Read Konyak Naga JEREMIA 20 Bible Online

JEREMIA 20 - Konyak Naga bible

JEREMIA 20

¹Aope Immer üha Pashhur ngengpa, aowe khümjing me ütahpa woipa ne mengyapeih, Iye taowe pongetampulan jaiyapeih,

²üte shette tamlak jingne Iye ngaokeng pha hüyange Khümjing me ütangpa Benjamin Peten shongme yankeilei phei phünyange ang.

³Ünenap Pashhurwe Üte phünpu mepu lan-e tamyang phei me, taowe Ite i, “Youngwanpawe nangte Pashhur she yemintam. Iye nangte minne tampu min-a ‘Yawinmongpai.’

⁴Youngwanpa yoi nying nyingke iyangki, ‘Taowe nang tangme nang nying nyingke hüyange nang shümpalante yawinmongpailak ne linge tamlak, hüyange nange imantepu wepalan yanglow-e iman khongkümpu toipu ngelak. Taowe Babilon ahngpa wong phangme Judah kahtalan khongkümpu angtamlak; Iye iman ütam yoi kahmükte chingtaipalan-e yahteilak hüyange ülaolan-a yanglow phei toine tamlak.

⁵Taowe üne-o imanjing wepalante tüopa chingnyu mepu moth khongkümpu nyieyah ne tamlak hüyange tüopa mepu toinyunanha hüyange mothkat khongkümpu phowe yahne tamlak, Judah ahngpalan shengngin nehoi, hüyange sheminlamphe Babilonte teine tamlak.

⁶Pashhur, nangjingne-a nang hüyange nenok noksalan khongkümpu pholak hüyange Babilonte yahteilak. Tüoken me nang lilak hüyange nang shümpalan khongkümpu aoyin phei nange tahleih ngaolan üngang ngaowe tam, tüolan phei jamme mulak.’ ”

⁷Youngwanpa, nange üte lo, hüyange taowa lowetam. Nanga ü-phei wong shenangpupa, hüyange nange üte nang wonge naone tam. Moilanne üte nyiyaine tam; nyihlao hipak iman-e üte phoiwüm.

⁸Hangkihting me taowe ngaolakei, taowe “Yakpheilükpu! Mengtampu!” she üngwünne ngaolak ne ngainang. Youngwanpa, taowa hipak phe me yaoweletampa ne hüyange ye-i-yeshepa ne mengnang, hangjingne ima-a taowe nang ngaolan pongtampu jingne.

⁹Hüpoi aope taowe, “Taowe Youngwanpa petüohlak hüyange shaaji I min me yengaolak” she ilakei, hüwante nang ngaolan-a vün kih-e ü-kenmong shelupupa me loognang. Taowe tüopa okpu shinne tükke anglak jingne ngang, hüpoi tüopa, hipak laowe tükke angpu ye-ok.

¹⁰Moilanne ngaolo ipu taowe jainang, “Yawinmongpaipu-a üken phe me! Kei wanglam lampalante I phawe tamhah!” Ü-shümpa ümeilan-e nehoi tao yeitalakte tannang. Iman-e inang, “Aoweshingpu I-a lowetampu oklak, hüwante teman-e I pholak hüyange phuh hahlak.”

¹¹Hüpoi okkeshangpu hüyange wongnangpu nanga ü-phei ngohnang; Youngwanpa, hüyange aoyinne üte shaoshiyateng ne tamnang iman-e okpu ye-ngelak! Iman jin jintepu jingne wüotüolak, hangjingne iman-e okpu ye-ngepu jingne! Iman wüotüotampuwa aope-o yepelak.

¹²Hüpoi, Ütahpa Youngwanpa, nange kahtalante khakshupu me toknang; iman kenmong hüyange mongjang me hanghe ngoh nange shingnang. Tüokhei ü-wepalante nange phuh hahpu taowe ngene tampha, hangjingne ü-wongpong taowe nang yak me ngaitamteki.

¹³Youngwanpate hem loktüoh! Youngwanpa yihlu tüoh! Ümeng kahtalan wong mepu shanghah shaoshipalan Iye yintam nang.

¹⁴Tao puhpu nyihte phoiwüm tüoh! Ü-nyuwe tao puhtampu nyih tahteih tüopha!

¹⁵Aowe üpa mongmei ne tamme aope Iye I tangte ngaolan yahpei, “Hatüowa netan yang! Nangme naoshe ja ngaiteki,” Tüopa kahta te phoiwüm tüoh.

¹⁶I-a Youngwanpawe shüpshe yenangpe mahtampu chingnyulan kih-e ngoh shih. Iye napning me dakteiye wünne kapu hüyange nyihning me shapju pongpu jaine tamshih;

¹⁷hangjingne tao puhshao me Iye tao yetoitam. Hüke lingshihma-a ünyu sea-a ü-mangjong ne menghah shepu, hüyange yha naonyoi-a jinte kheyonghah shepu!

¹⁸Hangne tao puhpu? Shanghah shaoshi hüyange mongmengne tamme, wüotüowe ü-üyin kümme tamne hei?