baalte yoppe khümpu yengoh’ she, nange hangke iye ok ne? Leihuyah kahjee me nange hangke ünu omyangki, leihu nange nang lingpu! Nanga yemongpe shinyange wanwüng jengte phao udhlan weih-e phette yu ne tampu kih-e ngohnang.

²⁴Aope yha weihphete ngohyapeih, aowe yha tükpu oklak? Yha phohupu üpong aowe-o yoi nying nyingke shanglakne yeje, yhawe yah-hupu nyih hipak me iman-e yha-a tüolak.

²⁵Israel, ülao kahwanglante jangpuwe nang ya nyaine tahtam, yejema-a nangjing üngsa ea ne tahtam. Hüpoi nange inang, ‘Min! Tao leih yene ye-oklak yang. Taowe ülao kahwanglante kenteki, hüyange iman pheite tailakei.’”

²⁶Youngwanpawe inang, “Aope phoyapeih hüwante kuhpa kahtawe wüowe teihpu kih-e, tüokih-e numan Israel kahtalan, numan ahngpalan hei woipalan, numan ngengpalan hei hipalan khongkümpu wüowe teihlak.

²⁷Numan-e pee ja-a numan üpa she hüyange longnyu ja-a numan ünyu she ipu numan khongkümpu wüotüolak. Tüopa-a ngailak, hangne ima-a numan ü-tangte leih yehah shepu nanleiye numan ü-mepu lüppe tainang. Hüpoi aope numan shangpu me ngoh, numan-e üte peikei hüyange yinpha she tong.”

²⁸“Hüpoi numan-e numan jingne lingpu kahwanglan üpu? Aope numan shangpu me ngohlakei, iman-e oklakne mengma-a, iman-e numan yinne tamtüoh! Judah, numan-e chingnyulan hangshin ngoh teshinne numan kahwanglan ngohnang.”

²⁹“Numan-e ngao ngaipuwa hanghe shi? Hangne numan-e ü-phei tüi-e hokkewepu?

³⁰Taowe numante shaoshi ne tam, hüpoi hango ümei yeling; numan-e üte numan-e tinge yene yetam. Menge tampupa yengkong mailang kih-e, numan-e numan jing hipalan toi.

³¹Israel kahtalan, Taowe hanghe iyapeih tüote jaitüoh. Numan jingne Taowa wanwüng kahmük kih-e, wangnyak hüyange ütuh pheipu kahmük kih-e ngohyang pu a? Hüma-a, hangne numante meipupa kih-e numan-e linglakei she, hüke numan aope-o ü-tangte leih minye she numan-e ipu?

³²Naoyha-e yha jing juyük, yejema-a nyemnyanyuwe yha jing nokyam oleng peye tüohlak a? Hüpoi ü-kahtalan-e nyih ipu yekümpe Tao pemeiyangki.

³³“Numan-e jumaite hangke janglak meimei-e shingnang. Shemengpupa shekowe nehoi numan mepu shinge yahnang.

³⁴Numan nyemo-a wangnyak me nokmenge onge kuhpupa iy ne yeje, hüpoi toinanpa hüyange hang ümengo yenangpulan iy kaiye nuwe shakyange ngohnang. Hüpoi tüolan khongkümpu tüohyange numan-e inang,

³⁵‘Taowa hang ümengo yenang; ütingme Youngwanpawe ü-phei mongmengpu shaaji yenang.’ Hüpoi Tao, Youngwanpawe numan shaoshine tamlak hangjingne ima-a numan-e ünu ye-om she iye ok.

³⁶Ülao jatlan kahwanglan tangte lüppe yepu kaiye numan-e numan nying nyingke khaiye tamyangki. Assyrialan-e numan hangke linge tam, tüo mei mei kih-e numan-a Egyptlan kaiye mongshang mongmenglak.

³⁷Wüopu phei numan shang jhotyange, numan Egypt mepu lüppe tailak. Aoyinte numan-e ütinglak, Tao, Youngwanpawe iman winyangki; numan-e iman mepu hango küw yetüolak.”